بۇگىن، 6 شىلدە — بۇرىنعى پرەزيدەنت نۇرسۇلتان نازارباەۆتىڭ تۋعان كۇنى. قارت ساياساتكەر بيىل 84-كە تولدى، دەپ حابارلايدى “ادىرنا” ۇلتتىق پورتالى.
نازارباەۆ 1940 جىلى 6 شىلدەدە ىلە الاتاۋىنىڭ باۋرايىنداعى ۇشقوڭىر جايلاۋىندا ءابىش پەن ءالجان نازارباەۆتار شاڭىراعىندا دۇنيەگە كەلگەن.
1989–1991 جىلدارى قازاقستان كومپارتياسى ورتالىق كوميتەتىنىڭ ءبىرىنشى حاتشىسى بولعان نازارباەۆ، 1989–1992 جىلدارى كسرو حالىقتىق دەپۋتاتى، كەيىن سول ۋاقىتتا 1990 جىلعى اقپان-ساۋىردە قازاق كسر جوعارعى كەڭەسىنىڭ توراعاسى اتاندى.
1990 جىلعى 24 ساۋىردە قازاق كسر جوعارعى كەڭەسىنىڭ سەسسياسىندا قازاق كسر پرەزيدەنتى لاۋازىمىنا تاعايىندالدى. قازاقستاندى وتىز جىلعا جۋىق باسقارعان نۇرسۇلتان نازارباەۆ 2019 جىلعى 19 ناۋرىزدا ەل پرەزيدەنتى قىزمەتىنەن كەتەتىنىن مالىمدەدى.
نۇرسۇلتان نازارباەۆ قازاقستان پرەزيدەنتى وكىلەتىن 2019 جىلعى ناۋرىزدا قاسىم-جومارت توقاەۆقا تابىستاپ بەرگەنىمەن، بيلىكتى قاۋىپسىزدىك كەڭەسى ارقىلى 2022 جىلدىڭ قاڭتارىنا دەيىن قولىندا ۇستادى.
تاقتان كەتكەن سوڭ نازارباەۆتىڭ ەسىمى تاريح بەتتەرىنەن وشىرىلە باستادى.
كەيىن 2022 جىلعى 5 قاڭتاردا پرەزيدەنت توقاەۆ قاۋىپسىزدىك كەڭەسىنىڭ توراعاسى قىزمەتىن قولىنا العانىن مالىمدەدى. 2022 جىلعى 28 قاڭتاردا "نۇر وتان" پارتياسىنىڭ توراعالىعىنان كەتتى. 2022 جىلعى 2 ناۋرىزدا نازارباەۆتىڭ ەسىمىنىڭ العاشقى بۋىنى جازىلعان "نۇر وتان" پارتياسى "امانات" بولىپ وزگەردى. 2022 جىلعى 5 ماۋسىمدا وتكەن رەفەرەندۋمدا كونستيتۋتسيادان "تۇڭعىش پرەزيدەنت – ەلباسى" تۋرالى باپتار جويىلدى. 2022 جىلعى 17 قىركۇيەكتە مەملەكەت استاناسىنىڭ نۇر-سۇلتان اتاۋى قايتادان استانا بولىپ وزگەردى. 2023 جىلعى 1 قاڭتاردا نۇرسۇلتان نازارباەۆ ءومىر بويعى مۇشەسى بولادى دەپ سانالعان كونستيتۋتسيالىق كەڭەس قىزمەتىن توقتاتتى. 2023 جىلعى 12 قاڭتاردا ەكس-پرەزيدەنت "قۇرمەتتى سەناتور" اتاعىنان ايىرىلدى. 2023 جىلعى 15 اقپاندا "تۇڭعىش پرەزيدەنت - ەلباسى" تۋرالى زاڭنىڭ كۇشى جويىلدى. 2023 جىلعى 12 شىلدەدە پرەزيدەنت توقاەۆ قىلمىستىق كودەكستەن "ەلباسى" تۋرالى باپتى الىپ تاستادى. باسقا زاڭدار مەن قۇقىقتىق اكتىلەردەن دە "تۇڭعىش پرەزيدەنت – ەلباسى" ءسوزى الىندى. 2023 جىلعى 24 شىلدەدەگى پرەزيدەنت جارلىعىمەن مەملەكەتتىك كۇزەت قىزمەتىنەن نازارباەۆتىڭ قاۋىپسىزدىگىن قامتاماسىز ەتۋ مىندەتى الىنىپ تاستالدى. 2023 جىلعى 16 قاراشادا توقاەۆ نازارباەۆ توراعا بولعان "سامۇرىق-قازىنا" ءال-اۋقات قورىن باسقارۋ كەڭەسىن تاراتۋدى كوزدەيتىن زاڭعا قول قويدى.
نۇرسۇلتان نازارباەۆ پرەزيدەنتتىكتەن كەتكەننەن كەيىن 2021 جىلى “شتريحي ك پورترەتۋ” دەرەكتى فيلمىنە سۇحبات بەرگەن بولاتىن. وندا ول ءوزىنىڭ ءومىر جولى، پرينتسيپتەرى مەن كوزقاراسى جايلى سىر شەرتكەن:
“ساتقىندىق ماعان ۇنامايدى. ساتقىنداردىڭ ءومىرى جاقسىلىقپەن اياقتالمايدى. ولاردىڭ جۇرەگىندە "قۇرت" تۇرادى سول "قۇرت" ولاردى ىشتەي جەگىدەي جەيدى. ولار وزدەرىنىڭ دۇرىس جاساماعانىن، ءوز حالقىنا، مەملەكەتىنە قارسى شىققانىن بىلەدى. سوندىقتان مەن ەش ۋايىمدامايمىن. ساتقىندار وزدەرىنە ءتيىستىنى الادى”، – دەدى ول سۇحباتتا.
ال قازىر تۋعان كۇن يەسىنىڭ قايدا ەكەنى بەلگىسىز. سوڭعى رەت ەكس-پرەزيدەنت ءباا استاناسى - دۋبايدا ورنالاسقان نيۋ-يورك ابۋ-دابي ۋنيۆەرسيتەتىندە جۇرگەنى ايتىلعان ەدى.
