ۇلىتاۋ وبلىسىندا رەسپۋبليكالىق رەفەرەندۋم وتكىزۋگە ارنالعان 127 ۋچاسكەلىك كوميسسيا تولىق دايىن. ۋچاسكەلەر قاجەتتى ماتەريالدىق-تەحنيكالىق قۇرالدارمەن قامتاماسىز ەتىلىپ، داۋىس بەرۋدى ۇيىمداستىرۋعا بارلىق جاعداي جاسالعان.
رەفەرەندۋمدى وتكىزۋ ءۇشىن وبلىستا 6 اۋماقتىق جانە 127 ۋچاسكەلىك كوميسسيا جۇمىس ىستەيدى. كوميسسيالاردىڭ قۇرامىندا بارلىعى 845 ادام بار.
داۋىس بەرۋ ساعات 07:00-دەن 20:00-گە دەيىن وتەدى. ال جايرەم كەنتىندەگى 6 ۋچاسكەدە تاۋ-كەن بايىتۋ كومبيناتىنىڭ اۋىسىمدىق جۇمىس كەستەسىنە بايلانىستى داۋىس بەرۋ ساعات 06:00-دەن 20:00-گە دەيىن ۇيىمداستىرىلادى.
ۇلىتاۋ وبلىسى بويىنشا داۋىس بەرۋ تىزىمىنە 136 447 ازامات ەنگىزىلگەن.
رەفەرەندۋم كۇنى مۇگەدەكتىگى بار ازاماتتاردىڭ داۋىس بەرۋىنە قولايلى جاعداي جاسالعان. بارلىق ۋچاسكەلەر پاندۋستارمەن جانە ارنايى تۇتقالارمەن جابدىقتالعان. سونداي-اق كرەسلو-اربا پايدالاناتىن ازاماتتارعا ۆولونتەرلار كومەگى كورسەتىلىپ، وبلىس بويىنشا 7 ينۆاتاكسي قىزمەتى جۇمىس ىستەيتىن بولادى.
