اتىراۋ گارنيزونىندا ورنالاسقان اسكەري بولىمدەردىڭ بىرىندە جوسپارلى دالالىق اتىس جاتتىعۋلارى كەزىندە مەرزىمدى اسكەري قىزمەتشى قازا تاپتى. بۇل تۋرالى گارنيزوننىڭ ءباسپاسوز قىزمەتى مالىمدەدى، دەپ حابارلايدى "ادىرنا".
رەسمي مالىمەتكە سايكەس، وقيعا 12 ناۋرىز كۇنى بولعان. جاتتىعۋ بارىسىندا مەرزىمدى اسكەري قىزمەتشى وق جاراقاتىن العان. الدىن الا اقپارات بويىنشا، وقيعا قارۋمەن ابايسىز جۇمىس ىستەۋدىڭ سالدارىنان بولۋى مۇمكىن.
جاراقات العان سارباز دەرەۋ مەديتسينالىق مەكەمەگە جەتكىزىلىپ، دارىگەرلەر تاراپىنان قاجەتتى كومەك كورسەتىلگەن. الايدا ونىڭ ءومىرىن ساقتاپ قالۋ مۇمكىن بولماعان.
قازاقستان قارۋلى كۇشتەرى قولباسشىلىعى قازا تاپقان اسكەري قىزمەتشىنىڭ تۋعان-تۋىستارى مەن جاقىندارىنا كوڭىل ايتتى. سونىمەن قاتار مارقۇمنىڭ وتباسىنا قولدانىستاعى زاڭناماعا سايكەس قاجەتتى كومەك پەن قولداۋ كورسەتىلەتىنى حابارلاندى.
وقيعاعا بايلانىستى قازاقستان رەسپۋبليكاسىنىڭ ىشكى ىستەر مينيسترلىگى اسكەري-تەرگەۋ باسقارماسى قىلمىستىق ءىس قوزعادى. قازىرگى ۋاقىتتا وقيعانىڭ بارلىق سەبەپتەرى مەن ءمان-جايىن انىقتاۋ ماقساتىندا سوتقا دەيىنگى تەرگەۋ جۇرگىزىلىپ جاتىر.
قازاقستان رەسپۋبليكاسىنىڭ قورعانىس مينيسترلىگى تاپسىرماسىمەن وقيعا ورنىنا ءمينيستردىڭ ورىنباسارى باستاعان ارنايى كوميسسيا جىبەرىلدى. تەرگەۋ بارىسى قازاقستاننىڭ باس اسكەري پروكۋراتۋراسى باقىلاۋىندا.
