25 قاڭتاردا اقتوبەدە ءۇش اۆتوكولىكتىڭ قاتىسۋىمەن جول اپاتى بولىپ، 4 ادام مەرت بولدى. بۇل تۋرالى وبلىستىق پوليتسيا دەپارتامەنتى ايتتى، دەپ حابارلايدى «ادىرنا» ءتىلشىسى.
قايعىلى وقيعا «اقتوبە-ورىنبور» اۆتوجولىنىڭ قۇرايلى اۋىلىنىڭ ماڭىندا تىركەلگەن. پد مالىمەتىنشە، قازىرگى تاڭدا تەكسەرىس جۇرگىزىلىپ جاتىر.
«الدىن الا مالىمەتتەر بويىنشا، اقتوبە قالاسىنان مارتوك اۋىلىنا باعىت العان «Honda Odyssey» اۆتوكولىگىنىڭ جۇرگىزۋشىسى قارسى جولاققا شىعىپ، قارسى باعىتتا كەلە جاتقان «Hyundai Solaris» اۆتوكولىگىمەن سوقتىعىستى. سوققىدان «Honda Odyssey» باعىتىن وزگەرتىپ، قارسى باعىتتا كەلە جاتقان ۆاز-2110 اۆتوكولىگىمەن سوقتىعىسقان. جول-كولىك وقيعاسى سالدارىنان ۆاز-2110 اۆتوكولىگىنىڭ جۇرگىزۋشىسى مەن ءۇش جولاۋشىسى العان جاراقاتتارىنان وقيعا ورنىندا قازا تاپتى»،-دەلىنگەن حابارلامادا.
«Honda Odyssey» اۆتوكولىگىنىڭ ءبىر جولاۋشىسى جانە ۆاز-2110 اۆتوكولىگىنىڭ ءبىر جولاۋشىسى زارداپ شەككەن، ولارعا مەديتسينالىق كومەك كورسەتىلىپ جاتىر.
«Honda Odyssey» اۆتوكولىگىنىڭ جۇرگىزۋشىسى اقتوبە قالاسىنىڭ ۋاقىتشا ۇستاۋ يزولياتورىنا قامالعان.
