الماتىدا ءوتىپ جاتقان III ەۋرازيالىق تاۋ كۋرورتتارى اليانسىنىڭ (ەتكا) فەستيۆالى اياسىندا قاتىسۋشىلار ەتكا-نىڭ جاسىل حارتياسىن قابىلدادى. بۇل قۇجات ەۋرازيا كەڭىستىگىندەگى تاۋ ءتۋريزمى يندۋسترياسىنىڭ تۇراقتى دامۋىنىڭ ورتاق قاعيداتتارىن ايقىندايتىن ستراتەگيالىق قۇجات سانالادى.
حارتيا تاۋ ەكوجۇيەلەرىن ساقتاۋ، كليماتقا تۇسەتىن جۇكتەمەنى ازايتۋ، تابيعي رەسۋرستاردى ۇتىمدى پايدالانۋ جانە ەكولوگيالىق تالاپتارعا ساي باسقارۋ تاجىريبەلەرىن دامىتۋ باعىتىندا كۋرورتتاردىڭ ورتاق جاۋاپكەرشىلىگىن بەكىتەدى. قۇجات ەرىكتى نەگىزدە قابىلدانادى جانە وعان وزگە دە تاۋ كۋرورتتارى قوسىلا الادى.
قۇجاتتىڭ ارنايى بولىمىندە اشىقتىق، ارىپتەستىك جانە ۇتىمدىلىق قاعيداتتارى قامتىلعان. بۇل بيزنەس، مەملەكەت، جەرگىلىكتى قاۋىمداستىقتار مەن عىلىمي ۇيىمدار اراسىنداعى ءوزارا ءىس-قيمىلدى دامىتۋدى كوزدەيدى. قول قويۋشى تاراپتاردىڭ بىرلەسكەن باستامالارىن ەتكا-نىڭ تۇراقتى دامۋ جونىندەگى ساراپتامالىق پلاتفورماسى ۇيلەستىرەدى.
«Shymbulak ءۇشىن جاسىل حارتيانى قابىلداۋ – سوڭعى جىلدارى جۇيەلى تۇردە اتقارىپ كەلە جاتقان جۇمىسىمىزدىڭ زاڭدى جالعاسى. تاۋ كۋرورتى ەكولوگيالىق تەپە-تەڭدىكتى ساقتاماي دامي المايدى. تابيعي لاندشافتاردى قورعاۋ، رەسۋرستاردى جاۋاپكەرشىلىكپەن باسقارۋ، كليماتقا اسەردى ازايتۋ – سالانىڭ ۇزاق مەرزىمدى تۇراقتىلىعىنىڭ نەگىزى»، – دەدى Shymbulak كۋرورتىنىڭ باس ديرەكتورى رينات ابدراحمانوۆ.
جاسىل حارتياعا ەتكا قۇرامىنداعى مىنا كۋرورتتار قول قويدى: Shymbulak Mountain Resort (قازاقستان), Oi-Qaragai Mountain Resort (قازاقستان), Amirsoy Mountain Resort (وزبەكستان), Rosa Khutor (رەسەي), Shahdag Mountain Resort (ازەربايجان), Grandvalira Andorra (اندوررا، ەو).
ەۋرازيالىق تاۋ كۋرورتتارى اليانسى 2023 جىلى ەۋرازياداعى جەتەكشى تاۋ كۋرورتتارىنىڭ باستاماسىمەن قۇرىلدى. اليانستىڭ ماقساتى – تاۋ ءتۋريزمى باسقارۋ سالاسىنداعى كۇش-جىگەردى بىرىكتىرۋ، تۋريستىك قىزمەت ساپاسىن ارتتىرۋ، سپورتتىق الەۋەتتى دامىتۋ جانە تۇراقتى تاۋ ءتۋريزمىنىڭ ۇزدىك تاجىريبەلەرىن ىلگەرىلەتۋ. اليانستىڭ شتاب-پاتەرى الماتى قالاسىندا ورنالاسقان. ەتكا قۇرامىنا قازاقستاننىڭ Shymbulak جانە Oi-Qaragai, ازەربايجاننىڭ Shahdag, وزبەكستاننىڭ Amirsoy, رەسەيدىڭ Rosa Khutor, سونداي-اق وڭتۇستىك كورەيانىڭ Mona Yong Pyong كۋرورتتارى كىرەدى. 24 اقپاندا Grandvalira Resorts Andorra كۋرورتى اليانسقا قوسىلۋعا نيەتتتى ەكەنى تۋرالى مەموراندۋمعا قول قويدى.
