نۇر-سۇلتان قالاسىنداعى مينيسترلىكتەر ءۇيىنىڭ قىزمەتكەرلەرىنە عيماراتقا سمارتفوندار اكەلۋگە رۇقسات ەتىلدى. بۇل اقپاراتتى پرەزيدەنت اكىمشىلىگى راستادى.
مينيسترلىكتەر ۇيىندە جۇمىس ىستەيتىن مەملەكەتتىك قىزمەتكەرلەر ەندى سمارتفوندارىن جۇمىس ورىندارىندا قايتادان پايدالانۋعا رۇقسات الدى. مينيسترلىكتەر عيماراتىندا ەلىمىزدەگى مينيسترلىكتەردىڭ ورتالىق اپپاراتتارى جۇمىس ىستەيدى.
بۇعان دەيىن دە ۇكىمەت مەملەكەتتىك قىزمەتكەرلەرگە سمارتفوندارىن پايدالانۋ قۇقىعىن قايتارۋدى قولداعان بولاتىن. بۇل تۋرالى اقپاراتتى قر تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆ «مەملەكەتتىك ورگان ورنالاسقان مەكەمە يەلەرى پوليتسيامەن بىرلەسىپ قاجەتتى نۇسقاۋلىققا قول قويۋى قاجەت. سول ۋاقىتتان باستاپ، مەملەكەتتىك قىزمەتكەرلەر سول عيماراتتا سمارتفون قولدانا بەرسە بولادى. اقپاراتتىق قاۋىپسىزدىك البەتتە تولىعىمەن مەملەكەتتىك قىزمەتكەرلەر مەن مەملەكەتتىك مورگان باسشىلىعىنىڭ جاۋاپكەرشىلىگىندە»، - دەپ اتاپ وتكەن ەدى.
نەگىزىنەن، سمارتفوندار، پلانشەتتەر، سمارت ساعاتتاردى ۇكىمەت عيماراتتارىندا پايدالانۋعا تىيىم سالۋ 2016 جىلدىڭ ناۋرىز ايىندا ەنگىزىلدى. بۇل شارا مەملەكەتتىك قىزمەتكەرلەردىڭ ءموبيلدى قۇرىلعىلاردى قىزمەتتىك ماقساتتاردا بەلسەندى تۇردە پايدالانۋىنا جانە WhatsApp جەلىسى ارقىلى رەسمي اقپاراتتاردىڭ تارالىپ كەتۋ دەڭگەيىنىڭ وسۋىنە بايلانىستى ەنگىزىلدى.
ەندىگى كەزەكتە مەملەكەتتىك قىزمەتكەرلەرگە «قوڭىراۋ / جاۋاپ / SMS» فۋنكتسيالارى بار، بىراق ينتەرنەت مودۋلدەرىمەن، كامەرالارمەن جانە بەينەكامەرالارمەن جابدىقتالماعان ءموبيلدى قۇرىلعىلاردى پايدالانۋعا رۇقسات ەتىلدى.
