يراننىڭ ساراپشىلار كەڭەسى مودجتابا حامەنەيدى ەلدىڭ جاڭا جوعارعى كوشباسشىسى ەتىپ تاعايىندادى. بۇل تۋرالى BBC جازدى، دەپ حابارلايدى «ادىرنا» ءتىلشىسى.
56 جاستاعى سەيەد مۋدجتابا حامەنەي 1969 جىلعى 8 قىركۇيەكتە يراننىڭ سولتۇستىك-شىعىسىنداعى مەشحەد قالاسىندا دۇنيەگە كەلگەن. ول – ەلدىڭ بۇرىنعى جوعارعى جەتەكشىسى ءالي حامەنەيدىڭ ەكىنشى ۇلى.
مودجتابا حامەنەي يران–يراك سوعىسى كەزىندە بىرنەشە رەت قىسقا مەرزىمدى اسكەري قىزمەت اتقارعان. 1990-جىلداردىڭ سوڭىندا ءدىني ءبىلىم العان. ول ۇزاق ۋاقىت بويى كوپشىلىك نازارىنان تىس بولعان. ەشقاشان مەملەكەتتىك قىزمەت اتقارىپ، كوپشىلىك الدىندا ءسوز سويلەمەگەن جانە سۇحبات بەرمەگەن. اشىق دەرەككوزدەردە ونىڭ از عانا فوتوسۋرەتتەرى مەن بەينەجازبالارى جاريالانعان.
ايتا كەتەيىك، جاڭا باسشىنى تاڭداۋ يران توڭىرەگىندەگى جالعاسىپ جاتقان اسكەري قارسىلاستىق جاعدايىندا ءوتتى. ال يراندى كۇندە زىمىرانمەن تومپەشتەپ جاتقان يزرايل يراننىڭ جاڭا جەتەكشىسى بۇرىنعى جولدى ۇستاناتىن بولسا، "اڭديتىنىن" ايتقان. ۇلكەن حامەنەي يزرايل مەن باتىسقا قارسى ىمىراسىز قاتاڭ باعىت ۇستانعان ساياساتكەر بولدى. ۇلى مودجتابانىڭ دا اكە جولىن جالعاستىراتىنى، قاتاڭ ۇستانىمداعى تۇلعا ەكەنى ايتىلادى. بۇرىن-سوڭدى اتى كوپ اتالمايتىن ونىڭ اقپان ايىندا ەلدەن ميلليارداعان دوللار قارجىنى سىرتقا اۋدارعانى باق نازارىنا شالدىققان. 28 اقپاندا يزرايل مەن اقش-تىڭ يرانعا قارسى اسكەري ارەكەتى باستالعاندا اياتوللا سەيەد ءالي حامەنەيمەن بىرگە قازا تاپقانداردىڭ اراسىندا اۋەلدە مودجتابانىڭ دا بولعانى حابارلانعان. سوڭىنان ونىڭ سوققىدان امان قالعانى، الايدا اكەسى، بالاسى جانە ايەلىنىڭ قازا تاپقانى بەلگىلى بولدى. بۇل وقيعادا ۇلكەن حامەنەيمەن بىرگە ەلدىڭ ونداعان اسكەرباسى ماماندارى قازا تاپتى.
مودجتابا حامەنەيدىڭ اكەسىنىڭ ورنىنا كەلەتىنى الدىن-الا ايتىلعانىمەن، وعان قارسىلىق بىلدىرگەندەر بولعان. الايدا اياتوللا قازا تاپقاننان كەيىن يراندا قۇرىلعان ۋاقىتشا كەڭەس پەن جەتەكشىنى سايلايتىن ساراپشىلار كەڭەسى ونىڭ كانديداتۋراسىنا كەلىسكەنى 8 ناۋرىزدا حابارلانعان. بىراق سوڭعى ساتكە دەيىن اتى-ءجونى حابارلانباعان. سوعىس جاعدايىندا جاڭا جەتەكشىنى سايلاۋ كۇردەلى جاعدايدا وتكەن. ويتكەنى سوڭعى كۇندەرى ساراپشىلار كەڭەسىنىڭ تەگەران مەن قۇم قالاسىنداعى عيماراتتارى زىمىران نىساناسىنا الىنىپ، قيراعان.
