مەملەكەتكە وپاسىزدىق جاسادى دەپ ايىپتالعان ۇلتتىق قاۋىپسىزدىك كوميتەتىنىڭ بۇرىنعى باسشىسى كارىم ءماسىموۆ پرەزيدەنت قاسىم-جومارت توقاەۆتان كەشىرىم سۇراپ، راقىمشىلىق جاساۋ تۋرالى ءوتىنىش بەردى. بۇل تۋرالى Informburo.kz ساۋالىنا بەرگەن جاۋابىندا ۇقك مالىمدەدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، كارىم ءماسىموۆ قازىرگى ۋاقىتتا سىبايلاس جەمقورلىققا قارسى ءىس-قيمىل اگەنتتىگىنىڭ شەشىمىمەن استاناداعى ۇلتتىق قاۋىپسىزدىك كوميتەتىنىڭ تەرگەۋ يزولياتورىندا وتىر.
«ءيا، ول وسى مەكەمەدەن 2024 جىلدىڭ ناۋرىز ايىندا قازاقستان رەسپۋبليكاسى پرەزيدەنتىنىڭ اتىنا كەشىرىم تۋرالى ءوتىنىش جولداعان»، دەپ راستادى ۇقك.
سونداي-اق ماسىموۆكە قاتىستى قىلمىستىق كودەكستىڭ 218-باپتىڭ 3-بولىگىنىڭ 3-تارماعى («قىلمىستىق جولمەن الىنعان اقشانى جانە وزگە دە مۇلىكتى زاڭداستىرۋ») جانە 366-بابىنىڭ 4-بولىگى («اسا ءىرى كولەمدە پارا الۋ») بويىنشا سوتقا دەيىنگى تەرگەۋ ءجۇرىپ جاتقانى حابارلاندى.
ەسكە سالايىق، ءماسىموۆ 2022 جىلعى قاڭتار وقيعاسى كەزىندە ۇستالدى. وعان قاتىستى قىلمىستىق ءىس اسا قۇپيا گريفىمەن بەلگىلەندى. 2023 جىلدىڭ 24 ساۋىرىندە استانا سوتى قر ۇلتتىق قاۋىپسىزدىك كوميتەتىنىڭ بۇرىنعى باسشىسى كارىم ءماسىموۆتى قر قك 175-بابىنىڭ 1-بولىگى مەن 3-بولىگى بويىنشا، مەملەكەتكە وپاسىزدىق جاسادى، بيلىكتى كۇشپەن باسىپ الۋعا ارەكەتتەندى جانە بيلىكتى اسىرا پايدالاندى دەگەن ايىپپەن 18 جىلعا باس بوستاندىعىنان ايىردى. ونىڭ ۇكىمگە شاعىمدانۋ ارەكەتى ءساتسىز اياقتالدى – اپەللياتسيالىق سوت ۇكىمدى وزگەرىسسىز قالدىردى.
سونداي-اق، ونىڭ بۇرىنعى ورىنباسارلارى ءانۋار سادىقۇلوۆ 16, داۋلەت ەرعوجين جانە مارات وسيپوۆ 15 جانە ءۇش جىلعا سوتتالدى.
