فوتو جي كومەگىمەن جاسالدى
شىمكەنت اۋەجايىندا رەيسكە كەشىگىپ قالعان استانانىڭ ەكى تۇرعىنى جانجال شىعارعان، دەپ حابارلايدى “ادىرنا” ءتىلشىسى.
سوت ولاردىڭ ارقايسىسىن بەس تاۋلىككە اكىمشىلىك قاماۋعا الدى.
پوليتسيانىڭ مالىمەتىنشە، 28 جانە 32 جاستاعى ەر ادامدار ۇشاققا ۋاقىتىندا ۇلگەرمەگەننەن كەيىن اۋەجاي تەرمينالىندا قاتتى نارازىلىق ءبىلدىرىپ، بالاعات سوزدەر ايتقان. اۋە كومپانياسىنىڭ وكىلدەرى وقيعا بويىنشا اكت جاساپ، كولىكتەگى پوليتسياعا حابارلاعان.
تەكسەرۋ بارىسىندا ەكى جولاۋشىنىڭ دا ماس كۇيىندە بولعانى انىقتالدى. ولار پوليتسيا بولىمىنە جەتكىزىلىپ، قوعامدىق ورىندا ماس كۇيىندە جۇرگەنى جانە ۇساق بۇزاقىلىق جاساعانى ءۇشىن اكىمشىلىك جاۋاپكەرشىلىككە تارتىلدى.
سوت شەشىمىمەن ەكى ەر ادامعا دا بەس تاۋلىكتەن اكىمشىلىك قاماۋ جازاسى تاعايىندالدى.
كولىكتەگى پوليتسيا دەپارتامەنتى اۋەجايلار مەن وزگە دە كولىك نىساندارىندا قوعامدىق ءتارتىپتى بۇزۋ زاڭعا سايكەس قاتاڭ تۇردە توقتاتىلاتىنىن ەسكە سالدى.
