قازاقستاندا سوڭعى ۋاقىتتا الەۋمەتتىك جەلىلەردە وقۋشىلاردىڭ مۇعالىمدەردى مازاق ەتىپ، ولاردىڭ فوتوسۋرەتتەرىن قورلايتىن اۋەنمەن جاريالايتىن جاعدايلارى جيىلەپ وتىر. اسىرەسە TikTok پلاتفورماسىندا مۇنداي كونتەنتتىڭ تارالۋى قوعامدا الاڭداۋشىلىق تۋعىزدى.
اتالعان جاعدايعا بايلانىستى ءماجىلىس دەپۋتاتى اسحات ايماعامبەتوۆ قازاقستاندىق پەداگوگتاردى وقۋشىلار تاراپىنان جاسالاتىن بۋللينگكە توزبەۋگە جانە پوليتسياعا جۇگىنۋگە شاقىردى.
مۇنداي جاعدايلاردىڭ ءبىرى ماڭعىستاۋ وبلىسى، مۇنايلى اۋدانىنداعى №17 مەكتەپتە تىركەلدى. وندا وقۋشىلار مۇعالىمدەردىڭ فوتوسۋرەتتەرىن پايدالانىپ، ولاردى الەۋمەتتىك جەلىدە مازاق ەتكەن. تەكسەرۋ ناتيجەسىندە كىنالى وقۋشىلار ءوز ارەكەتتەرىن تولىق مويىنداپ، مۇعالىمدەردەن كەشىرىم سۇرادى.
“مەن دە ىستەگەن ىستەرىمنىڭ ءبارىن مويىندايمىن. بارلىعىنان كەشىرىم سۇرايمىن، ەندى قايتالانبايدى. بۇل ماعان ساباق بولدى. قازاق تىلىنەن بەرەتىن كامشات اپاي، وقۋ ءىسى جونىندەگى ورىنباساردان، ازامات اعاي، نازەركە اپاي، بايان اپاي، وسى ۇستازداردان شىن جۇرەكتەن كەشىرىم سۇرايمىن”، – دەدى وقۋشى.
اتا-انالار دا بالالارىنىڭ ءىس-ارەكەتى ءۇشىن كەشىرىم ءبىلدىرىپ، مۇنداي جاعدايدىڭ قايتالانبايتىنىن ايتتى.
“17-مەكتەپتىڭ قۇرمەتتى ۇستازدارى كەشەگى الەۋمەتتىك جەلىگە تاراعان ۆيدەونى مەنىڭ بالام جىبەرگەن. سول ءۇشىن ۇستازداردان، اتا-انالاردان كەشىرىم سۇرايمىن”، – دەدى اتا-انا.
مەكتەپ اكىمشىلىگى كەيىن جەلىگە مۇعالىمدەردى قورلاعان وقۋشىلار مەن اتا-اناسىنىڭ كەشىرىم سۇراعان ءساتىن جاريالادى.
“قازىر الەۋمەتتىك جەلىلەردە، سونىڭ ىشىندە TikTok پلاتفورماسىندا مۇعالىمدەردىڭ فوتوسىن پايدالانۋ ارقىلى فەيك اككاۋنت اشىلىپ، جاعىمسىز سيپاتتاعى ترەندتەردىڭ تارالۋى بايقالدى. وسى جاعدايعا بايلانىستى مەكتەپ اكىمشىلىگى تاراپىنان تەكسەرۋ جۇمىستارى جۇرگىزىلدى. اتاپ ايتقاندا، ديرەكتوردىڭ تاربيە جۇمىسى جونىندەگى ورىنباسارى ۋ.ج.جاراسباەۆا اتالعان ماسەلەنى تولىق تەكسەرىپ، ءتيىستى اقپاراتتى انىقتادى.
تەكسەرۋ ناتيجەلەرى بەلگىلى بولعاننان كەيىن سىنىپ جەتەكشى، ءپان مۇعالىمدەرى، مەكتەپ پسيحولوگى جانە مەكتەپ ينسپەكتورىنىڭ قاتىسۋىمەن، سونداي-اق وقۋشىلار مەن اتا-انالاردى تارتا وتىرىپ جينالىس ۇيىمداستىرىلدى. جيىن بارىسىندا جاعداي جان-جاقتى تالقىلانىپ، ءتۇسىندىرۋ جۇمىستارى جۇرگىزىلدى. وقۋشىلار ءوز ارەكەتتەرىن تولىق مويىنداپ، كەشىرىم سۇراۋ ماقساتىندا بەينەۇندەۋ جولدادى”، – دەلىنگەن مەكتەپ حابارلاماسىندا.
ال دەپۋتات اسحات ايماعامبەتوۆتىڭ سوزىنشە، مۇنداي جاريالانىمدار كوبىنە TikTok جەلىسىندە كوبەيگەن. قازىر وقۋشىلار تاراپىنان جاسالاتىن بۋللينگ جاعدايلارى قولدانىستاعى زاڭ نورمالارىمەن رەتتەلگەن. سوندىقتان مۇعالىمدەر قۇقىق قورعاۋ ورگاندارىنا شاعىمدانا الادى. ول پوليتسيا مۇنداي جاعدايدا كىنالىلەردى تەز انىقتاي الاتىنىن دا اتاپ ءوتتى.
“قازىرگى تەحنولوگيالار پوليتسياعا بۋللينگ جاساعانداردى جەدەل انىقتاپ، ءتيىستى شارا قولدانۋعا مۇمكىندىك بەرەدى. كوپ ازاماتتار زاڭ بۇزعان كەزدە تسيفرلىق ءىز قالمايدى دەپ ويلاپ، قاتەلەسەدى", – دەدى ول.
دەپۋتات سونداي-اق بالالارى قورلايتىن كونتەنت تۇسىرەتىن اتا-انالارعا قاتىستى جاۋاپكەرشىلىك تەك اكىمشىلىك دەڭگەيمەن شەكتەلمەي، كەي جاعدايدا قىلمىستىق ءىس رەتىندە دە قاراستىرىلۋى مۇمكىن ەكەنىن دە العا تارتتى.
