Jetısu oblysynda jalpy öŋırlık önım kölemı 2022 jylmen salystyrǧanda 2 esege juyq ösıp, 2,5 trln. teŋgege jettı. Ötken jyldyŋ qorytyndysy boiynşa ekonomikalyq ösım kemınde 6,5% deŋgeiınde kütılude. Būl turaly öŋır basşysy Beibıt İsabaev oblystyŋ äleumettık-ekonomikalyq damu qorytyndylary men 2026 jylǧa arnalǧan keşendı damu jospary turaly mäsele qaralǧan oblys äkımdıgınıŋ otyrysynda aitty, - dep habarlaidy Jetısu oblysy äkımınıŋ baspasöz qyzmetı.
Atap aitqanda, Jetısu oblysy boiynşa soŋǧy üş jylda öŋırge 1,5 trln teŋge investisiia tartylyp, jūmyssyzdyq deŋgeiı 4,7%-ǧa deiın tömendedı. Sol siiaqty 2023–2025 jyldary 1 mln şarşy metr tūrǧyn üi paidalanuǧa berılıp, şamamen 11 myŋ otbasy qonys toiyn toilady. Sonymen qatar 276 äleumettık nysan salynyp, jöndeuden öttı, söitıp olardy jaŋartu deŋgeiı 55,8%-ǧa jettı. Ortalyq auyz sumen qamtu deŋgeiı 100%-dy qūrady, 110 eldı mekenge gaz tartylyp, öŋırdı gazdandyru deŋgeiı 67%-ǧa jettı.
- Jetısu oblysy qūrylǧannan berı halyqtyŋ ömır süru sapasyn jaqsartuǧa oŋ äserın tigızetın bırqatar ırı infraqūrylymdyq jobalar ıske asyryldy. «Taldyqorǧan-Üşaral» magistraldy gaz qūbyry salyndy, «Dostyq–Moiynty» uchaskesınde ekınşı temırjol joldarynyŋ qūrylysy aiaqtaldy. «Taldyqorǧan – Üşaral», «Üşaral – Dostyq» joldary paidalanuǧa berıldı, «Saryözek – Köktal – Qorǧas» joly jaŋǧyrtylyp, respublikalyq maŋyzy bar joldar 100%-ǧa jöndeldı. Oblys joldarynyŋ jaqsy jäne qanaǧattanarlyq jaǧdaidaǧy ülesı 95%-ǧa jettı. Köp jyldan berı şeşılmei kelgen Molaly ainalmasynan Balqaş kölıne deiıngı joly tolyq jöndelıp, paidalanuǧa berıldı. Būl rette turizm salasyna erekşe nazar audaryldy. Mäselen, 2025 jyly būl salaǧa oblystyŋ damu biudjetınıŋ şamamen 30%-y bölındı, - dep atap öttı B. İsabaev.
Äleumettık-ekonomikalyq damu qorytyndylary men 2026 jylǧa arnalǧan josparlar turaly negızgı baiandamany oblys äkımınıŋ orynbasary Äset Qanaǧatov jasady. Ol öŋırdıŋ jetıstıkterı men problemalyq mäselelerıne taldau jasady.
Mūnan soŋ bırqatar audan jäne qala äkımderı, sondai-aq bırneşe basqarma basşylary söz söiledı. Baiandamalardan keiın Beibıt İsabaev jauapty tūlǧalarǧa Memleket basşysynyŋ Ükımettıŋ keŋeitılgen otyrysynda bergen tapsyrmalaryn negızge ala otyryp, bırqatar basym mındetter jüktedı.
Jetısu oblysy auyl şaruaşylyǧyn damytu maqsatynda agroönerkäsıp keşenındegı qaita öŋdeu deŋgeiın arttyruǧa basymdyq bermek. Būl üşın zamanaui agrotehnologiialar qoldanu, investisiia tarta otyryp, tauarly süt fermalaryn, bordaqylau alaŋdaryn, qūs fabrikalaryn, jylyjailardy salu, auyl şaruaşylyǧy jerlerın tiımdı paidalanu qajettıgı atap ötıldı. Önerkäsıptı, şaǧyn jäne orta biznestı damytu, salaǧa investisiia tartu, jaŋa jūmys oryndaryn aşu – basym mındetterdıŋ qatarynda. Tūrǧyn üi, äleumettık nysandar men jalpy infraqūrylym qūrylysynyŋ sapasy men merzımı tūraqty baqylauda boluy tiıs. Taǧy bır maŋyzdy mındet – «Taza Qazaqstan» ekologiialyq baǧdarlamasy aiasynda qolaily ömır süru ortasyn qalyptastyru. Medisinalyq qyzmet sapasyn arttyru, skriningtık tekserulerdı uaqtyly ötkızu, öŋırge täjıribelı medisina mamandaryn tartu arqyly halyqtyŋ densaulyǧyn saqtauǧa erekşe nazar audarylady.
- Biudjet sapaly igerıluı tiıs. Bırınşı kezektegı qajettı jobalarǧa qarjy tiımdı jūmsaluyn qataŋ baqylauǧa alu kerek. Oblys äkımınıŋ orynbasarlary, basqarma basşylary, audan, qala, auyldyq okrug äkımderı öŋırdeıŋ äleumettık-ekonomikalyq tūraqtylyǧyn qamtamasyz etu üşın öz jauapkerşılıgın tolyq sezınıp, qoldanystaǧy qarjy mümkındıkterın barynşa tiımdı paidalanyp, ärbır tapsyrmany uaqtyly ärı sapaly oryndauy kerek. Jalpy, biylǧy jyldyŋ körsetkışterı belgılenıp, basym baǧyttary aiqyndaldy. Damu josparymyz bar, maqsat-mındetterımız de – aiqyn. Bızge basty keregı – sapaly jūmys pen naqty nätije, - dedı oblys äkımı jiyndy qorytyndylap.
Jiyn soŋynda 2025 jyldyŋ qorytyndysy boiynşa marapattau räsımı öttı. «Üzdık audan» nominasiiasynda Köksu audanynyŋ äkımdıgı jeŋımpaz atansa, «Üzdık auyldyq okrug» retınde Alaköl audanyndaǧy Besköl auyldyq okrugı tanyldy. Al Jetısu oblysy boiynşa Memlekettık kırıster departamentı «Üzdık basqarma», Oblystyq kardiologiialyq ortalyq «Üzdık mekeme» atandy.
Sondai-aq öz salalarynda joǧary nätijelerge qol jetkızgen bırqatar basşylar «Adal qyzmetı men eŋbegı üşın» arnaiy alǧys belgısımen marapattaldy.
