بۇگىن «ونەر ورتالىعىندا» 28 ماۋسىم – بۇقارالىق اقپارات قۇرالدارى قىزمەتكەرلەرى كۇنىنە ارنالعان «قاناتتى قالام – 2026» سالتاناتتى شاراسى ءوتتى.
وعان وبلىس اكىمى مۇرات ەرگەشباەۆ، وبلىستىق ءماسليحات توراعاسى مۇرات تلەۋمبەتوۆ، زيالى قاۋىم وكىلدەرى مەن سالا ارداگەرلەرى قاتىستى.
ايماق باسشىسى جۋرناليستەردى كاسىبي مەرەكەمەن قۇتتىقتاپ، وڭىردەگى باستامالار مەن جاڭاشىلدىقتاردى حالىققا شىنايى جەتكىزۋدەگى ەڭبەكتەرىن جوعارى باعالادى.
«بۇگىن – مەرزىمدى باسىلىمدار مەن تەلەارنالاردا، اقپاراتتىق اگەنتتىكتەر مەن سايتتاردا قىزمەت ىستەيتىن شىعارماشىلىق وكىلدەرىنىڭ، جۋرناليست جاساعان سيۋجەت پەن جازعان ماقالانىڭ جارىققا شىعۋىنا ەڭبەك سىڭىرەتىن مامانداردىڭ مەرەيلى كۇنى.
مەرەكە قارساڭىندا پرەزيدەنتىمىز قاسىم-جومارت كەمەلۇلى بۇقارالىق اقپارات قۇرالدارى وكىلدەرىن اقوردا تورىندە قابىلداپ، مەملەكەتتىك ناگرادالار تابىستادى.
«Qyzylorda» تەلەارناسىنىڭ ارداگەرى قارابالا جاعىپپار امانجولۇلى «پاراسات» وردەنىمەن ناگرادتالدى. بۇل – سىر جۋرناليستيكاسىنا بەرىلگەن جوعارى باعا.
مەملەكەت باسشىسى: «جۋرناليستەر قاۋىمى – ەڭ الدىمەن قوعامنىڭ جارشىسى ءارى شىنايى جاناشىرى. سىزدەر ءاردايىم حالىقتىڭ كوكەيىندە جۇرگەن وزەكتى ماسەلەلەردى كوتەرىپ، جۇرت مۇددەسىنە ادال قىزمەت ەتىپ كەلەسىزدەر. مەملەكەت سىزدەردىڭ ەرەن ەڭبەكتەرىڭىزدى جوعارى باعالايدى» دەپ ەرەكشە اتاپ ءوتتى.
ۇلتتىق جۋرناليستيكا تاريحىندا سىر ءوڭىرىنىڭ ايرىقشا ورنى بار. عاسىرلىق بەلەسىنە جاقىنداعان باسىلىمدار مەن تاۋەلسىزدىك جىلدارىندا شىققان گازەتتەر – ايماقتىڭ سىر-شەجىرە ساندىعى. وبلىستىڭ تاريحى، الەۋمەتتىك-ەكونوميكالىق دامۋى مەن مادەني-رۋحاني جاڭعىرۋىنىڭ ايقىن دەرەككوزى.
بيىل ايماعىمىزدىڭ جەتەكشى ارناسى – «Qyzylorda» تەلەارناسى 35 جىلدىق مەرەيتويىن اتاپ ءوتتى. تەلەارنا وڭىرىمىزدەگى وقيعالار مەن اقپاراتتاردى جىلدام تاراتىپ، ەل ومىرىندەگى ساياسي ماڭىزدى جاڭالىقتاردىڭ جارشىسى بولىپ كەلەدى.
وتىز جىلعا جۋىق كورەرمەن كوزايىمىنا اينالعان «قوعام تۆ» تەلەارناسىنىڭ دا اقپاراتتىق ساياساتتاعى ورنى ەرەكشە. ايماق تەلەۆيزياسىنىڭ بۇگىنگى بيىگى – وتكەن مەن بۇگىندى جالعاعان ارداگەرلەر ەڭبەگىنىڭ جەمىسى. اقپارات ايدىنىندا ءوز قولتاڭباسىن قالدىرعان مايتالمان مامانداردىڭ تاباندىلىعى مەن قاجىرلى ەڭبەگى تەلەجۋرناليستيكا تاريحىندا لايىقتى ءىزىن قالدىردى.
بۇگىندە تاعىلىمدى جولدان ءوتىپ، ۇستازدارىنىڭ ونەگەسىن جالعاعان ماماندار ەلىمىزگە بەلگىلى ءىرى مەدياحولدينگتەردە، تەلەارنالاردا ەڭبەك ەتىپ، سىر جۋرناليستيكاسى مەكتەبىنىڭ مەرەيىن ۇستەم ەتۋدە.
تاۋەلسىزدىك شەجىرەسىن، سىر ءوڭىرىنىڭ جىلناماسىن، قالىپتاستىرۋداعى قاجىرلى ەڭبەكتەرىڭىز ءۇشىن سىزدەرگە العىسىمدى بىلدىرەمىن!»، – دەدى مۇرات نالقوجاۇلى.
كەشە اقوردا تورىندە وتكەن راسىمدە مەملەكەت باسشىسى جۋرناليستەردى قولداۋعا، الەۋمەتتىك جاعدايىن جاقسارتۋعا باسا ءمان بەرىلەتىنىن ايتقان ەدى. كەيىنگى ءۇش جىلدا استانا قالاسىندا عانا 200 جۋرناليست باسپانالى بولسا، ەندى بۇل باستامانىڭ اۋقىمى كەڭەيدى. پرەزيدەنت تاپسىرماسىمەن بيىل العاش رەت وبلىستاردا جۇمىس ىستەيتىن اقپارات سالاسىنىڭ 66 قىزمەتكەرىنە پاتەر كىلتى بەرىلدى.
ءبىزدىڭ ايماقتا «سىر مەديا» سەرىكتەستىگى ديرەكتورىنىڭ ورىنباسارى ءازيز باتىربەكوۆكە جانە «Qyzylorda» تەلەارناسىنىڭ تەلەوپەراتورى رامازان جۇسىپبەككە پاتەر كىلتتەرى تابىستالدى.
سالتاناتتى راسىمدە اقپارات سالاسىنىڭ دامۋىنا ەلەۋلى ۇلەس قوسقان قالام يەلەرى «پاراسات»، «قۇرمەت» وردەندەرىمەن، «ەرەن ەڭبەگى ءۇشىن» مەدالىمەن، قر مادەنيەت جانە اقپارات مينيسترلىگىنىڭ «ەڭبەك ارداگەرى»، «اقپارات سالاسىنىڭ ۇزدىگى» توسبەلگىلەرىمەن، قۇرمەت گراموتاسىمەن، قازاقستان جۋرناليستەر وداعىنىڭ «قازاقستاننىڭ قۇرمەتتى ءجۋرناليسى» اتاعىمەن، قر پرەمەر-ءمينيسترىنىڭ ءبىرىنشى ورىنباسارىنىڭ، پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترىنىڭ، وبلىس اكىمىنىڭ العىس حاتتارىمەن، قۇرمەت گراموتاسىمەن جانە ءتۇرلى نوميناتسيالارمەن ماراپاتتالدى.
قىزىلوردا وبلىسى اكىمىنىڭ ءباسپاسوز قىزمەتى
