يران وزىنە دوستاس ەلدەرگە ورمۇز بۇعازىنان وتۋگە رۇقسات بەردى. بۇل تۋرالى ەلدىڭ سىرتقى ىستەر ءمينيسترى ابباچ اراكشى ايتتى، دەپ حابارلايدى «ادىرنا» ءتىلشىسى Tasnim اگەنتتىگىنە سىلتەمە جاساپ.
ء«بىز ورمۇز بۇعازى ارقىلى ءوزىمىز دوستىق قاتىناستا دەپ سانايتىن بىرقاتار ەلگە عانا وتۋگە رۇقسات بەردىك. ماسەلەن، رەسەي، ءۇندىستان، يراك، قىتاي جانە پاكىستان. قارسىلاستارىمىزعا بۇل بۇعازدى پايدالانۋعا مۇمكىندىك بەرۋدىڭ ءمانى جوق»، — دەدى ول.
يران بيلىگىنىڭ بۇل شەشىمى ايماقتاعى جاھاندىق تەڭىز قاتىناسىن ءىس جۇزىندە ەكى لاگەرگە ءبولىپ، اقش پەن ونىڭ وداقتاستارىنا ەنەرگيا رەسۋرستارىن تاسىمالداۋدىڭ ەڭ قىسقا جولىن پايدالانۋعا مۇمكىندىك بەرمەيدى. تەگەران بۇعازدى باقىلاۋ ءوزىنىڭ ەگەمەن قۇقىعى ەكەنىن جانە بۇل قۇقىق ۇلتتىق مۇددەلەردى قورعاۋ ءۇشىن پايدالانىلاتىنىن اتاپ ءوتتى.
بۇعان دەيىن اق ءۇيدىڭ ءباسپاسوز حاتشىسى كارولين لەۆيتت امەريكالىق «ەپيكالىق قاھار» اسكەري وپەراتسياسىن «ايقىن اسكەري جەڭىس» دەپ اتاپ، ۆاشينگتون نەگىزگى ماقساتتارىنا جەتۋگە جاقىنداعانىن مالىمدەگەن بولاتىن. دونالد ترامپ اكىمشىلىگىنىڭ 15 تارماقتان تۇراتىن جوسپارىندا ورمۇز بۇعازىن حالىقارالىق كەمە قاتىناسىنا تولىق اشۋ جانە يراننىڭ سۋ جولدارىن قىسىم قۇرالى رەتىندە پايدالانۋدان باس تارتۋى نەگىزگى تالاپتاردىڭ ءبىرى بولىپ قالا بەرەدى. الايدا تەگەران ءوز كەزەگىندەگى 5 تارماقتان تۇراتىن ۋلتيماتۋمىندا بۇعازدى باقىلاۋدىڭ ايرىقشا قۇقىعىن قاۋىپسىزدىكتىڭ باستى كەپىلى رەتىندە مويىنداۋدى تالاپ ەتىپ وتىر.
