قوعامدىق قاۋىپسىزدىك پەن زاڭ ۇستەمدىگىن قامتاماسىز ەتۋ – كەز كەلگەن ايماقتىڭ الەۋمەتتىك تۇراقتىلىعى مەن دامۋىنىڭ نەگىزى. قۇقىق قورعاۋ ورگاندارىنىڭ مىندەتى – ازاماتتاردىڭ تىنىشتىعىن ساقتاۋ، قۇقىق بۇزۋشىلىقتىڭ الدىن الۋ جانە زاڭ بۇزعانداردى جاۋاپكەرشىلىككە تارتۋ ارقىلى ءتارتىپتى نىعايتۋ. 2025 جىلدىڭ العاشقى التى ايىندا باتىس قازاقستان وبلىسىندا اتالعان باعىتتار بويىنشا ناقتى ناتيجەلەرگە قول جەتكىزىلدى. قىلمىس دەڭگەيىنىڭ تومەندەۋى، جول قوزعالىسى ەرەجەلەرىنىڭ ساقتالۋىن باقىلاۋ، ەسىرتكىمەن كۇرەس، ينتەرنەت-الاياقتىقتىڭ الدىن الۋ جانە ەكولوگيالىق زاڭبۇزۋشىلىقتاردى انىقتاۋ – وڭىرلىك پوليتسيانىڭ باستى نازارىنداعى جۇمىستار بولىپ وتىر.
رەسمي دەرەكتەرگە سۇيەنسەك، باتىس قازاقستان وبلىسىندا 2025 جىلدىڭ العاشقى التى ايىندا قۇقىق بۇزۋشىلىقتاردىڭ ءبىرقاتار ءتۇرى ەداۋىر ازايدى.
وبلىستىق پوليتسيا دەپارتامەنتىنىڭ دەرەگىنشە، اسا اۋىر قىلمىستار - 43,3%، ۇرلىقتار - 20,6%، توناۋلار - 37,5%، مال ۇرلىعى - 25,6%، ال ۇيالى تەلەفون ۇرلىعى 34,3%-عا قىسقارعان.
سونىمەن قاتار اۋىر جانە اسا اۋىر قىلمىستاردىڭ اشىلۋ دەڭگەيى 79,9% بولسا، اسا اۋىر قىلمىستاردىڭ اشىلۋى 100%-دى قۇرادى. بۇل - پوليتسيانىڭ جەدەل ءارى كاسىبي جۇمىسىنىڭ كورسەتكىشى.
جولدا ءتارتىپ كۇشەيدى
وبلىس اۋماعىندا جول قوزعالىسىن باقىلاۋ تۇراقتى تۇردە جۇزەگە اسىرىلادى. 2025 جىلدىڭ ءبىرىنشى جارتىسىندا 125 مىڭنان استام جول قوزعالىسى ەرەجەسىن بۇزۋ دەرەگى تىركەلىپ، 115 مىڭنان استام ازامات جاۋاپقا تارتىلدى. ونىڭ ىشىندە 740 جۇرگىزۋشى ماس كۇيىندە كولىك باسقارعان. بۇل – جول قاۋىپسىزدىگىن قامتاماسىز ەتۋ ماقساتىندا باقىلاۋدىڭ كۇشەيتىلگەنىن ايعاقتايدى. جول قوزعالىسى قاۋىپسىزدىگىن قامتاماسىز ەتۋ ماقساتىندا «قاۋىپسىز جول»، «اۆتوبۋس»، «قۇقىقتىق ءتارتىپ» سەكىلدى جەدەل-پروفيلاكتيكالىق ءىس-شارالار تۇراقتى وتكىزىلىپ، جوعارى تاۋەكەل توبىنا جاتاتىن جۇرگىزۋشىلەرگە ەرەكشە نازار اۋدارىلىپ وتىر.
ەسىرتكىمەن كۇرەس ناتيجەسى: 20 كەلىگە جۋىق زات تاركىلەندى
جىل باسىنان بەرى ەسىرتكىگە قاتىستى 131 قۇقىق بۇزۋشىلىق تىركەلىپ، ونىڭ 46-سى قىلمىستىق ءىس رەتىندە قارالدى. زاڭسىز اينالىمنان بارلىعى 19,8 كگ ەسىرتكى زاتى تاركىلەندى. سونداي-اق «قاراسورا-2025» جەدەل شاراسى اياسىندا 1 ماۋسىمنان بەرى 56 قۇقىق بۇزۋشىلىق انىقتالىپ، 15 كەلىگە جۋىق ماريحۋانا تاركىلەندى. سونىمەن قاتار جاسوسپىرىمدەر اراسىندا ناشاقورلىقتىڭ الدىن الۋ ماقساتىندا مەكتەپتەر مەن كوللەدجدەردە اقپاراتتىق-ءتۇسىندىرۋ شارالارى كەڭىنەن جۇرگىزىلۋدە.
ينتەرنەت-الاياقتىق - وزەكتى ماسەلە
زاماناۋي تەحنولوگيالاردىڭ دامۋى قىلمىستىڭ جاڭا تۇرلەرىنىڭ كوبەيۋىنە سەبەپ بولدى. سونىڭ ىشىندە ينتەرنەت-الاياقتىق – ەرەكشە الاڭداۋشىلىق تۋدىراتىن ماسەلەلەردىڭ ءبىرى. وڭىردە ينتەرنەت-الاياقتىق سانى الاڭداتارلىق دەڭگەيدە قالىپ وتىر. التى ايدا 227 دەرەك تىركەلىپ، ازاماتتارعا 345 ملن تەڭگە كولەمىندە شىعىن كەلتىرىلگەن. پوليتسيا الاياقتىقتىڭ جاڭا تۇرلەرىنە قارسى ۇگىت-ناسيحاتتى كۇشەيتۋدە: 71 مىڭ تۇرعىنمەن ءتۇسىندىرۋ جۇمىسى، 8 مىڭ جادىناما تاراتىلىپ، الەۋمەتتىك جەلى مەن باق ارقىلى 2700-دەن استام ماتەريال جاريالانعان.
«تازا قازاقستان»: 19 مىڭنان استام قۇقىقبۇزۋشىلىق تىركەلدى
2024 جىلدىڭ 15 ساۋىرىنەن باستاپ باتىس قازاقستاندا «تازا قازاقستان» ەكولوگيالىق اكتسياسى شەڭبەرىندە 67 موبيلدىك توپ جۇمىس ىستەۋدە. وسى ۋاقىت ىشىندە 19 115 قۇقىقبۇزۋشىلىق تىركەلگەن. ونىڭ ىشىندە:
•اقبتك 505-بابى بويىنشا (اباتتاندىرۋ ەرەجەسىن بۇزۋ) – 8 872 جاعداي
•اقبتك 434-2-بابى بويىنشا (قوعامدىق ورىنداردى لاستاۋ) – 10 243 جاعداي
پوليتسيا تاراپىنان ايىپپۇل سالۋ جانە قۇقىقتىق ءتۇسىندىرۋ جۇمىستارى جۇرگىزىلىپ، تۇرعىنداردىڭ ەكولوگيالىق مادەنيەتىن كوتەرۋ قولعا الىندى.
جاسوسپىرىمدەر اراسىنداعى قۇقىقبۇزۋشىلىقتىڭ الدىن الۋ
كامەلەتكە تولماعاندار اراسىندا قۇقىقبۇزۋشىلىقتىڭ الدىن الۋ ماقساتىندا 4500-دەن استام قۇقىقتىق ءدارىس, 3000-نان استام مەكتەپتەگى كەزدەسۋ, 1267 مەديا ماتەريال جاريالاندى.
جازعى دەمالىس لاگەرلەرىندە بالالارمەن قۇقىقتىق ساۋاتتىلىقتى ارتتىرۋ بويىنشا كەزدەسۋلەر وتكىزىلدى. بۇگىندە وبلىستا 146 دەۆيانتتى مىنەز-قۇلىقتى ءجاسوسپىرىم، 145 قولايسىز وتباسى پروفيلاكتيكالىق ەسەپتە تۇر. ولاردىڭ بارلىعىنا قۇقىقتىق كەڭەس بەرىلىپ، باقىلاۋ كۇشەيتىلگەن.
بقو پوليتسيا دەپارتامەنتى قۇقىق بۇزۋشىلىقتىڭ الدىن الۋ، قوعامدىق ءتارتىپتى ساقتاۋ، تۇرعىنداردىڭ قاۋىپسىزدىگىن قامتاماسىز ەتۋ باعىتىنداعى جۇمىستاردى جالعاستىرا بەرمەك.
ءتارتىپ ساقشىلارى وبلىس تۇرعىندارىن زاڭعا باعىنۋعا، ءوز قاۋىپسىزدىكتەرىنە بەي-جاي قاراماۋعا جانە قۇقىق قورعاۋ ورگاندارىمەن بەلسەندى بايلانىستا بولۋعا شاقىرادى. قاۋىپسىزءارى تۇراقتى ورتا – ءار ازاماتتىڭ سانالى ارەكەتى مەن ورتاق جاۋاپكەرشىلىگىنىڭ جەمىسى.
