الماتىدا كوكجايلاۋ اۋماعىندا جۇزەگە اسىرىلۋى جوسپارلانعان Almaty SuperSki تاۋ كۋرورتى جوباسى بويىنشا قوعامدىق تىڭداۋلار اياقتالدى.
بىرنەشە ساعاتقا سوزىلعان اشىق تالقىلاۋ بارىسىندا جوباعا قاتىستى ەكونوميكالىق، تۋريستىك، الەۋمەتتىك جانە ەكولوگيالىق ماسەلەلەر كەڭىنەن قاراستىرىلىپ، قوعام وكىلدەرى، ساراپشىلار، ەكولوگتار، كاسىپكەرلەر، سپورت سالاسىنىڭ ماماندارى مەن قالا تۇرعىندارى ءوز پىكىرلەرىن ءبىلدىردى.
تىڭداۋ قورىتىندىسى بويىنشا قاتىسۋشىلاردىڭ ەداۋىر بولىگى الماتى تاۋ كلاستەرىن دامىتۋ باستاماسىن قولداپ، جوبانىڭ مەگاپوليس ءۇشىن ستراتەگيالىق ماڭىزى بار ەكەنىن اتاپ ءوتتى. جوبا اۆتورلارى مەن قولداۋشىلاردىڭ پىكىرىنشە، Almaty SuperSki الماتىنى ورتالىق ازياداعى جەتەكشى تاۋ ءتۋريزمى ورتالىقتارىنىڭ بىرىنە اينالدىرۋعا مۇمكىندىك بەرەدى.
تالقىلاۋ كەزىندە جوبانىڭ نەگىزگى باعىتتارىنىڭ ءبىرى – حالىقارالىق دەڭگەيدەگى زاماناۋي تاۋ ينفراقۇرىلىمىن قالىپتاستىرۋ ەكەنى ايتىلدى. جوسپار بويىنشا جاڭا تۋريستىك ايماقتا شاڭعى تراسسالارى، اسپالى جولدار، سەرۆيس ورتالىقتارى، قوناقۇيلەر، قوعامدىق تاماقتانۋ ورىندارى جانە جىل ون ەكى اي جۇمىس ىستەيتىن تۋريستىك نىساندار سالىنۋى مۇمكىن. ساراپشىلاردىڭ ايتۋىنشا، بۇل الماتىعا كەلەتىن شەتەلدىك جانە ىشكى تۋريستەر سانىن ايتارلىقتاي ارتتىرۋعا ىقپال ەتەدى.
قوعامدىق تىڭداۋ بارىسىندا جوبانىڭ ەكونوميكالىق تيىمدىلىگىنە دە ەرەكشە نازار اۋدارىلدى. سپيكەرلەردىڭ مالىمەتىنشە، تاۋ كلاستەرىن دامىتۋ مىڭداعان جاڭا جۇمىس ورنىن اشۋعا مۇمكىندىك بەرەدى. اڭگىمە تەك قۇرىلىس كەزەڭىندەگى ۋاقىتشا جۇمىس ورىندارى تۋرالى عانا ەمەس، سونىمەن بىرگە تۋريزم، قوناقۇي بيزنەسى، قوعامدىق تاماقتانۋ، كولىك، سپورت يندۋسترياسى جانە قىزمەت كورسەتۋ سالالارىنداعى تۇراقتى جۇمىس ورىندارى جايىندا بولدى. كەيبىر قاتىسۋشىلاردىڭ ايتۋىنشا، جوبا تولىق ىسكە قوسىلعان جاعدايدا 15 مىڭعا جۋىق ادامدى جۇمىسپەن قامتۋعا مۇمكىندىك تۋى ىقتيمال.
تىڭداۋدا جاستار ماسەلەسى دە كوتەرىلدى. قاتىسۋشىلاردىڭ پىكىرىنشە، حالىقارالىق دەڭگەيدەگى ءىرى تۋريستىك جوبالاردىڭ جۇزەگە اسۋى جاستارعا جاڭا كاسىبي مۇمكىندىك اشىپ، ولاردىڭ شەتەلگە كەتۋ دەڭگەيىن تومەندەتۋگە اسەر ەتۋى مۇمكىن. زاماناۋي ينفراقۇرىلىم مەن حالىقارالىق سەرۆيس ستاندارتتارىنىڭ قالىپتاسۋى الماتىدا جاڭا بۋىن ماماندارىن دايارلاۋعا جول اشادى دەگەن پىكىرلەر ايتىلدى.
سونىمەن قاتار جوبا اياسىندا ەكولوگيالىق قاۋىپسىزدىك ماسەلەلەرى دە كەڭىنەن تالقىلاندى. جوبا وكىلدەرى قۇرىلىس جۇمىستارى حالىقارالىق ەكولوگيالىق تالاپتاردى ەسكەرە وتىرىپ جۇرگىزىلەتىنىن، تابيعي لاندشافتقا تۇسەتىن جۇكتەمەنى ازايتۋ بويىنشا ارنايى شارالار قاراستىرىلعانىن مالىمدەدى. بۇل باعىتتاعى قوعامدىق باقىلاۋ مەن ساراپتامالىق مونيتورينگتىڭ جالعاساتىنى دا ايتىلدى.
تىڭداۋ بارىسىندا كەيبىر قوعامدىق بەلسەندىلەر تاراپىنان ەموتسيونالدى پىكىرتالاستار مەن قارسىلىقتار بولعانىمەن، جيىن جالپى رەگلامەنتكە سايكەس ءوتتى. مودەراتورلار بىرنەشە رەت تارتىپكە شاقىرىپ، ءار تاراپتىڭ پىكىر بىلدىرۋىنە مۇمكىندىك جاسادى.
جيىن سوڭىندا قوعامدىق تىڭداۋ رەسمي تۇردە اياقتالىپ، جوبانى ودان ءارى ىسكە اسىرۋعا قولداۋ ءبىلدىرىلدى. ەندىگى كەزەڭدە تەحنيكالىق جانە جوبالىق قۇجاتتاردى ازىرلەۋ، مەملەكەتتىك ساراپتامالاردان وتكىزۋ جانە ينفراقۇرىلىمدىق دايىندىق جۇمىستارى كەزەڭ-كەزەڭىمەن جۇرگىزىلەدى دەپ كۇتىلۋدە.
ساراپشىلاردىڭ پىكىرىنشە، Almaty SuperSki جوباسى تەك تاۋ كۋرورتى ەمەس، الماتى ەكونوميكاسىنا ۇزاقمەرزىمدى سەرپىن بەرەتىن ءىرى ينۆەستيتسيالىق باستاما رەتىندە قاراستىرىلىپ وتىر. جوبا جۇزەگە اسقان جاعدايدا الماتىنىڭ حالىقارالىق تۋريستىك كارتاداعى ءرولى كۇشەيىپ، قالا جىل بويى تۋريست قابىلدايتىن زاماناۋي مەگاپوليسكە اينالۋى مۇمكىن.
