Serdar Berdımūhamedov Türkımenstannyŋ Ūlttyq qauıpsızdık ministrı Nazar Atagaraevty basqa jūmysqa auysuyna bailanysty qyzmetınen bosatty. Tiıstı şeşım Memlekettık qauıpsızdık keŋesınıŋ otyrysynda qabyldandy, dep habarlaidy “Adyrna” Turkmenportal-ǧa sılteme jasap.
Türkımenstannyŋ Ūlttyq qauıpsızdık ministrlıgınıŋ jaŋa basşysy bolyp būǧan deiın Prezidenttıŋ qauıpsızdık qyzmetın basqarǧan general-maior Dovletgeldi Meredov taǧaiyndaldy. Ol halyqqa, otanǧa jäne memleket basşysyna adal boluǧa ant berdı.
Türkımenstannyŋ Ūlttyq qauıpsızdık ministrlıgı – eldegı arnaiy qyzmetterdıŋ basty organy, qauıpsızdık pen barlau mäselelerıne jauap beredı. Ol 1991 jyly keŋestık KGB negızınde qūrylǧan jäne tıkelei prezidentke baǧynady. Onyŋ mındetterıne memlekettık qauıpsızdıktı qorǧau, qarsy barlau, terrorizmmen jäne basqa da qauıptermen küresu, sondai-aq strategiialyq salalardy baqylau kıredı.
Ministrlık qyzmetkerlerı qylmyspen küres jäne qoǧamdyq tärtıptı qadaǧalau boiynşa türlı operasiialarǧa qatysady, sondai-aq azamattardy ūlttyq qauıpsızdıkke tönetın qaterler tūrǧysynan tekseredı. Būl qūrylym dästürlı türde Türkımenstannyŋ saiasaty men küştık blogynda maŋyzdy röl atqarady.
Eske salaiyq, 10 aqpanda Sadyr Japarov özınıŋ dosy ärı serıktesı Qamşybek Täşievtı barlyq lauazymdarynan bosatqan bolatyn. Qyrǧyzstan prezidentınıŋ baspasöz qyzmetınıŋ habarlauynşa, «būl qadamnyŋ basty maqsaty – memlekettıŋ bırlıgın nyǧaitu jäne qoǧamda, sonyŋ ışınde memlekettık qūrylymdar arasynda jıkke bölınudıŋ aldyn alu». Būl jaǧdai Qyrǧyzstan prezidentıne merzımınen būryn sailau ötkızu turaly ötınış jasalǧan tūsta bolǧan.
Täşievtıŋ otstavkasynan keiın küştık qūrylymdarda qaita qūru bastaldy: onyŋ orynbasarlary qyzmetınen aiyryldy, Şekara qyzmetı ŪQK qūrylymynan şyǧaryldy, sondai-aq tıkelei prezidentke baǧynatyn jaŋa Memlekettık küzet qyzmetı qūryldy. Jergılıktı parlamenttıŋ spikerı Nūrlanbek Tūrǧynbek te ökılettıgın toqtatty. Täşievtıŋ jienı Nūrǧazy Matisakov kölık prokuraturasynyŋ basşysy qyzmetınen bosatyldy.
