2021 جىلى 10 اي ىشىندە قازاقستاننىڭ شيكىزاتتىق ەمەس تاۋارلار مەن قىزمەتتەر ەكسپورتى 19,9 ملرد دوللاردى قۇرادى. بۇل قازاقستاننىڭ ساۋدا جانە ينتەگراتسيا مينيسترلىگى مالىمدەدى، دەپ حابارلايدى “ادىرنا” ۇلتتىق پورتالى.
وڭدەلگەن ونىمدەر ەكسپورتى وتكەن جىلمەن سالىستىرعاندا 28,3%-عا ارتىپ، 15,9 ملرد دوللاردى قۇرادى. قىزمەتتەر ەكسپورتى 4 ملرد دوللاردى قۇرادى.
ءداستۇرلى تۇردە وڭدەلگەن ونىمدەردىڭ 3 ۇزدىك نارىعىنا مىنالار جاتادى:
- قىتاي (3,7 ملرد دوللار، 2020 جىلدىڭ سايكەس كەزەڭىنەن 0,3%-عا از);
- رەسەي (3,1 ملرد دوللار، 2020 جىلدىڭ سايكەس كەزەڭىنەن 47,7%-عا جوعارى);
- وزبەكستان (1,3 ملرد دوللار، 2020 جىلدىڭ سايكەس كەزەڭىمەن سالىستىرعاندا 59,1%-عا ءوستى).
قازاقستاننىڭ ساۋدا مينيسترلىگى 2021 جىلى العاش رەت پاكىستان، تايلاند، فيليپپين جانە مەكسيكا سياقتى ەلدەرگە ەكسپورتتىق جەتكىزىلىمدەر جاساعانىن تىلگە تيەك ەتتى.
جىل سوڭىندا وڭدەلگەن ءونىم ەكسپورتى 25 ميلليارد دوللارعا جەتەدى دەگەن ۇمىتتە.
”ادىرنا” ۇلتتىق پورتالى
