شىعىس قازاقستان وبلىسى، كۇرشىم اۋدانى، مارالدى اۋىلىندا التىن ءوندىرۋ فابريكاسىن سالىپ جاتقان كومپانياعا تۇرعىندار نارازىلىق بىلدىرگەن ەدى. جەرگىلىكتى حالىقتىڭ شاعىمىنا قۇلاق اسقان ماماندار كومپانياعا 3 ملن تەڭگەگە جۋىق ايىپپۇل سالدى، دەپ حابارلايدى "ادىرنا" ۇلتتىق پورتالى.
بىلتىر شىعىس قازاقستان وبلىسى، كۇرشىم اۋدانى مارالدى اۋىلىنىڭ حالقى التىن ءوندىرۋشى كومپانيانىڭ جۇمىسىنا نارازىلىق ءبىلدىرىپ، ەكولوگيانىڭ بۇزىلىپ جاتقاندىعىنا شاعىمدانعان. سونىمەن قاتار، ولار مەملەكەت باسشىسىنا حات جازىپ، ايماقتا زاڭسىز التىن قازىپ اكەتەتىندەردىڭ ارتقانىن ايتقان-تۇعىن.
ەكولوگيا جانە تابيعي رەسۋرستار مينيسترلىگىنىڭ وكىلى التىن كەنىشىندەگى داۋلى ماسەلەنىڭ زاڭ شەڭبەرىندە عانا شەشىلۋى تيىستىگىن ءمالىم ەتتى.
جەرگىلىكتى تۇرعىنداردىڭ ايتۋىنشا، "التىن شىققان جەردى بەلدەن قازۋعا وقتالعان" كومپانيا وندىرىستە تسيانيد قولدانادى. تۇرعىندار ءتسيانيدتىڭ سۋعا تۇسسە، اۋماقتى تۇتاس ۋلايتىنىن ايتادى. مەتاللۋرگتەر كەرىسىنشە، جاڭا فابريكانىڭ مۇلدەم قاۋىپسىز جانە تابيعاتقا ەشقانداي قاۋىپ توندىرمەيتىنىن العا تارتادى.
شقو ەكولوگيا دەپارتامەنتى اتالعان اۋىلدا التىن فابريكاسىن سالىپ جاتقان «VSAM Production» جشس-نە قاتىستى تەكسەرۋ جۇرگىزدى. سونىڭ ناتيجەسىندە بىرقاتار زاڭبۇزۋشىلىق انىقتالدى.
«تەكسەرۋ جۇمىستارى 3 اپتادان استام ۋاقىتقا سوزىلدى. كاسىپورىننىڭ قورشاعان ورتاعا اسەردى باعالاۋ ناتيجەلەرى بويىنشا مەملەكەتتىك ەكولوگيالىق ساراپتاما قورىتىندىسىنىڭ تالاپتارىن ساقتاماعانى انىقتالدى. سونداي-اق جابدىقتالماعان ۋچاسكەلەردە وندىرىستىك قالدىقتار ساقتالعان. سول قالدىقتارمەن جۇمىس ىستەۋ تالاپتارى بۇزىلعان. جەردىڭ مۇناي ونىمدەرىمەن لاستانۋ فاكتىلەرى دە تىركەلدى»، - دەپ حابارلادى دەپارتامەنتتىڭ ءباسپاسوز قىزمەتى.
ەكولوگتار تەكسەرۋدەن سوڭ 5 اكىمشىلىك ءىس قوزعادى. كومپانياعا 3 ملن تەڭگەگە جۋىق ايىپپۇل سالىندى.
"ادىرنا" ۇلتتىق پورتالى
