يزرايل قورعانىس كۇشتەرى (تساحال) 28 اقپان كۇنى تاڭەرتەڭ تەگەرانعا جاسالعان شابۋىلدان 7 جوعارى لاۋازىمدى يران اسكەري قىزمەتكەرى مەن شەنەۋنىگىنىڭ قازا تاپقانىن مالىمدەدى، دەپ حابارلايدى «ادىرنا» ءتىلشىسى.
اسكەريلەردىڭ مالىمەتىنشە، ءيزرايلدىڭ يرانعا العاشقى سوققىلارى اسكەري بارلاۋ باسقارماسى تەگەراندا يران قاۋىپسىزدىك قىزمەتىنىڭ جوعارعى باسشىلارى جينالعان ەكى نىساندى انىقتاعاننان كەيىن كەنەتتەن جاسالعان شابۋىلمەن باستالعان.
قازا تاپقانداردىڭ اراسىندا تومەندەگىدەي تۇلعالار بار:
موحامماد پاكپۋر – كسير كومانديرى. تساحال مالىمەتىنشە، ول ء«يزرايلدى جويۋ جوسپارىن» باسقارعان، سونىمەن قاتار يزرايل اۋماعىنا زىمىران جانە درون شابۋىلدارىنا جاۋاپتى بولعان. اسكەريلەردىڭ ايتۋىنشا، وتكەن ايداعى يراندىق نارازىلىقتاردى قاتال باسۋعا دا تىكەلەي قاتىسقان.
سالاح اسادي – يران قارۋلى كۇشتەرىنىڭ اسكەري شتابى بارلاۋ ءبولىمىنىڭ باستىعى. تساحال دەرەگىنشە، ءيزرايلدى جويۋ جوسپارىنا قاتىسى بار.
ءالي شامحاني – كسير تەڭىز كۇشتەرىنىڭ ەكس-كومانديرى جانە يران ارمياسىنىڭ باستى قولباسشىسى، يراننىڭ جوعارعى جەتەكشىسى اياتوللا ءالي حامەنەيدىڭ ەڭ سەنىمدى كەڭەسشىلەرىنىڭ ءبىرى.
موحامماد شيرازي – 1989 جىلدان بەرى حامەنەيدىڭ اسكەري بيۋروسىن باسقارعان. يزرايل اسكەرى ونى «يران تەرروريستىك رەجيمىن باسقارۋداعى نەگىزگى تۇلعا» دەپ اتايدى.
ازيز ناسيرزادە – يران قورعانىس ءمينيسترى، يران اۋە كۇشتەرىنىڭ ەكس-باستى قولباسشىسى. تساحال مالىمەتىنشە، ول ۇزاق قاشىقتىقتاعى بالليستيكالىق زىمىران ءوندىرىسى، پرويراندىق توپتارعا قارۋ-جاراق جەتكىزۋ، سونداي-اق يزرايل يادرولىق، بيولوگيالىق جانە حيميالىق قارۋ جاساۋدا ايىپتايتىن SPND قۇرىلىمىن باسقارعان.
حوسسەين دجابال-امەليان – SPND باسشىسى. ول يادرولىق، بيولوگيالىق جانە حيميالىق سالالارداعى وزىق تەحنولوگيالار مەن قارۋ-جاراقتى ازىرلەۋگە جاۋاپتى بولعان.
رەزا موزافاري-نيا – SPND بۇرىنعى باسشىسى. يزرايل اسكەرى ونى «يادرولىق قارۋ جاساۋعا باعىتتالعان ارەكەتتەردى ىلگەرىلەتكەن» دەپ مالىمدەدى.
ايتا كەتەيىك، حامەنەي، پاكپۋر جانە ءشامحانيدىڭ قازاسىنان كەيىن ۋاقىتشا يراندى ەل پرەزيدەنتى ماسۋد پەزەشكيان، سوت جۇيەسىنىڭ باسشىسى جانە كونستيتۋتسيا ساقشىلارى كەڭەسىنىڭ وكىلى باسقاراتىن بولادى. جوعارعى جەتەكشىنىڭ جاڭا مۇراگەرىن تاعايىنداۋ مىندەتى «جەتەكشىلىك ماسەلەلەرى بويىنشا ساراپشىلار اسسامبلەياسىنا» تيەسىلى. بۇل ورگان 88 ءدىني قىزمەتكەردەن تۇرادى.
