شىمكەنت قالاسىندا جاڭا كونستيتۋتسيانى قولداۋعا ارنالعان ء«بىز حالىقتىق كونستيتۋتسيانى قولدايمىز» اتتى اۋقىمدى سپورتتىق-مادەني ءىس-شارا ۇيىمداستىرىلدى. ورتالىق ستاديوندا وتكەن كەشكە شامامەن 20 مىڭ ادام جينالدى.
ءىس-شارانىڭ باستى ماقساتى – تۇرعىنداردى 15 ناۋرىزدا وتەتىن رەسپۋبليكالىق رەفەرەندۋمعا قاتىسۋعا شاقىرىپ، جاڭا كونستيتۋتسيانىڭ ءمان-ماڭىزى مەن مازمۇنىن ءتۇسىندىرۋ.
ۇيىمداستىرۋشىلاردىڭ ايتۋىنشا، جاڭا كونستيتۋتسيا ەلدىڭ دەموكراتيالىق نەگىزدەرىن نىعايتۋعا، ازاماتتاردىڭ قۇقىقتارى مەن بوستاندىقتارىن قورعاۋ تەتىكتەرىن كۇشەيتۋگە باعىتتالعان. قۇجاتتا «ادىلەتتى قازاقستان» جانە «زاڭ مەن ءتارتىپ» قاعيداتتارىن دامىتۋعا باسىمدىق بەرىلگەن.
ءىس-شاراعا شىمكەنت قالاسىنىڭ اكىمى عابيت سىزدىقبەكوۆ، «Integra Construction KZ» كومپانياسىنىڭ مەنشىك يەسى شاحمۇرات مۋتاليپ قاتىستى.
قالا اكىمى عابيت سىزدىقبەكوۆ جينالعان قاۋىمدى پرەمەر-ليگانىڭ جاڭا ماۋسىمىنىڭ باستالۋىمەن قۇتتىقتاپ، جاڭا كونستيتۋتسيانىڭ ەلدىڭ ساياسي جۇيەسىن جاڭعىرتىپ، ازاماتتاردىڭ قۇقىقتارى مەن مۇمكىندىكتەرىن كەڭەيتەتىن ماڭىزدى قۇجات ەكەنىن اتاپ ءوتتى. سونىمەن قاتار ول تۇرعىنداردى 15 ناۋرىزدا وتەتىن رەسپۋبليكالىق رەفەرەندۋمعا بەلسەندى قاتىسۋعا شاقىردى.
«ەلىمىزدە 15 ناۋرىز كۇنى جاڭا كونستيتۋتسيانى قابىلداۋ بويىنشا رەسپۋبليكالىق رەفەرەندۋم وتەدى. جاڭا اتا زاڭ – مەملەكەتىمىزدىڭ الداعى دامۋىنا باعىت-باعدار بەرەتىن باستى قۇجات. ەلدىڭ ەرتەڭى ارقايسىمىزدىڭ ازاماتتىق ۇستانىمىمىزعا بايلانىستى. سوندىقتان بۇل ىسكە جاۋاپكەرشىلىكپەن قاراۋعا شاقىرامىن»، – دەدى قالا اكىمى.
ءىس-شارا اياسىندا قازاقستاندىق ەسترادا جۇلدىزدارىنىڭ قاتىسۋىمەن كونتسەرتتىك باعدارلاما ۇيىمداستىرىلدى. ولاردىڭ قاتارىندا قايرات نۇرتاس، Shiza جانە «الاتاۋ سەرىلەرى» توبى بار.
سونىمەن قاتار اتالعان ءىس-شاراعا قوعامنىڭ ءار سالاسىنداعى تانىمال ازاماتتار بەلسەنى قاتىسىپ، جاڭا كونستيتۋتسيانى قولداۋعا قاتىستى پىكىر ءبىلدىردى. ولاردىڭ قاتارىندا سپورت جۇلدىزدارى ايبەك پەن نۇربەك ورالباي، ماحمۇت جانە تورەحان سابىرحاندار، ارمان وسپانوۆ، ايتىسكەر اقىن نۇرلان ەسەنقۇلوۆ، «ميلليون» جايدارمان كومانداسىنىڭ مۇشەسى قانات تاسحان جانە باسقا دا تۇلعالار بار.
«ميلليون» جايدارمان كومانداسىنىڭ مۇشەسى قانات تاسحان جاڭا كونستيتۋتسيانىڭ ەلدىڭ بولاشاعىنا باعىت بەرەتىن ماڭىزدى قۇجات ەكەنىن اتاپ ءوتتى.
«جاڭا كونستيتۋتسيا – ەلىمىزدىڭ دامۋىنا باعىت بەرەتىن ماڭىزدى قۇجات. وندا ادىلدىك پەن زاڭ ۇستەمدىگىن نىعايتۋعا باعىتتالعان وزگەرىستەر بار. سوندىقتان بارشاڭىزدى 15 ناۋرىزدا وتەتىن رەفەرەندۋمعا قاتىسىپ، جاڭا كونستيتۋتسيانى قولداۋعا شاقىرامىن»، – دەدى قانات تاسحان.
ايتىسكەر اقىن نۇرلان ەسەنقۇلوۆ تا جاڭا كونستيتۋتسيا قوعامداعى تۇراقتىلىق پەن ادىلدىكتى نىعايتۋعا قىزمەت ەتەتىنىن ايتىپ، ازاماتتاردى رەفەرەندۋمعا بەلسەندى قاتىسۋعا شاقىردى.
«ەلىمىزدىڭ دامۋى مەن قوعامداعى بىرلىكتىڭ نىعايۋى ءار ازاماتتىڭ بەلسەندىلىگىنە بايلانىستى. جاڭا كونستيتۋتسيا وسى باعىتتاعى ماڭىزدى قادام دەپ ويلايمىن»، – دەدى نۇرلان ەسەنقۇلوۆ.
«ورداباسى» فۋتبول كلۋبىنىڭ قاقپاشىسى بەكحان شايزادا دا جاڭا كونستيتۋتسيا ەلدىڭ تۇراقتى دامۋىنا نەگىز بولاتىنىن اتاپ ءوتتى.
«جانكۇيەرلەردىڭ قولداۋى بىزگە ارقاشان ۇلكەن كۇش بەرەدى. ەلدىڭ دامۋىنا باعىتتالعان باستامالاردى قولداۋ دا ماڭىزدى. جاڭا كونستيتۋتسيا قازاقستاننىڭ بولاشاعىنا قىزمەت ەتەدى دەپ سەنەمىن»، – دەدى بەكحان شايزادا.
ءىس-شارا بارىسىندا جانكۇيەرلەر ءۇشىن ءتۇرلى ويىن-ساۋىق باعدارلامالارى ۇيىمداستىرىلىپ، ينتەراكتيۆتى ويىندار وتكىزىلدى. ۇتىس ويىندارىنىڭ جەڭىمپازدارىنا ۇيالى تەلەفوندار مەن PlayStation ويىن كونسولى تابىستالدى. كەشتىڭ باستى جۇلدەسى رەتىندە اۆتوكولىك ويناتىلدى. كەش سوڭىندا ستاديون اۋماعىندا فەيەرۆەرك پەن لازەرلىك شوۋ ۇيىمداستىرىلدى.
