استانادا بۇرىنعى شەنەۋنىك، پرەزيدەنت قاسىم-جومارت توقاەۆتىڭ ەكس-كەڭەسشىسى ەرجان باباقۇماروۆتى ءولتىرىپ كەتتى. بۇل تۋرالى قازتاگ جازدى، دەپ حابارلايدى «ادىرنا» ءتىلشىسى.
ىشكى ىستەر مينيسترلىگىنىڭ مالىمەتىنشە، وقيعانىڭ ءمان-جايى انىقتالىپ جاتىر.
«اتالعان فاكت بويىنشا قىلمىستىق ءىس قوزعالدى. الدىن الا مالىمەتتەر بويىنشا، بۇرىننان تانىس ادامدار اراسىندا جانجال تۋىنداپ، توبەلەسكە ۇلاسقان. سونىڭ سالدارىنان 56 جاستاعى ەر ادام العان جاراقاتتارىنان كوز جۇمدى»، — دەلىنگەن حابارلامادا.
ەرجان جالباقۇلى باباقۇماروۆ 1969 جىلى 2 ناۋرىزدا دۇنيەگە كەلگەن. ءال-فارابي اتىنداعى قازاق مەملەكەتتىك ۋنيۆەرسيتەتىن ساياسات تاريحىنىڭ وقىتۋشىسى ماماندىعى بويىنشا جانە وسى ۋنيۆەرسيتەتتىڭ اسپيرانتۋراسىن بىتىرگەن. 1990 جىلدارى ەڭبەك جولىن الماتى اكىمى اپپاراتىنىڭ قۇرامىندا باستاعان. كەيىن پرەزيدەنت اكىمشىلىگىنە اۋىسىپ، ىشكى ساياسات باعىتىن قاداعالاعان. 2006 جىلى مادەنيەت ۆيتسە-ءمينيسترى بولىپ تاعايىندالىپ، كەيىن پرەمەر-مينيستر كارىم ءماسىموۆتىڭ كەڭسەسىندە جۇمىس ىستەگەن.
2019 جىلى ول پرەزيدەنت كەڭەسشىسى – پرەزيدەنتى اكىمشىلىگىنىڭ تالداۋ جانە بولجامداۋ ورتالىعىنىڭ مەڭگەرۋشىسى بولدى. سول جىلى الماتى اكىمىنىڭ ورىنباسارى قىزمەتىن اتقارعان. قاڭتار وقيعاسىنان كەيىن سول كەزدەگى الماتى اكىمى باقىتجان ساعىنتاەۆپەن بىرگە قىزمەتىنەن كەتكەن. سوڭعى لاۋازىمى — پرەزيدەنت جانىنداعى ورتالىق كوممۋنيكاتسيالار قىزمەتىنىڭ ديرەكتورى.
