Eŋbek jäne halyqty äleumettık qorǧau ministrlıgı äleumettık jelılerde keŋ talqylanǧan Burger King jelısıne qatysty jaǧdaiǧa tüsınıkteme berdı, dep habarlaidy "Adyrna" ūlttyq portaly.
Autizmı bar qyzmetker Älıbek Qarataidyŋ anasy Janat Qaratai jaŋa aimaqtyq basşy ūlyn jūmystan ketuge mäjbürledı dep mälımdegen. Osydan keiın qazaqstandyqtar äleumettık jelılerde otbasyn qoldap, fastfud jelısıne qarsy pıkırler jazyp, boikot jariialai bastaǧan.
Ministrlık mälımetınşe, jaǧdai baqylauǧa alynǧan. Qyzmettık tekserıs kezeŋınde kompaniia basşylarynyŋ bırı uaqytşa qyzmetınen şettetılgen.
Ministrlık ökılderı Almaty qalasynyŋ memlekettık eŋbek inspektory Älıbek Qarataidyŋ tūrǧylyqty jerıne barǧanyn habarlady. Sonymen qatar qyzmetkerdıŋ äkesımen telefon arqyly söilesıp, eŋbek zaŋnamasyna säikes şaǧym beru tärtıbı men kepıldıkter turaly tüsındıru jūmystary jürgızılgen.
Janjal äleumettık käsıpker, autizm mäselelerı boiynşa sarapşy Janat Qarataidyŋ äleumettık jelıdegı jazbasynan keiın bastalǧan. Onyŋ aituynşa, ūly şamamen tört jyl aspaz bolyp jūmys ıstegen, alaida basşylyq auysqannan keiın oǧan qatysty qysym baiqalǧan. Jazba tez taralyp, qoǧamda ülken rezonans tudyrǧan.
Öz kezegınde kompaniia ökılderı erekşe qajettılıgı bar qyzmetkerdı jūmystan şyǧarmaǧanyn, eŋbek şartyn būzu turaly ötınıştı anasy bergenın mälımdedı. Sonymen qatar kompaniia Älıbektı jelıdegı basqa meiramhanaǧa auystyru nūsqasyn ūsynǧanyn aitqan. Alaida Janat Qaratai būl aqparatty joqqa şyǧardy. Onyŋ sözınşe, jaǧdai uşyǧyp ketken soŋ otbasy sotqa jügınuge şeşım qabyldaǧan.
