2026 jyl Qazaqstanda Sifrlandyru jäne jasandy intellekt jyly bolyp jariialandy. Osy baǧyttaǧy maŋyzdy bastamalardyŋ bırı – Digital Nauryz platformasynyŋ ıske qosyluy. Būl joba eldegı tehnologiialyq özgerıster men sifrlyq transformasiianyŋ aiqyn simvolyna ainalyp otyr.
Osy oraida Öskemende ötken «Ūly dala oiyndary: VR & Drone» komandalyq saiysy – Nauryz Digital aptalyǧynyŋ eŋ erekşe ärı auqymdy şaralarynyŋ bırı. Atalǧan dodada zamanaui tehnologiia men ūlttyq oiyndardyŋ ruhy üilesıp, jastarǧa mülde jaŋa format ūsynyldy.
Saiys Oskemen Hub alaŋynda öttı. Oǧan Şyǧys öŋırınıŋ IT qauymdastyǧyna bırıkken jastar jinalyp, komandalar arasynda tartysty bäseke öttı. Qatysuşylar dron jarystary men VR-simuliatorlar arqyly öz şeberlıkterın synady. Būl jerde jyldamdyq, däldık jäne komandalyq üilesım basty nazarda boldy.
Jarys barysynda är komanda tek tehnikalyq qabıletterın ǧana emes, logikalyq oilau, şeşım qabyldau jäne bırlese jūmys ısteu daǧdylaryn da körsettı. Drondardy basqaru men virtualdy ortada baǧyt tabu qatysuşylar üşın qyzyqty ärı täjıribelık maŋyzy zor tapsyrmalarǧa ainaldy.
Atalǧan saiysty Rating, Oskemen Hub jäne Şyǧys Qazaqstan oblysynyŋ sifrlandyru jäne arhivter basqarmasy bırlesıp ūiymdastyrdy. Olardyŋ aituynşa, mūndai jobalar jastardyŋ tehnologiiaǧa qyzyǧuşylyǧyn arttyryp qana qoimai, olardy jaŋa baǧyttarǧa jeteleidı.
Joba menedjerı Andrei Ohotenko dron tehnologiiasynyŋ mümkındıgıne erekşe toqtaldy.
«Drondar bügınde 10 jyldan astam uaqyttan berı keŋ qoldanysta bar. Bıraq olardy paidalanu baǧyttary älı de tolyq aşylǧan joq. Qazır jastar türlı oiyndar arqyly qiialyn damytyp, tıptı bız oilamaǧan jaŋa mümkındıkterdı tauyp jatyr. Negızı, drondardy qoldanuǧa şekteu joq – olardy kez kelgen salada paidalanuǧa bolady. Tek eŋ bastysy – zaŋdy saqtau qajet. Öitkenı şaǧyn dron bolsyn, nemese ülken ūşaq bolsyn, zaŋ aldynda aiyrmaşylyq joq. Basqaşa aitqanda, drondy basqaru da aviasiia talaptaryna sai retteledı», – dedı menedjer.
Aita keteiık, būl şara Nauryz Digital aptalyǧy aiasynda ūiymdastyryldy. Apta boiy öŋırde IT salasyna qatysty bırqatar ıs-şara öttı. Atap aitqanda, hakaton ūiymdastyrylyp, jastar öz jobalaryn tanystyrdy. Qorytyndy kezeŋ – Hackathon Pitch Day barysynda mektep oquşylary üzdık ideialaryn qorǧap, qarjylai syilyqtarǧa ie boldy.
Sonymen qatar, sifrlyq baǧyttaǧy äielder forumy ötıp, tehnologiia salasyndaǧy äielderdıŋ rölı men mümkındıkterı talqylandy.
Bılım beru baǧyty da nazardan tys qalmady. Jasandy intellekt boiynşa 35 mūǧalım arnaiy oqytudan ötıp, jaŋa tehnologiialardy oqu prosesıne engızu joldaryn meŋgerdı.
Balalarǧa arnalǧan «AI Lab Nauryz» jäne «Drone Lab Nauryz» jobalary jüzege asyrylyp, balalar üiınıŋ tärbielenuşılerıne drondy basqaru, ony qauıpsız ärı tiımdı qoldanu täsılderı üiretıldı.
Jalpy, Nauryz Digital aptalyǧy öŋırdegı IT qauymdastyqtyŋ basyn qosyp, jastarǧa jaŋa mümkındıkter aşqan maŋyzdy alaŋ boldy. Zamanaui tehnologiia men ūlttyq qūndylyqtardy ūştastyrǧan būl bastama aldaǧy uaqytta da jalǧasyn tabady dep kütılude.
