جەتىسۋ وبلىسىندا «تازا قازاقستان» ەكولوگيالىق باعدارلاماسى اياسىندا «Taza Time: تازالىق – ورتاق مىندەت» تاقىرىبىندا جاستارمەن كەزدەسۋ ءوتتى. اتالعان ءىس-شارا جاستاردىڭ ەكولوگيالىق ساۋاتىن ارتتىرۋ، تازالىقتى تۇراقتى ادەتكە جانە ومىرلىك ۇستانىمىنا اينالدىرۋ ماقساتىندا ۇيىمداستىرىلدى.
سارقان اۋدانىندا وتكەن كەزدەسۋ بارىسىندا «Sarqan jastary» فيليالىنىڭ جەتەكشىسى باۋىرجان جانتاسوۆ ەكولوگيالىق سانانى قالىپتاستىرۋدىڭ ناقتى تەتىكتەرىنە توقتالدى:
- الداعى ۋاقىتتا «Taza Time» قوزعالىسىن تۇراقتى ناسيحاتتاپ، تازالىق اكتسيالارىن ءجيى وتكىزۋ – ءبىزدىڭ ورتاق مىندەتىمىز. سىزدەردىڭ ارقايسىڭىزدىڭ وسى شارالارعا بەلسەندى قاتىسۋلارىڭىز قوعامعا وڭ ىقپال ەتىپ، جاستار اراسىنداعى ەكولوگيالىق مادەنيەتتى قالىپتاستىرۋعا ۇلەس قوساتىنى انىق. ەڭ باستىسى، «تازا وي – تازا ورتا - تازا بولاشاق» قاعيداسىن ۇستانىپ، تازالىقتى ءومىر سالتىمىزعا اينالدىرايىق، - دەدى ول.
بەلسەندى قاتىسۋشىلارعا العىس حاتتار تابىستالىپ، قاتىسۋشىلار اشىق پىكىر الماستى، ءوز ۇسىنىس-تىلەكتەرىن ءبىلدىردى، تازالىقتى ءومىر سالتىنا اينالدىرۋ تۋرالى ورتاق ۇندەۋ قابىلداندى.
