قوستانايدا قۇقىق قورعاۋ ورگانى قىزمەتكەرىنە شابۋىل جاساعان كۇدىكتىلەردىڭ كەشىرىم سۇراعان ۆيدەوسى جاريالاندى، دەپ حابارلايدى "ادىرنا" ۇلتتىق پورتالى.
وقيعا قوعامدا ۇلكەن رەزونانس تۋدىرىپ، الەۋمەتتىك جەلىلەردە قىزۋ تالقىلاندى.
بۇعان دەيىن تاراعان بەينەجازبادا قىزمەتتەن تىس ۋاقىتتا بالالارىمەن بىرگە جۇرگەن پوليتسەيدىڭ قوعامدىق ءتارتىپتى بۇزعان ءۇش ەر ادامعا ەسكەرتۋ جاساعانى بايقالادى. الايدا ەسكەرتۋگە اشۋلانعان ازاماتتار ءتارتىپ ساقشىسىنا تاپ بەرىپ، وعان كۇش قولدانعان.
قوستاناي وبلىستىق پوليتسيا دەپارتامەنتى كۇدىكتىلەردىڭ ۇستالۋ ساتىنەن كادرلاردى جاريالادى. ۆيدەودا ولار ءوز ارەكەتتەرىنە وكىنىش ءبىلدىرىپ، تەك زارداپ شەككەن پوليتسەيدەن عانا ەمەس، بارلىق قۇقىق قورعاۋ قىزمەتكەرلەرىنەن كەشىرىم سۇرايدى.
«قاتەلىگىمدى مويىندايمىن، وكىنەمىن. بارلىق پوليتسيا قىزمەتكەرلەرىنەن كەشىرىم سۇرايمىن. مۇنداي ارەكەت ەندى قايتالانبايدى»، – دەيدى ۇستالعانداردىڭ ءبىرى.
بەلگىلى بولعانداي، باستاپقىدا كۇدىكتىلەرگە قاتىستى قاماۋعا الۋ شاراسى بىردەن قولدانىلماعان. الايدا ءىس «بيلىك وكىلىنە قاتىستى كۇش قولدانۋ» بابى بويىنشا قايتا سارالانعاننان كەيىن، ولار تەرگەۋ يزولياتورىنا قامالدى.
قوستاناي وبلىسى پروكۋراتۋراسىنىڭ مالىمەتىنشە، قىلمىستىق ءىس قر قىلمىستىق كودەكسىنىڭ 380-بابى 6-بولىگى 4-تارماعى بويىنشا تەرگەلىپ جاتىر. بۇل باپ بويىنشا 10 جىلدان 15 جىلعا دەيىن باس بوستاندىعىنان ايىرۋ جازاسى قاراستىرىلعان. سوت كۇدىكتىلەرگە قاتىستى ەكى اي مەرزىمگە قاماۋدا ۇستاۋ تۇرىندەگى بۇلتارتپاۋ شاراسىن سانكتسيالادى.
