14 ناۋرىز كۇنى جەزقازعان قالاسىنداعى «جىگەر» سپورت كەشەنىندە امال مەرەكەسىنە ارنالعان «كورىسۋ — بابالاردىڭ اماناتى» اتتى مەرەكەلىك ءىس-شارا ۇيىمداستىرىلدى. شارانىڭ باستى ماقساتى – قازاق حالقىنىڭ كونە داستۇرلەرىنىڭ ءبىرى سانالاتىن كورىسۋ كۇنىنىڭ ءمان-ماڭىزىن ناسيحاتتاپ، ۇرپاقتار ساباقتاستىعىن دارىپتەۋ.
مەرەكەلىك باعدارلاما قازاقى داستۇرگە نەگىزدەلگەن تەاترلاندىرىلعان كورىنىسپەن باستالدى. ساحنادا قازاق ءۇيدىڭ كورىنىسى قويىلىپ، اۋىل تىرشىلىگى بەينەلەندى. جاستار ۇلكەندەرگە قوس قولداپ امانداسىپ، ء«بىر جاسىڭىزبەن!» دەپ ىزگى تىلەكتەرىن ءبىلدىردى. كورىنىس بارىسىندا كورىسۋ كۇنىنىڭ تاريحى مەن ماعىناسى، اعايىن اراسىنداعى سىيلاستىق پەن تاتۋلىقتىڭ ماڭىزى كورەرمەنگە اسەرلى تۇردە جەتكىزىلدى.
شارا بارىسىندا حالىق اندەرى ورىندالىپ، ۇلتتىق داستۇرلەرگە نەگىزدەلگەن شىعارماشىلىق نومىرلەر ۇسىنىلدى. اسىرەسە «گۇلدەرايىم»، «تۋعان جەر»، «اتامەكەن»، «شاقىرادى كوكتەم» سياقتى اندەر كورەرمەندەرگە كوتەرىڭكى كوڭىل كۇي سىيلادى. سونىمەن قاتار №8 گيمنازيا وقۋشىلارىنىڭ «اسىق» ءبيى كورەرمەننىڭ ىقىلاسىنا بولەندى.
ءىس-شاراعا جينالعان قاۋىمدى ۇلىتاۋ وبلىسى اكىمىنىڭ ورىنباسارى زينا جۇمانازارقىزى اقىلبەكوۆا قۇتتىقتاپ، كورىسۋ كۇنىنىڭ حالىقتى بىرلىككە، تاتۋلىققا ۇندەيتىن ەرەكشە مەرەكە ەكەنىن اتاپ ءوتتى.
مەرەكەلىك باعدارلامانىڭ تاعى ءبىر تاعىلىمدى تۇسى – اقساقالدىڭ باتاسى بولدى. اقساقالدار جاستارعا اق تىلەگىن ارناپ، ەلدىڭ اماندىعى مەن بەرەكەسىن تىلەدى.
شارا بارىسىندا جەزقازعان مۋزىكالىق كوللەدجىنىڭ اكتەرلىك ءبولىم ستۋدەنتتەرى ۇلتتىق ءداستۇردى بەينەلەيتىن كورىنىس ۇسىنىپ، فيلارمونيا انشىلەرى ونەر كورسەتتى.
كورىسۋ كۇنى – قىستان امان شىققان حالىقتىڭ ءبىر-بىرىمەن قاۋىشىپ، وكپە-رەنىشتى ۇمىتىپ، جاڭا جىلدى اق نيەتپەن قارسى الاتىن ەرەكشە مەرەكە. وسىنداي تاعىلىمى مول ءىس-شارالار ۇلتتىق قۇندىلىقتاردى جاڭعىرتىپ، قوعامداعى بىرلىك پەن سىيلاستىقتى نىعايتۋعا ىقپال ەتەدى.
