تۇركىستان وبلىسىندا 16 جاستاعى قىزى مەن 45 جاستاعى اناسىن اۋىلداسى ايۋاندىقپەن ءولتىرىپ كەتكەنى ايتىلدى. كەلەس اۋدانىندا جان تۇرشىگەرلىك قايعىلى وقيعا ورىن الدى، دەپ حابارلايدى "ادىرنا" ۇلتتىق پورتالى. بۇل تۋرالى جۋرناليست گۇلميرا ابىقاي جەلىدەگى جازباسىندا جاريالادى.
30 جاستاعى كۇدىكتى بۇعان دەيىن اۋىل مەكتەبىندە ساباق بەرگەن. كۇدىكتى ءوزى ولتىرگەن مەكتەپ وقۋشىسىنا سەكسۋالدىق زورلىق كورسەتكەنى ءۇشىن جۇمىستان قۋىلعان بولاتىن. قازا بولعانداردىڭ تۋىستارىنىڭ ايتۋىنشا، كۇدىكتى قىلمىسكەر وسىلايشا جۇمىستان شىعارىلعانى ءۇشىن كەك العىسى كەلگەن.
سول قارالى تۇندە 16 جاستاعى نۇريا اپكەسىنىڭ ۇيىنەن ءوزى ۇيىنە كەلگەن. تۋىستارىنىڭ ايتۋىنشا، قاسكۇنەم ۇيگە تۇنگى ەكىدە كىرىپ، الدىمەن 45 جاستاعى جەسىر ايەلدىڭ باسىنان كىرپىشپەن ۇرىپ، كەيىن 10-سىنىپ وقۋشىسىن زورلاعان. ولاردىڭ ايتۋىنشا، زورلىق-زومبىلىققا ۇشىراعان قىزدىڭ شىڭعىرعان ايقايىن كورشىلەرى ەستىگەن.
مارقۇمنىڭ دەنەسىن جۋعان تۋىستارىنىڭ ايتۋىنشا، مارقۇمنىڭ دەنەسىنىڭ ساۋ تامتىعى قالماعان. قىزدىڭ ءبىر كوزى ويىلىپ، كەۋدەسى كوگەرىپ، اناسىنىڭ ميى جانشىلىپ كەتكەن، دەيدى. قان-جوسا بولعان ءۇيدى مارقۇمداردىڭ تۋىستارى جۋىپ شىققانىمەن، جانتۇرشىگەرلىك قىلمىستىڭ ىزدەرى ءالى دە قالعانىن ايتادى.
تۋىستارى وتباسى يەسىنىڭ وسىدان 15 جىل بۇرىن ولتىرىلگەنىن ايتادى. جەسىر ايەل زاريپا نارىمبەتوۆا ءۇش قىز تاربيەلەپ ءوسىرىپ، ەكەۋىن قۇتتى ورنىنا قوندىرعان. ول ءوزى مەكتەپتە اسپاز بولىپ جۇمىس ىستەگەن. اناسى مەن قىزىن ءولتىردى دەپ نۇريا وقىعان مەكتەپتىڭ دەنە شىنىقتىرۋ ءپانىنىڭ مۇعاىلىمى ايىپتالىپ وتىرعانى ايتىلدى.
جاقىندارى ونىڭ ءبىر جىل بۇرىن 15 جاستاعى نۇرياعا ماحاببات حاتتارىن جازا باستاعانىن اتاپ ءوتتى. مۇنى بىلگەن اناسى ونىڭ ۇستىنەن مەكتەپ ديرەكتورىنا شاعىمدانعان، سودان كەيىن كۇدىكتى جۇمىستان بوساتىلعان. كىنالى دەپ ايىپ تاعىلىپ وتىرعان ءۇش بالانىڭ اكەسى قازىر قاماۋدا وتىر. مارقۇمداردىڭ تۋىستارى ونىڭ بۇل جانتۇرشىگەرلىك كىسى ءولتىرۋ ارەكەتىن جالعىز ءوزى جاساعانىنا كۇماندانىپ وتىر. ولاردىڭ ويىنشا، ونىڭ قاسىندا سىبايلاسى بولعان.
12 قىركۇيەك كۇنى اناسى مەن قىزىن جەرلەۋ ءراسىمى ءوتتى. كىسى قولىنان قازا تاپقان مارقۇمداردىڭ تۋىستارى جاقىندارىنىڭ ولىمىنە كۇدىكتىلەردىڭ انىقتالىپ، لايىقتى جازاسىن الۋىن سۇرايدى.
قازىر بۇل فاكتى بويىنشا سوتقا دەيىنگى تەرگەۋ باستالدى.
«پوليتسيا تۇركىستان وبلىسىنىڭ تۇرعىنى مەن ونىڭ كامەلەتكە تولماعان قىزىن ءولتىرۋ دەرەگى بويىنشا قىلمىستىق ءىس قوزعادى. كۇدىكتى جەدەل ىزدەستىرۋ شارالارىمەن ۇستالىپ، ۋاقىتشا ۇستاۋ يزولياتورىنا قامالدى. قازىرگى ۋاقىتتا وقيعانىڭ بارلىق ءمان-جايىن انىقتاۋ ماقساتىندا قاجەتتى جەدەل-ىزدەستىرۋ شارالارى جۇرگىزىلۋدە. باسقا مالىمەتتەر تەرگەۋ مۇددەسى ءۇشىن جاريا ەتىلمەيدى»، - دەپ حابارلادى تۇركىستان وبلىستىق پوليتسيا دەپارتامەنتىنىڭ ءباسپاسوز قىزمەتى.
پوليتسيا ازاماتتاردى جالعان اقپارات تاراتپاۋعا جانە تەك رەسمي اقپارات كوزدەرىنە سەنۋگە شاقىرادى.
