قازىرگى ۋاقىتتا ماسكەۋ مەن استانا 2026 جىلى رەسەي پرەزيدەنتى ۆلاديمير ءپۋتيننىڭ قازاقستانعا ساپارىنىڭ مەرزىمىن تالقىلاپ جاتىر. بۇل تۋرال رەسەيدىڭ قازاقستانداعى ەلشىسى الەكسەي بوروداۆكين مالىمدەدى، دەپ حابارلايدى "ادىرنا" پورتالى Report باسىلىمىنا سىلتەپ.
«رەسەي پرەزيدەنتى ۆلاديمير ءپۋتيننىڭ قازاقستانعا ساپارىنا كەلسەك، مۇنداي جىل سايىنعى ءوزارا ساپارلار تاجىريبەگە اينالدى. قازىر ونىڭ ناقتى كۇندەرىن كەلىسۋ جانە كەلىسسوزدەردىڭ مازمۇنىن پىسىقتاۋ جۇمىستارى جۇرگىزىلۋدە»، – دەدى ديپلومات.
كۇندەرىنە قاتىستى ناقتىلاي كەلە، ەلشى مامىر ايىنىڭ سوڭىندا استانادا ەۋرازيالىق ەكونوميكالىق وداق ەلدەرى كوشباسشىلارىنىڭ قاتىسۋىمەن جوعارى ەۋرازيالىق ەكونوميكالىق كەڭەس وتىرىسى جوسپارلانعانىن، وعان رەسەي پرەزيدەنتىنىڭ دە قاتىسۋى كۇتىلەتىنىن ايتتى.
«2026 جىلى قازاقستان ەاەو-عا توراعالىق ەتەدى. مامىر ايىنىڭ سوڭىندا استانادا وداققا مۇشە مەملەكەتتەر باسشىلارىنىڭ قاتىسۋىمەن جوعارى ەۋرازيالىق ەكونوميكالىق كەڭەس وتىرىسى وتەدى، وعان رەسەي كوشباسشىسى دا قاتىسادى»، – دەدى بوروداۆكين.
ەلشى ءپۋتيننىڭ قازاقستانعا ساپارى ەكى ەل اراسىنداعى قاتىناستار تاريحىنداعى ماڭىزدى بەتتەردىڭ بىرىنە اينالۋى مۇمكىن ەكەنىن اتاپ ءوتتى. ونىڭ ايتۋىنشا، بۇل ساپار ماسكەۋ مەن استانا اراسىنداعى ىنتىماقتاستىقتىڭ دامۋىنا قوسىمشا سەرپىن بەرۋى ىقتيمال.
