پرەمەر-مينيستر ولجاس بەكتەنوۆ ۋكراينا توڭىرەگىندەگى جاعدايعا بايلانىستى پرەزيدەنت بەرگەن تاپسىرمالاردى ورىنداۋ بويىنشا شۇعىل جيىن وتكىزدى، دەپ حابارلايدى “ادىرنا” ۇلتتىق پورتالى.
ولجاس بەكتەنوۆ قورعانىس، ىشكى ىستەر، توتەنشە جاعدايلار، سىرتقى ىستەر، دەنساۋلىق ساقتاۋ، كولىك، ەنەرگەتيكا، ونەركاسىپ جانە قۇرىلىس، ۇلتتىق ەكونوميكا، قارجى مينيسترلىكتەرى باسشىلىعىمەن مەملەكەت باسشىسىنىڭ نەگىزگى اسكەري جانە ازاماتتىق نىساندار قاۋىپسىزدىگىن قامتاماسىز ەتۋ جونىندە شۇعىل شارالار قابىلداۋ تۋرالى تاپسىرمالارىن ورىنداۋ جونىندە جەدەل كەڭەس وتكىزدى.
جيىن بارىسىندا پرەمەر-مينيستر قورعانىس ءمينيسترى رۋسلان جاقسىلىقوۆتىڭ ستراتەگيالىق جانە ينفراقۇرىلىمدىق نىسانداردى قورعاۋدى قامتاماسىز ەتۋ بويىنشا جۇرگىزىلىپ جاتقان جۇمىستار تۋرالى مالىمەتتەرىن تىڭدادى. سونىمەن قاتار مەملەكەتتىك ورگانداردىڭ ءىس-قيمىلدارىن كۇشەيتۋگە باعىتتالعان بىرقاتار مىندەتتەر قويدى. تۇراقتىلىق پەن قوعامدىق ءتارتىپتى ساقتاۋ، كولىك قاتىناسىنىڭ قاۋىپسىزدىگى، دەنساۋلىق ساقتاۋ نىساندارىنىڭ قىزمەتى جانە باسقا دا ماسەلەلەرگە نازار اۋدارىلدى.
«ۋاكىلەتتى قۇرىلىمداردىڭ باسشىلىعىنا پرەزيدەنتتىڭ قاۋىپسىزدىكتى قامتاماسىز ەتۋ جونىندەگى تاپسىرمالارىنىڭ ورىندالۋىن ەرەكشە باقىلاۋدا ۇستاۋ جانە جاعدايدىڭ وزگەرۋى تۋرالى شۇعىل تۇردە بايانداۋ تاپسىرىلدى»، دەلىنگەن حابارلامادا.
ايتا كەتەيىك، رەسەي فەدەراتسياسىنىڭ استراحان وبلىسى مەن قازاقستان رەسپۋبليكاسىنىڭ باتىس قازاقستان وبلىسىنىڭ اۋماعىندا ورنالاسقان «كاپۋستين يار» زىمىران پوليگونى سىناقتار ءۇشىن پايدالانۋدا.
ەسكە سالايىق، بۇعان دەيىن پرەزيدەنت ۋكرايناداعى جاعدايعا قاتىستى ەلدەگى قاۋىپسىزدىكتى قامتاماسىز ەتۋ بويىنشا شارالار قابىلداۋدى تاپسىرعان ەدى.
رەسەي پرەزيدەنتى ۆلاديمير پۋتين دە بۇعان دەيىن ۋكراينامەن ارادا بولىپ جاتقان سوعىسقا قاتىستى شۇعىل مالىمدەمە جاساپ، قاقتىعىس عالامدىق سيپاتقا يە بولعانىن مالىمدەگەن بولاتىن.
