2026 جىل قازاقستاندا تسيفرلاندىرۋ جانە جاساندى ينتەللەكت جىلى بولىپ جاريالاندى. وسى باعىتتاعى ماڭىزدى باستامالاردىڭ ءبىرى – Digital Nauryz پلاتفورماسىنىڭ ىسكە قوسىلۋى. بۇل جوبا ەلدەگى تەحنولوگيالىق وزگەرىستەر مەن تسيفرلىق ترانسفورماتسيانىڭ ايقىن سيمۆولىنا اينالىپ وتىر.
وسى ورايدا وسكەمەندە وتكەن «ۇلى دالا ويىندارى: VR & Drone» كوماندالىق سايىسى – Nauryz Digital اپتالىعىنىڭ ەڭ ەرەكشە ءارى اۋقىمدى شارالارىنىڭ ءبىرى. اتالعان دودادا زاماناۋي تەحنولوگيا مەن ۇلتتىق ويىنداردىڭ رۋحى ۇيلەسىپ، جاستارعا مۇلدە جاڭا فورمات ۇسىنىلدى.
سايىس Oskemen Hub الاڭىندا ءوتتى. وعان شىعىس ءوڭىرىنىڭ IT قاۋىمداستىعىنا بىرىككەن جاستار جينالىپ، كوماندالار اراسىندا تارتىستى باسەكە ءوتتى. قاتىسۋشىلار درون جارىستارى مەن VR-سيمۋلياتورلار ارقىلى ءوز شەبەرلىكتەرىن سىنادى. بۇل جەردە جىلدامدىق، دالدىك جانە كوماندالىق ۇيلەسىم باستى نازاردا بولدى.
جارىس بارىسىندا ءار كوماندا تەك تەحنيكالىق قابىلەتتەرىن عانا ەمەس، لوگيكالىق ويلاۋ، شەشىم قابىلداۋ جانە بىرلەسە جۇمىس ىستەۋ داعدىلارىن دا كورسەتتى. درونداردى باسقارۋ مەن ۆيرتۋالدى ورتادا باعىت تابۋ قاتىسۋشىلار ءۇشىن قىزىقتى ءارى تاجىريبەلىك ماڭىزى زور تاپسىرمالارعا اينالدى.
اتالعان سايىستى Rating, Oskemen Hub جانە شىعىس قازاقستان وبلىسىنىڭ تسيفرلاندىرۋ جانە ارحيۆتەر باسقارماسى بىرلەسىپ ۇيىمداستىردى. ولاردىڭ ايتۋىنشا، مۇنداي جوبالار جاستاردىڭ تەحنولوگياعا قىزىعۋشىلىعىن ارتتىرىپ قانا قويماي، ولاردى جاڭا باعىتتارعا جەتەلەيدى.
جوبا مەنەدجەرى اندرەي وحوتەنكو درون تەحنولوگياسىنىڭ مۇمكىندىگىنە ەرەكشە توقتالدى.
«دروندار بۇگىندە 10 جىلدان استام ۋاقىتتان بەرى كەڭ قولدانىستا بار. بىراق ولاردى پايدالانۋ باعىتتارى ءالى دە تولىق اشىلعان جوق. قازىر جاستار ءتۇرلى ويىندار ارقىلى قيالىن دامىتىپ، ءتىپتى ءبىز ويلاماعان جاڭا مۇمكىندىكتەردى تاۋىپ جاتىر. نەگىزى، درونداردى قولدانۋعا شەكتەۋ جوق – ولاردى كەز كەلگەن سالادا پايدالانۋعا بولادى. تەك ەڭ باستىسى – زاڭدى ساقتاۋ قاجەت. ويتكەنى شاعىن درون بولسىن، نەمەسە ۇلكەن ۇشاق بولسىن، زاڭ الدىندا ايىرماشىلىق جوق. باسقاشا ايتقاندا، دروندى باسقارۋ دا اۆياتسيا تالاپتارىنا ساي رەتتەلەدى»، – دەدى مەنەدجەر.
ايتا كەتەيىك، بۇل شارا Nauryz Digital اپتالىعى اياسىندا ۇيىمداستىرىلدى. اپتا بويى وڭىردە IT سالاسىنا قاتىستى بىرقاتار ءىس-شارا ءوتتى. اتاپ ايتقاندا، حاكاتون ۇيىمداستىرىلىپ، جاستار ءوز جوبالارىن تانىستىردى. قورىتىندى كەزەڭ – Hackathon Pitch Day بارىسىندا مەكتەپ وقۋشىلارى ۇزدىك يدەيالارىن قورعاپ، قارجىلاي سىيلىقتارعا يە بولدى.
سونىمەن قاتار، تسيفرلىق باعىتتاعى ايەلدەر فورۋمى ءوتىپ، تەحنولوگيا سالاسىنداعى ايەلدەردىڭ ءرولى مەن مۇمكىندىكتەرى تالقىلاندى.
ءبىلىم بەرۋ باعىتى دا نازاردان تىس قالمادى. جاساندى ينتەللەكت بويىنشا 35 مۇعالىم ارنايى وقىتۋدان ءوتىپ، جاڭا تەحنولوگيالاردى وقۋ پروتسەسىنە ەنگىزۋ جولدارىن مەڭگەردى.
بالالارعا ارنالعان «AI Lab ناۋرىز» جانە «Drone Lab ناۋرىز» جوبالارى جۇزەگە اسىرىلىپ، بالالار ءۇيىنىڭ تاربيەلەنۋشىلەرىنە دروندى باسقارۋ، ونى قاۋىپسىز ءارى ءتيىمدى قولدانۋ تاسىلدەرى ۇيرەتىلدى.
جالپى، Nauryz Digital اپتالىعى وڭىردەگى IT قاۋىمداستىقتىڭ باسىن قوسىپ، جاستارعا جاڭا مۇمكىندىكتەر اشقان ماڭىزدى الاڭ بولدى. زاماناۋي تەحنولوگيا مەن ۇلتتىق قۇندىلىقتاردى ۇشتاستىرعان بۇل باستاما الداعى ۋاقىتتا دا جالعاسىن تابادى دەپ كۇتىلۋدە.
