قازاقستان تاياۋ شىعىسقا اسكەري كونتينگەنت جىبەرمەيدى. بۇل تۋرالى سىرتقى ىستەر مينيسترلىگىنىڭ رەسمي وكىلى ەرلان جەتىباەۆ ايتتى، دەپ حابارلايدى «ادىرنا» ءتىلشىسى.
ول حالىقتى رەسمي دەرەككوزدەرگە عانا سەنۋگە شاقىردى.
«باق-تا اسكەري كونتينگەنت جىبەرىلەدى دەگەن ماسەلە دە تالقىلانىپ جاتىر. وسىعان بايلانىستى تەك رەسمي اقپارات كوزدەرىنە سۇيەنۋگە شاقىرامىز. مەملەكەت باسشىسى ءوز سوزىندە قازاقستاننىڭ حالىقارالىق تۇراقتاندىرۋ كۇشتەرىن دالالىق گوسپيتالى بار مەديتسينالىق بولىمشەلەردى، سونداي-اق ازاماتتىق-اسكەري ۇيلەستىرۋ ورتالىعىنا باقىلاۋشىلاردى جىبەرۋ ارقىلى قولداۋعا دايىن ەكەنىن ايتتى. ياعني، اڭگىمە تەك وپەراتسيانىڭ گۋمانيتارلىق كومەك تۋرالى بولىپ وتىر»، – دەدى جەتىباەۆ.
سونداي-اق مينيسترلىك وكىلى قازاقستاننىڭ بەيبىتشىلىك كەڭەسىنە ەشقانداي قارجىلىق جارناسىز قوسىلعانىن جەتكىزدى.
«قازاقستان بەيبىتشىلىك كەڭەسىنە ەشقانداي قارجىلىق جارناسىز قوسىلدى. جارعىدا كورسەتىلگەن 1 ملرد اقش دوللارى كولەمىندەگى ەرىكتى جارنا مۇشەلىك شارتى بولىپ سانالمايدى. بۇل – ءاربىر قاتىسۋشىنىڭ دەربەس قۇقىعى»،- دەپ ءتۇسىندىردى ول.
