يران سىرتقى ىستەر مينيسترلىگى اقش-تىڭ يرانعا تيەسىلى تانكەرلەرگە جاساعان سوققىسىن ايىپتادى. Report اگەنتتىگىنىڭ IRIB-كە سىلتەمە جاساپ حابارلاۋىنشا، بۇل تۋرالى يران ءسىم مالىمدەمەسىندە ايتىلعان، دەپ حابارلايدى "ادىرنا".
«اقش-تىڭ يرانعا قارسى اسكەري اگرەسسياسىنىڭ جالعاسى رەتىندە، تەڭىز بلوكاداسى مەن ەكونوميكالىق سوعىس اياسىندا جاسالعان بۇل زاڭسىز ارەكەتتەر بۇۇ جارعىسىنىڭ 2-بابىنىڭ 4-تارماعىن ورەسكەل زاڭبۇزۋ، اسكەري قىلمىس جانە حالىقارالىق بەيبىتشىلىككە، سونداي-اق ساۋدا كەمەلەرىنىڭ قاۋىپسىزدىگىنە اشىق قاتەر بولىپ تابىلادى»، — دەلىنگەن يران ءسىم مالىمدەمەسىندە.
مالىمدەمەدە يران ءوزىنىڭ ەگەمەندىگى مەن ۇلتتىق مۇددەلەرىن قورعايتىنى دا اتاپ وتىلگەن.
«اقش-تىڭ ايماقتاعى اگرەسسيالىق جانە ينتەرۆەنتسيالىق ارەكەتتەرىن جالعاستىرۋى سالدارىنان تۋىندايتىن بارلىق جاۋاپكەرشىلىك اقش-قا، ونىڭ وداقتاستارى مەن سەرىكتەستەرىنە جۇكتەلەدى»، – دەپ مالىمدەدى يران ءسىم.
ەسكە سالا كەتەيىك، اقش قارۋلى كۇشتەرىنىڭ ورتالىق قولباسشىلىعى (CENTCOM) يراننىڭ ءۇش تانكەرىنە سوققى بەرگەن. اقش تاراپى بۇل كەمەلەردى يران يسلام رەۆوليۋتسياسى ساقشىلار كورپۋسىنىڭ (يرسك) وڭىردەگى امەريكالىق كەمەلەرگە شابۋىل جاساۋ ارەكەتىمەن بايلانىستىرعان.
وسىدان كەيىن يران اسكەرى ورمۋز بۇعازىندا بەلگىلەنگەن ەرەجەلەردى بۇزعان كەمەلەرگە دە شابۋىل جاساعان.
