كونستيتۋتسيالىق كوميسسيا جەلىدە تاراپ جاتقان قاۋەسەتتى جوققا شىعاردى

بۇگىن كونستيتۋتسيالىق رەفورمالار جونىندەگى كوميسسيانىڭ ءتورتىنشى وتىرىسىندا كونستيتۋتسيالىق سوت توراعاسىنىڭ ورىنباسارى باقىت نۇرمۇحانوۆ اتا زاڭعا بەلگىلى ءبىر اۋماقتارعا قارجى سالاسىندا ارنايى قۇقىقتىق رەجيم ەنگىزۋ نەمەسە «جىلدام دامۋ قالالارى» دەپ اتالاتىن قالالاردى قۇرۋ مۇمكىندىگىن قاراستىراتىن نورمانى ەنگىزۋ ۇسىنىلىپ وتىرعانىن مالىمدەدى.
 
باقىت نۇرمۇحانوۆتىڭ ايتۋىنشا، بۇل ەڭ الدىمەن استاناداعى حالىقارالىق قارجى ورتالىعىنىڭ قىزمەتى جانە الاتاۋ قالاسىن دامىتۋعا قاتىستى. اتالعان شارالار رەسپۋبليكانىڭ ءتيىمدى ەكونوميكالىق دامۋىن قامتاماسىز ەتۋگە باعىتتالعان.
 
بۇعان قوسا، ول بۇل ۇسىنىس قازاقستاننىڭ بىرتۇتاستىعى مەن ونىڭ اۋماعىنىڭ بولىنبەيتىندىگى تۋرالى نورماعا ەشقانداي اسەر ەتپەيتىنىن العا تارتىپ، الەۋمەتتىك جەلىدە تاراپ جاتقان قاۋەسەت پەن ەكىۇشتى پىكىرلەردى جوققا شىعاردى.
 
«مەملەكەتتىڭ بىرتۇتاستىعى، قازاقستان اۋماعىنىڭ تۇتاستىعى، بولىنبەيتىندىگى جانە وعان قول سۇعىلماۋشىلىعى تۋرالى نورما وزگەرىسسىز قالادى»، — دەدى كونستيتۋتسيالىق سوت توراعاسىنىڭ ورىنباسارى.
 
ەستەرىڭىزگە سالا كەتەيىك، كونستيتۋتسيالىق كوميسسيانىڭ الدىڭعى وتىرىسىندا ايتىلعان بۇل ۇسىنىستى كەيبىر ازاماتتار دۇرىس تۇسىنبەي، الەۋمەتتىك جەلىدە دابىل قاققان بولاتىن. الايدا، بۇل كونستيتۋتسيالىق كوميسسيا بۇل ماسەلەگە بۇگىن ناقتى جاۋاپ بەرىپ، نۇكتەسىن قويدى. كونستيتۋتسياداعى قازاقستاننىڭ بىرتۇتاستىعى مەن اۋماعىنىڭ بولىنبەيتىنى تۋرالى نورما وزگەرتىلمەيدى.