مەملەكەتتىك كەڭەسشى ەرلان قارين «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» جالپىۇلتتىق كواليتسياسى مۇشەلەرىمەن بىرگە اقتوبە وبلىسىنىڭ جۇرتشىلىعىمەن بىرقاتار كەزدەسۋ وتكىزدى.
مەملەكەتتىك كەڭەسشىمەن بىرگە وڭىرگە جالپىۇلتتىق كواليتسيا مۇشەلەرى – قازاقستان رەسپۋبليكاسى پارلامەنتى ءماجىلىسى توراعاسىنىڭ ورىنباسارى دانيا ەسپاەۆا، ادىلەت ءمينيسترى ەرلان سارسەمباەۆ، پرەزيدەنت تەلەراديو كەشەنىنىڭ ديرەكتورى راۋشان قاجىباەۆا، ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پرورەكتورى ينديرا رىستينا، تەاتر جانە كينو اكتەرى اسىلحان تولەپوۆ، پروديۋسەر ءارى كاسىپكەر الماس جالي، Uni-Q Group مەدياحولدينگىنىڭ باس ديرەكتورى مۇحامەدقالي تاۋان، «ۇلتتىق رۋح» قوعامدىق بىرلەستىگىنىڭ جەتەكشىسى ايات سۇگىرباي باردى.
ساپار اياسىنداعى نەگىزگى ءىس-شارا ءوڭىر اكتيۆىمەن وتكەن كەزدەسۋ بولدى. وعان مىڭنان استام ادام قاتىستى. ولاردىڭ قاتارىندا ءوڭىردىڭ كورنەكتى قوعام قايراتكەرلەرى، ەڭبەك ارداگەرلەرى، ءماسليحات دەپۋتاتتارى، قوعامدىق كەڭەستەردىڭ، ەتنومادەني بىرلەستىكتەردىڭ، ساياسي پارتيالار مەن ۇكىمەتتىك ەمەس ۇيىمداردىڭ مۇشەلەرى، ءبىلىم بەرۋ، دەنساۋلىق ساقتاۋ، مادەنيەت، سپورت، بيزنەس سالالارىنىڭ وكىلدەرى، جاس كوشباسشىلار جانە وزگە دە ازاماتتار بار.
كەزدەسۋ اقتوبە وبلىسىنىڭ اكىمى اسحات شاحاروۆتىڭ بايانداماسىمەن باستالدى.
ءوز كەزەگىندە ەرلان قارين جاڭا كونستيتۋتسيا جوباسىن ازىرلەۋ بارىسىنا جانە ونىڭ ەل بولاشاعى ءۇشىن ستراتەگيالىق ماڭىزىنا جان-جاقتى توقتالدى. ول جاڭا كونستيتۋتسيا ءبىلىم بەرۋ، عىلىم، يننوۆاتسيالار مەن ادام كاپيتالىن دامىتۋ ءىسىن باسىم باعىتتار رەتىندە ايقىنداي وتىرىپ، ەل دامۋىنا تىڭ سەرپىن بەرەتىنىن مالىمدەدى. سونداي-اق جاڭا كونستيتۋتسيا ەلىمىزدەگى بارشا ازاماتتىڭ، بارلىق الەۋمەتتىك جانە كاسىبي توپ وكىلدەرىنىڭ مۇددەسى مەن سۇرانىسىن قامتيتىنىن ەرەكشە اتاپ ءوتتى.
«جاڭا كونستيتۋتسيا جوباسىندا ادام كاپيتالىن، ءبىلىم بەرۋ ءىسىن، عىلىم مەن يننوۆاتسيالاردى دامىتۋ ماسەلەسى نەگىزگى ستراتەگيالىق باسىمدىقتار رەتىندە ايقىندالدى. وسىلايشا، جاڭا كونستيتۋتسيا مەملەكەت دامۋىنا تىڭ سەرپىن بەرەدى. جاڭا كونستيتۋتسيانىڭ ءمانى مەن ماڭىزى – ونىڭ ەلىمىزدەگى بارشا ازاماتتىڭ، بارلىق الەۋمەتتىك جانە كاسىبي توپ وكىلدەرىنىڭ مۇددەسى مەن سۇرانىسىن قامتۋىندا»، – دەدى ەرلان قارين.
پارلامەنت ءماجىلىسى توراعاسىنىڭ ورىنباسارى دانيا ەسپاەۆا ءبىر پالاتالى پارلامەنت – قۇرىلتاي قۇرۋعا قاتىستى ينستيتۋتسيونالدىق وزگەرىستەردى جانە ونىڭ بيلىكتىڭ زاڭ شىعارۋشى تارماعىن نىعايتۋداعى، مەنشىك قۇقىعى مەن ۇلتتىق ەكونوميكا مۇددەسىن قورعاۋداعى ماڭىزىن ءتۇسىندىردى.
ادىلەت ءمينيسترى ەرلان سارسەمباەۆ ازاماتتاردىڭ قۇقىقتارى مەن بوستاندىقتارىنىڭ كەپىلدىگىن كۇشەيتۋ، زاڭ ۇستەمدىگىن قامتاماسىز ەتۋ جانە جاڭا كونستيتۋتسيالىق نورمالاردى تاجىريبە جۇزىندە ىسكە اسىرۋ ماسەلەلەرىنە نازار اۋداردى. سونداي-اق مينيستر ادىلەت جۇيەسىندەگى تاۋەلسىز ادۆوكاتۋرانىڭ ءرولىن نىعايتۋعا توقتالدى.
اقتوبە وبلىسىنىڭ تۋماسى، ەڭبەك ەرى امانعوس تولەۋوۆ جاڭا كونستيتۋتسيا مازمۇنىنىڭ الەۋمەتتىك باعىتى مەن ادامعا نەگىزدەلگەن باعدارىن اتاپ ءوتتى.
تەاتر جانە كينو اكتەرى اسىلحان تولەپوۆ جاڭا كونستيتۋتسيالىق نورمالاردىڭ مادەنيەتتى، شىعارماشىلىق ەركىندىكتى جانە كرەاتيۆتى يندۋستريانى دامىتۋداعى ماڭىزىنا ءمان بەردى.
ساپار اياسىندا «اقتوبە رەلس-ارقالىق زاۋىتى» كاسىپورنىندا تەمىرجول سالاسىنىڭ قىزمەتكەرلەرىمەن كەزدەسۋ ءوتتى. اڭگىمەلەسۋ بارىسىندا ەرلان قارين جاڭا كونستيتۋتسيا مەملەكەتتىك ساياساتتىڭ الەۋمەتتىك باعدارىن كۇشەيتىپ، ازاماتتاردىڭ ەڭبەك قۇقىقتارىن قورعاۋ كەپىلدىكتەرىن بەكىتۋ ارقىلى ەڭبەك ادامىنىڭ مارتەبەسىن ارتتىراتىنىن اتاپ ءوتتى.
كەيىن ق. جۇبانوۆ اتىنداعى اقتوبە وڭىرلىك ۋنيۆەرسيتەتىندە ستۋدەنتتەر قاۋىمىمەن مازمۇندى كەزدەسۋ ۇيىمداستىرىلدى. ەرلان قارين قازاقستان تاريحىنىڭ كوپتومدىق اكادەميالىق جيناعىنىڭ نەگىزگى جاڭاشىلدىقتارىنا توقتالىپ، مەملەكەتتىڭ تاريحي دامۋىنا ءبىرتۇتاس كوزقاراس قالىپتاستىرۋ جولىنداعى وتاندىق عالىمداردىڭ اۋقىمدى ءارى تىڭعىلىقتى ەڭبەگىنە نازار اۋداردى. ول كونستيتۋتسيالىق رەفورما وسى تاريحي ساباقتاستىقتى جالعاستىرا وتىرىپ، مەملەكەتتىلىك قۇندىلىقتارىن بەكىتەتىنىن جانە قازاقستاندى زاماناۋي، ادىلەتتى ءارى پروگرەسسيۆتى مەملەكەت رەتىندە ودان ءارى دامىتۋعا قۇقىقتىق نەگىز قالىپتاستىراتىنىن اتاپ ءوتتى.
سونىمەن قاتار وڭىردەگى كرەاتيۆتى سەكتور وكىلدەرىمەن دە كەزدەسۋ ءوتتى. Aktobe IT Hub الاڭىندا كواليتسيا مۇشەلەرى مادەنيەت سالاسىنىڭ، ءىت-سەكتوردىڭ جانە كرەاتيۆتى يندۋستريا وكىلدەرىمەن جۇزدەستى. تالقىلاۋ بارىسىندا ادام كاپيتالىن دامىتۋ، يننوۆاتسيالاردى قولداۋ جانە جاڭا كونستيتۋتسيادا عىلىم، تەحنولوگيا مەن شىعارماشىلىق ەركىندىك باسىمدىقتارىن بەكىتۋ ماسەلەلەرى قوزعالدى.
ايماققا ساپار بارىسىندا تاعى ءبىر ماڭىزدى نىسان – اقتوبە جەو بولدى. جالپىۇلتتىق كواليتسيا مۇشەلەرى قالا ءومىرىنىڭ تۇراقتىلىعى تىكەلەي وسى ۇجىمنىڭ جۇمىسىنا بايلانىستى ەكەنىن اتاپ ءوتىپ، قىزمەتكەرلەرمەن كەزدەستى.
بارلىق كەزدەسۋلەر بارىسىندا اقتوبە وبلىسىنىڭ تۇرعىندارى جاڭا كونستيتۋتسيا جوباسى قوعامنىڭ ادىلدىك پەن ينستيتۋتسيونالدىق تۇراقتىلىققا دەگەن سۇرانىسىنا جاۋاپ بەرەتىنىن جانە مەملەكەتتى ودان ءارى جاڭعىرتۋعا قاجەتتى بەرىك قۇقىقتىق نەگىز قالىپتاستىراتىنىن ايتتى.
جالپى، وڭىردە وتكىزىلگەن كەزدەسۋلەر جاڭا كونستيتۋتسيا جوباسىنا كەڭ قولداۋ بار ەكەنىن كورسەتتى. سونداي-اق جۇرتشىلىق 2026 جىلعى 15 ناۋرىزدا وتەتىن رەسپۋبليكالىق رەفەرەندۋمعا بەلسەندى قاتىسۋعا جوعارى قىزىعۋشىلىق تانىتىپ وتىرعانىن جەتكىزدى.
جالپىۇلتتىق كواليتسيانىڭ ءباسپاسوز قىزمەتى
سۋرەتتى تۇسىرگەن: ءالي عالىم
دايىنداعان: «AMANAT MEDIA GROUP» جشس
تاپسىرىس بەرۋشى: م.ج. وسپانوۆ
«AMANAT» پارتياسى» قب قاراجاتىنان تولەندى
