ەڭبەك جانە حالىقتى الەۋمەتتىك قورعاۋ مينيسترلىگى الەۋمەتتىك جەلىلەردە كەڭ تالقىلانعان Burger King جەلىسىنە قاتىستى جاعدايعا تۇسىنىكتەمە بەردى، دەپ حابارلايدى "ادىرنا" ۇلتتىق پورتالى.
ءاۋتيزمى بار قىزمەتكەر الىبەك قاراتايدىڭ اناسى جانات قاراتاي جاڭا ايماقتىق باسشى ۇلىن جۇمىستان كەتۋگە ماجبۇرلەدى دەپ مالىمدەگەن. وسىدان كەيىن قازاقستاندىقتار الەۋمەتتىك جەلىلەردە وتباسىن قولداپ، فاستفۋد جەلىسىنە قارسى پىكىرلەر جازىپ، بويكوت جاريالاي باستاعان.
مينيسترلىك مالىمەتىنشە، جاعداي باقىلاۋعا الىنعان. قىزمەتتىك تەكسەرىس كەزەڭىندە كومپانيا باسشىلارىنىڭ ءبىرى ۋاقىتشا قىزمەتىنەن شەتتەتىلگەن.
مينيسترلىك وكىلدەرى الماتى قالاسىنىڭ مەملەكەتتىك ەڭبەك ينسپەكتورى الىبەك قاراتايدىڭ تۇرعىلىقتى جەرىنە بارعانىن حابارلادى. سونىمەن قاتار قىزمەتكەردىڭ اكەسىمەن تەلەفون ارقىلى سويلەسىپ، ەڭبەك زاڭناماسىنا سايكەس شاعىم بەرۋ ءتارتىبى مەن كەپىلدىكتەر تۋرالى ءتۇسىندىرۋ جۇمىستارى جۇرگىزىلگەن.
جانجال الەۋمەتتىك كاسىپكەر، اۋتيزم ماسەلەلەرى بويىنشا ساراپشى جانات قاراتايدىڭ الەۋمەتتىك جەلىدەگى جازباسىنان كەيىن باستالعان. ونىڭ ايتۋىنشا، ۇلى شامامەن ءتورت جىل اسپاز بولىپ جۇمىس ىستەگەن، الايدا باسشىلىق اۋىسقاننان كەيىن وعان قاتىستى قىسىم بايقالعان. جازبا تەز تارالىپ، قوعامدا ۇلكەن رەزونانس تۋدىرعان.
ءوز كەزەگىندە كومپانيا وكىلدەرى ەرەكشە قاجەتتىلىگى بار قىزمەتكەردى جۇمىستان شىعارماعانىن، ەڭبەك شارتىن بۇزۋ تۋرالى ءوتىنىشتى اناسى بەرگەنىن مالىمدەدى. سونىمەن قاتار كومپانيا الىبەكتى جەلىدەگى باسقا مەيرامحاناعا اۋىستىرۋ نۇسقاسىن ۇسىنعانىن ايتقان. الايدا جانات قاراتاي بۇل اقپاراتتى جوققا شىعاردى. ونىڭ سوزىنشە، جاعداي ۋشىعىپ كەتكەن سوڭ وتباسى سوتقا جۇگىنۋگە شەشىم قابىلداعان.
