Almatydaǧy №90 mektep-liseiınıŋ ūstazdary men oquşylary älemnıŋ üzdık mūǧalımderınıŋ qataryna engen, Global Teacher halyqaralyq märtebesıne ie Tatiana Belousovamen kezdestı.
Is-şara aiasynda Tatiana Belousova öz täjıribesımen bölısıp, zamanaui pedagogikanyŋ negızgı täsılderı turaly aityp berdı. Sondai-aq, ol Global Teacher bedeldı halyqaralyq märtebesıne ie boludyŋ erekşelıkterın tüsındırdı. Qatysuşylar özderın tolǧandyrǧan sūraqtaryn qoiyp, bılım beru salasyndaǧy özektı mäselelerdı talqylady jäne oqytu sapasyn arttyruǧa arnalǧan praktikalyq ūsynystar aldy.
№90 mektep-liseiınıŋ direktory Būlbūl Rasbekqyzynyŋ aituynşa, būl ıs-şara pedagogtardyŋ käsıbi qauymdastyǧyn damytuǧa, oquşylardyŋ şyǧarmaşylyq bastamalaryn qoldauǧa jäne mekteptıŋ innovasiialyq ärı mädeni bılım beru ortalyǧy retındegı imidjın nyǧaituǧa baǧyttalǧan.
«Būl kezdesu bız üşın öte maŋyzdy. Öitkenı Tatiana Gennadevna zeinetker bola tūra, osyndai ülken konkursty jeŋıp alyp otyr. Jas mamandar men studentterdı mektepke tartu, pedagog märtebesın köteru maqsatynda osyndai jandardy şaqyrdyq. Olardyŋ jetıstıkke qalai jetkenı ärıptesterımız üşın de paidaly. Mümkın, oquşylarymyzdyŋ arasynda bolaşaqta mūǧalım boludy taŋdaityndar bar şyǧar. Bızge jaqsy mūǧalımder qajet. Bızdıŋ aldymyzda otyrǧan balalar öte talantty. Būl – arnaiy fizika-matematikalyq lisei. Qazırgı uaqytta äsırese matematika, fizika, himiia pänı mūǧalımderı tapşy. Sondyqtan būl ıs-şara balalar üşın käsıptık baǧdar retınde de maŋyzdy. Sonymen qatar bügın mektebımızde qazaq teatrynyŋ tūsaukeserı ötude. Sol teatrdy osyndai qūrmettı qonaqtardyŋ aşqanyn qaladyq», – deidı Būlbūl Rasbekqyzy.
Aita keteiık, Almatydaǧy №95 mektep-liseidıŋ himiia pänı mūǧalımı, «Qazaqstannyŋ üzdık ūstazy – 2024» qūrmettı ataǧynyŋ iegerı Tatiana Belousova Global Teacher Prize 2025–2026 halyqaralyq baiqauynyŋ qorytyndysy boiynşa älemnıŋ eŋ üzdık 50 pedagogınıŋ qataryna endı. Būl tızım 2025 jylǧy 15 jeltoqsanda Global Teacher Prize resmi saitynda jariialandy.
Keiın ūstazdy Memleket basşysy qūttyqtap, būl joǧary marapat onyŋ öskeleŋ ūrpaqty tärbieleu men oqytuǧa baǧyttalǧan köpjyldyq eŋbegınıŋ nätijesı ekenın atap öttı.
«№90 mektep-lisei – Almaty qalasyndaǧy äigılı oqu oryndarynyŋ bırı. Mektep ūjymymen, oquşylarmen kezdesu, täjıribe bölısu menı ärqaşan şabyttandyrady. Qazaqstan Global Teacher Prize baiqauyna bes ret qatysyp, üş ret üzdık 50 pedagogtyŋ qataryna endı. Aldaǧy uaqytta üzdık ondyqqa enedı dep senemız. Būǧan ūstazdar qauymynyŋ tolyq mümkındıgı bar. Osyndai kezdesulerden ūstazdar baǧyt alyp, halyqaralyq baiqaularǧa qatysyp, jeŋımpaz atanady dep oilaimyn. №90 mektep-lisei basşylyǧyna jäne ūjymyna alǧys aitamyn», – dedı Tatiana Belousova.
Is-şaranyŋ soŋynda mektepte «Şyraq» qazaq teatry aşylyp, balalardyŋ süiıktı şyǧarmasy – «Menıŋ atym Qoja» sahnalandy. Qyzyl lentany qūrmettı qonaq Tatiana Belousova qiyp, jas önerpazdarǧa sättılık tıledı.
Aita keteiık, №90 mamandandyrylǧan daryndy balalarǧa arnalǧan fizika-matematikalyq lisei – Almaty qalasyndaǧy eŋ tanymal oqu oryndarynyŋ bırı. Bügınde mektepte 1256 oquşy bılım alady.
