"قازاقستان مەن رەسەي ىنتىماقتاستىقتىڭ جوعارى دەڭگەيىنە قول جەتكىزدى". بۇل پىكىردى قازاقستان مەن رەسەيدىڭ وڭىرارالىق ىنتىماقتاستىق فورۋمىنىڭ XVIII جالپى وتىرىسىندا مەملەكەت باسشىسى قاسىم-جومارت توقاەۆ ايتتى، دەپ جازادى "ادىرنا" ۇلتتىق پورتالى.
«ەڭ الدىمەن، وسى شارانى جوعارى دەڭگەيدە ۇيىمداستىرعانى ءۇشىن رف-نىڭ پرەزيدەنتى مەن بارلىق رەسەيلىك ارىپتەستەرگە ءوز ريزاشىلىعىمدى بىلدىرگىم كەلەدى. فورۋم تاقىرىبىنىڭ ءوزى حالىقارالىق ساۋداداعى داعدارىس پەن گەوساياسي بەلگىسىزدىكتىڭ قازىرگى جاعدايىندا زور ماڭىزعا يە. شىنىندا دا، بارلىق شەكتەۋلەردى الىپ تاستاۋ جانە ساۋدادا ءوزارا ءتيىمدى جاعداي جاساۋ ەلدەرىمىزدىڭ ساپالى ەكونوميكالىق وسىمىنە نەگىز بولادى. سوندىقتان بۇگىنگى كەزدەسۋىمىزدىڭ ەرەكشە ماڭىزى بار»، - دەدى توقاەۆ.
توقاەۆ دۇنيەجۇزىلىك ساۋدا ۇيىمىنىڭ دەرەكتەرىنە سىلتەمە جاساپ، ليبەرالدى ساۋدا كەلىسىمدەرىنىڭ باستاۋىندا تۇرعان الەمنىڭ ەڭ دامىعان ەلدەرى سوڭعى جارتى جىلدا ەكسپورتتىق شەكتەۋلەردى ەنگىزۋ قارقىنىن ارتتىرىپ كەلە جاتقانىن اتاپ ءوتتى.
"مىسالى، G20 ەلدەرى وسى جىلدىڭ مامىر ايىنان قازانعا دەيىن ساۋدا-ساتتىق كولەمى 160 ملرد دوللاردان اسپايتىن تاۋارلارعا 47 شەكتەۋ شارالارىن ەنگىزدى. ءسوز ەكسپورتقا ۇنەمى تۋىنداپ وتىرعان شەكتەۋلەر، قوسىمشا ليتسەنزيالىق تالاپتار، كۆوتالار مەن سالىقتار جايىندا بولىپ وتىر. وسىعان وراي، قازاقستان مەن رەسەي اراسىنداعى ىنتىماقتاستىق، باقىتىمىزعا وراي، جاھاندىق ۇردىستەردەن ايتارلىقتاي ەرەكشەلەنەدى. وتكەن ايدا ءبىز ەكى ەل اراسىنداعى ديپلوماتيالىق قارىم-قاتىناستاردىڭ ورناعانىنا 30 جىل تولۋىن اتاپ وتتىك. وسى ۋاقىت ىشىندە مەملەكەتتەرىمىز مىعىم دوستىق پەن تاتۋ كورشىلىككە نەگىزدەلگەن ءوزارا ءتيىمدى ستراتەگيالىق سەرىكتەستىك قۇرا الدى. ەلدەرىمىز اراسىندا سەنىمدى، سىندارلى ديالوگ ورناتىلىپ، ىنتىماقتاستىقتىڭ جوعارى دەڭگەيىنە قول جەتكىزىلدى»، - دەدى مەملەكەت باسشىسى.
ەستەرىڭىزگە سالا كەتەيىك، بۇعان دەيىن مەملەكەت باسشىسى قاسىم-جومارت توقاەۆ ۆلاديمير ءپۋتيننىڭ شاقىرۋىمەن رەسەيگە رەسمي ساپارمەن كەلگەنى حابارلانعان بولاتىن. ەكى ەل پرەزيدەنتتەرى ورىنبوردا ءوتىپ جاتقان قازاقستان مەن رەسەيدىڭ XVIII وڭىرارالىق ىنتىماقتاستىق فورۋمىنىڭ پلەنارلىق وتىرىسىنا قاتىستى.
"ادىرنا" ۇلتتىق پورتالى
