قر ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى اسەت ەرعاليەۆ ۇلتتىق ستاتيستيكا بيۋروسىنىڭ باسشىسى ماقسات تۇرلىباەۆتىڭ وتكەن جىلدىڭ قورىتىندىلارى مەن 2026 جىلعى نەگىزگى باسىمدىقتارى تۋرالى بايانداماسىن تىڭدادى.
بيۋرو باسشىسى رەسمي دەرەكتەر ساپاسىن، دالدىگىن جانە جەدەلدىگىن ارتتىرۋ، ماكروەكونوميكالىق ستاتيستيكانىڭ ادىستەمەلىك بازاسىن كۇشەيتۋ،
سونداي-اق بالامالى جانە اكىمشىلىك دەرەككوزدەردى كەڭىنەن پايدالانۋ بويىنشا اتقارىلعان جۇمىستار ناتيجەلەرىن ۇسىندى. سونىڭ ارقاسىندا وتكەن جىلى رەسپوندەنتتەرگە تۇسەتىن جۇكتەمە 30%-عا ازايىپ، ۇلكەن دەرەكتەر ستاتيستيكالىق قىزمەتكە ەنگىزىلدى.
اتاپ ايتقاندا، 2026 جىلدىڭ باسىنان باستاپ بيۋرو ينفلياتسيانى ەسەپتەۋدىڭ جاڭا تاسىلىنە كوشتى، وعان فيسكالدىق چەكتەر مەن ماركەتپلەيستەردىڭ دەرەكتەرى قولدانىلۋدا. قازىرگى ۋاقىتتا بۇل ءتاسىل 158 تاۋار مەن قىزمەتتىڭ ءداستۇرلى باعاسىن ەسەپتەۋدى قوسىمشا 120 ملن قۇندىق جازبالارعا نەگىزدەلگەن ادىسپەن الماستىرۋعا مۇمكىندىك بەردى.
سونىمەن قاتار، قازىرگى ۋاقىتتا ەكونوميكالىق ىنتىماقتاستىق جانە دامۋ ۇيىمىنىڭ (بۇدان ءارى - ەىدۇ) ۇلتتىق ستاتيستيكالىق جۇيەگە شولۋ جۇمىستارى اياقتالعانى حابارلاندى. ناتيجەسىندە قازاقستان تمد ەلدەرى اراسىندا رەسمي تۇردە ەىدۇ-نىڭ ستاتيستيكالىق تاجىريبەنى جاقسارتۋ جونىندەگى ۇسىنىمدارىنا قوسىلعان العاشقى مەملەكەت بولدى.
سونداي-اق كەزدەسۋ بارىسىندا تسيفرلىق كودەكسكە سايكەس اگەنتتىككە دەرەكتەر ەكونوميكاسىن دامىتۋ جونىندەگى جاڭا قۇزىرەت بەرىلگەنى اتاپ ءوتىلدى. وسى باعىت اياسىندا تسيفرلىق ەكونوميكانىڭ دامۋىنا جانە مەملەكەتتىك پەن جەكەمەنشىك سەكتورلار اراسىنداعى سەنىمدى نىعايتۋعا ىقپال ەتەتىن اشىق ءارى قاۋىپسىز دەرەكتەر نارىعىن قالىپتاستىرۋدىڭ نەگىزدەرى ازىرلەنۋدە.
وسى ماقساتتا تسيفرلىق كودەكس نورمالارىن ىسكە اسىرۋ شەڭبەرىندە دەرەكتەردىڭ تسيفرلىق ونىمدەرىن الماسۋ جانە ولاردىڭ اينالىمى پلاتفورمالارىنىڭ جۇمىس ىستەۋ قاعيدالارى قابىلداناتىن بولادى.
بۇل دەرەكتەردى ەكونوميكالىق اكتيۆ رەتىندە ەسەپكە الۋعا مۇمكىندىك بەرەدى. وسىعان بايلانىستى شانحاي دەرەكتەر بيرجاسىمەن بىرلەسىپ قازاقستاننىڭ دەرەكتەر بيرجاسىن دامىتۋعا ارنالعان ادىسنامالىق جانە تەحنولوگيالىق بازانى قالىپتاستىرۋ جۇمىستارى اياقتالۋ ساتىسىندا.
2026 جىلعا ارنالعان باسىمدىقتاردىڭ قاتارىندا - ستاتيستيكانىڭ ودان ءارى تسيفرلىق ترانسفورماتسياسى، جاساندى ينتەللەكت قۇرالدارىن ەنگىزۋ، اكىمشىلىك جانە بالامالى دەرەككوزدەردەن الىنعان ۇلكەن دەرەكتەردى بەلسەندى پايدالانۋ، سونداي-اق حالىقارالىق ينتەگراتسيانى نىعايتۋ بولىپ تابىلادى.
كورسەتكىشتەردى ەسەپتەۋدىڭ جاڭا ادىستەرىن دامىتۋ جالعاستىرىلادى: تۋريزم جانە ميگراتسيا ستاتيستيكاسىندا ۇيالى بايلانىس وپەراتورلارىنىڭ دەرەكتەرىن پايدالانۋ، ىشكى ساۋدا ستاتيستيكاسىندا فيسكالدىق چەكتەر مەن ەلەكتروندىق شوت-فاكتۋرا دەرەكتەرىن قولدانۋ، توقساندىق ءجىو-ءنى ديسكرەتتىك ەسەپتەۋ ەنگىزۋ، حالىقتىڭ اقشا تابىسىن باعالاۋ ادىستەمەسىن جاڭارتۋ جانە حالىقارالىق ۇشج (ۇلتتىق شوتتار جۇيەسى)-2025 ستاندارتىنا كوشۋ كەزەڭىن باستاۋ. بۇل شارالار رەسمي ستاتيستيكانىڭ اناليتيكالىق تەرەڭدىگىن ارتتىرۋعا مۇمكىندىك بەرەدى.
جىلدىڭ ەكىنشى جارتىسىندا «Taldau» اقپاراتتىق-تالدامالىق جۇيەسىنىڭ جاڭارتىلۋى اياقتالىپ، پايدالانۋشىلارمەن ءوزارا ارەكەتتەسۋ، دەرەكتەردى ىزدەۋ جانە تالداۋ، اقپاراتتى اۆتوماتتى تۇردە كلاسسيفيكاتسيالاۋ ءۇشىن
جي-اسسيستەنتتەر نەگىزىندە ينتەراكتيۆتى مۇمكىندىكتەر كەڭەيتىلەدى.
سونداي-اق، رەسپوندەنتتەردەن ستاتيستيكالىق ەسەپتىلىك قابىلداۋ ءۇشىن توعىز ساۋالناما فورماسى بويىنشا ءموبيلدى قوسىمشا ىسكە قوسىلادى.
ۇلتتىق ستاتيستيكا بيۋروسىنداعى مىنەز-قۇلىق ەكونوميكاسى جانە ۇلكەن دەرەكتەردى تالداۋ ورتالىعى بازاسىندا ەكونوميكالىق بەلسەندىلىكتىڭ جەدەل ترەكەرلەر جۇيەسى قالىپتاسۋدا. كاسىپورىنداردا جاساندى ينتەللەكت قولدانۋدى قاداعالاۋ بويىنشا جالپىۇلتتىق ستاتيستيكالىق باقىلاۋ ەنگىزىلۋدە، بۇل ەكونوميكا تسيفرلاندىرۋىن باسقارۋدا جۇيەلى ءارى ولشەنەتىن ءتاسىلدى قامتاماسىز ەتەدى.
بيۋرو سونداي-اق حالىقارالىق ىنتىماقتاستىقتى كۇشەيتۋ ۇستىندە.
2026 جىلى قازاقستاننىڭ ستاتيستيكا جانە ستاتيستيكالىق ساياسات بويىنشا ەىدۇ-نىڭ پروفيلدىك كوميتەتىنە قوسىلۋعا دايىندىقتى اياقتاۋ، بۇۇ ەۋروپالىق ەكونوميكالىق كوميسسياسىنىڭ ۇسىنىستارىن ىسكە اسىرۋدى جالعاستىرۋ، سونداي-اق ەلدىڭ دۇنيەجۇزىلىك بانكتىڭ ستاتيستيكالىق تيىمدىلىك كورسەتكىشتەرى (Statistical Performance Indicators) مەن Open Data Watch ۇيىمىنىڭ دەرەكتەردىڭ اشىقتىعى (Open Data Inventory) رەيتينگتەرىندە پوزيتسياسىن كوتەرۋ جوسپارلانۋدا. استانادا دەرەكتەر سالاسىنداعى قۇزىرەتتىلىكتى دامىتۋعا ارنالعان وڭىرلىك ورتالىق – Data Literacy Hub قۇرۋ جۇمىستارى اياقتالۋدا، ول زاماناۋي تسيفرلىق شەشىمدەرمەن جانە ۆيزۋاليزاتسيا جۇيەلەرىمەن جابدىقتالعان.
كەزدەسۋدى قورىتىندىلاي كەلە، اسەت ەرعاليەۆ بيۋرونىڭ رەسمي ستاتيستيكانى قالىپتاستىرۋداعى نەگىزگى دامۋ باسىمدىقتارىن اتاپ ءوتىپ، ستاتيستيكالىق قىزمەتتە جاساندى ينتەللەكت قولدانۋ مەن ۇلكەن دەرەكتەر ەكوجۇيەسىن دامىتۋ جۇمىستارىن كۇشەيتۋدى تاپسىردى.
اتالعان باسىمدىقتاردى جۇيەلى جۇزەگە اسىرۋ ەلدىڭ ستراتەگيالىق باسقارۋ جانە تۇراقتى دامۋ مۇددەسىنە سايكەس زاماناۋي ءارى تەحنولوگيالىق ۇلتتىق ستاتيستيكالىق جۇيەنى ودان ءارى دامىتۋعا مۇمكىندىك بەرەدى.
