Äleumettık jelılerde Türkıstan oblysynda tüsırılgen video qyzu talqyǧa tüstı, dep habarlaidy "Adyrna" ūlttyq portaly Tengrinews.kz-ke sıltep.
Beinejazbada traktordyŋ Qyzyl kıtapqa engen sirek ösımdık Greig qyzǧaldaǧy ösıp tūrǧan alqap arqyly jürıp ötkenı körınedı.
Jelı qoldanuşylary būl jaǧdaiǧa ärtürlı pıkır bıldırdı. Bır bölıgı sirek kezdesetın ösımdıkterdıŋ zaqymdanuyna alaŋdasa, endı bır top jer iesın qoldap, tehnikanyŋ egıstık jiegın öŋdeu nemese qauıpsızdık maqsatynda jürgen boluy mümkın ekenın aitty.
Oqiǧaǧa bailanysty Türkıstan oblysy PD tüsınıkteme berıp, videodaǧy jaǧdai boiynşa tekserıs jürgızılıp jatqanyn habarlady. Qazırgı uaqytta qyzǧaldaqtardy joiu nemese zaqymdau faktısı tırkelmegen.
Al Ordabasy audany äkımdıgınıŋ mälımetınşe, video tüsırılgen jer jeke menşıkke tiesılı egıstık alqap bolyp tabylady. Onda auyl şaruaşylyǧy daqyldary, sonyŋ ışınde bidai egılgen. Äkımdık jer iesınıŋ aumaǧyna rūqsatsyz kıru jaǧdailary jiılegenın aityp, qauıpsızdık maqsatynda jol uaqytşa jabylǧanyn da jetkızdı.
Mamandardyŋ aituynşa, Qazaqstannyŋ Qyzyl kıtabyna 387 ösımdık türı engızılgen, olardyŋ qatarynda Greig qyzǧaldaǧy da bar. Zaŋǧa säikes, sirek kezdesetın ösımdıkterdı joiuǧa, jūluǧa nemese zaqymdauǧa qataŋ tyiym salynǧan.
Qoldanystaǧy zaŋnamaǧa säikes mūndai äreketter üşın 3 000 AEK-ke deiın aiyppūl, tüzeu jūmystary, bas bostandyǧyn şekteu nemese üş jylǧa deiın bas bostandyǧynan aiyru jazasy qarastyryluy mümkın.
