فوتو: قوستاناي وبلىسى اكىمدىگى
ۇقك قوستاناي وبلىسى اكىمىنىڭ ورىنباسارى گۇلبارام مۇساعازينانىڭ ۇستالعانىن راستادى، دەپ حابارلايدى “ادىرنا”.
بۇعان دەيىن بىرقاتار Telegram-ارنالاردا ءوڭىر باسشىسىنىڭ ورىنباسارى گۇلبارام مۇساعازينانىڭ ۇستالىپ، ۋاقىتشا ۇستاۋ يزولياتورىنا قامالعانى تۋرالى اقپارات تاراعان بولاتىن.
«سوتقا دەيىنگى تەرگەپ-تەكسەرۋ جۇرگىزىلىپ جاتقانىن حابارلايمىز. قىلمىستىق-پروتسەستىك كودەكستىڭ 201-بابى 1-بولىگىنە سايكەس وزگە اقپارات جاريا ەتۋگە جاتپايدى»، – دەلىنگەن Tengrinews.kz رەداكتسياسىنىڭ رەسمي ساۋالىنا ۇقك بەرگەن جاۋاپتا.
ايتا كەتەيىك، گۇلبارام مۇساعازينا قوستاناي وبلىسى اكىمىنىڭ ورىنباسارى قىزمەتىنە 2024 جىلعى شىلدەدە تاعايىندالعان.
ەسكە سالساق، 2025 جىلعى جەلتوقساندا لاۋازىمدىق وكىلەتتىكتەرىن تەرىس پايدالانۋ فاكتىسى بويىنشا قوزعالعان قىلمىستىق ءىس اياسىندا قوستاناي وبلىسى دەنساۋلىق ساقتاۋ باسقارماسى باسشىسىنىڭ ورىنباسارى ەربولات دوسپانوۆ ۇستالعان. تەرگەۋدى قوستاناي وبلىسى بويىنشا ۇقك دەپارتامەنتىنىڭ قىزمەتكەرلەرى جۇرگىزگەن. سوت كۇدىكتىنى قاماۋعا الۋعا سانكتسيا بەرگەن.
ال 2025 جىلعى تامىزدا مەديتسينالىق جابدىقتاردى ساتىپ الۋ كەزىندە لاۋازىمدىق وكىلەتتىكتەرىن تەرىس پايدالاندى دەگەن كۇدىكپەن دەنساۋلىق ساقتاۋ باسقارماسىنىڭ بۇرىنعى باسشىسى، اۋداندىق اۋرۋحانانىڭ باس دارىگەرى جانە كوممەرتسيالىق كاسىپورىن ديرەكتورى ۇستالعان. كۇدىكتىلەر ۇقك-ءنىڭ سىبايلاس جەمقورلىققا قارسى ءىس-قيمىل قىزمەتى مەن قوستاناي وبلىسى پروكۋراتۋراسىنىڭ بىرلەسكەن جەدەل-تەرگەۋ توبى جۇرگىزگەن جەدەل ءىس-شارالار مەن پروكۋرورلىق تەكسەرۋ ناتيجەسىندە ۇستالعان.
گۇلبارام مۇساعازينا 1997 جىلى قوستاناي اۋىل شارۋاشىلىعى ينستيتۋتىن «اوك ەكونوميكاسى جانە مەنەدجمەنتى» ماماندىعى بويىنشا، 2003 جىلى احمەت بايتۇرسىنۇلى اتىنداعى قوستاناي مەملەكەتتىك ۋنيۆەرسيتەتىن «قۇقىقتانۋ» ماماندىعى بويىنشا، 2020 جىلى دۋلاتوۆ اتىنداعى قوستاناي ينجەنەرلىك-ەكونوميكالىق ۋنيۆەرسيتەتىن «ەكونوميكا» ماماندىعى بويىنشا (ەكونوميكا عىلىمدارىنىڭ ماگيسترى) تامامداعان.
ەڭبەك جولىن 1997 جىلدىڭ تامىز ايىندا قوستاناي وبلىسى جىتىقارا اۋدانىنىڭ سالىق بولىمىندە سالىق ينسپەكتورى بولىپ باستاعان.
1999 جىلدىڭ قاڭتارىنان 2000 جىلدىڭ قازانىنا دەيىن قوستاناي وبلىسى جىتىقارا اۋدانى زابەلوۆكا اۋىلىنداعى «زابەلوۆكا» جشس-ىندە ەسەپ ايىرىسۋ بۋحگالتەرى بولىپ جۇمىس ىستەگەن.
2000 جىلدىڭ قازانىنان 2010 جىلدىڭ قاڭتارىنا دەيىن قوستاناي وبلىسى بويىنشا قارجى مينيسترلىگىنىڭ قارجىلىق باقىلاۋ كوميتەتىنە قاراستى قارجىلىق باقىلاۋ ينسپەكتسياسىندا ءتۇرلى قىزمەتتەر اتقارعان.
2010 جىلدىڭ قاڭتارىنان 2012 جىلدىڭ ماۋسىمىنا دەيىن باس پروكۋراتۋرانىڭ الەۋمەتتىك-ەكونوميكالىق سالاداعى زاڭدىلىقتى قاداعالاۋ دەپارتامەنتىندە اعا پروكۋرور قىزمەتىن اتقارعان.
2012 جىلدىڭ ماۋسىمىنان 2019 جىلدىڭ ساۋىرىنە دەيىن قارجى مينيسترلىگىنىڭ ىشكى مەملەكەتتىك اۋديت كوميتەتىنە قاراستى قوستاناي وبلىسى بويىنشا ىشكى مەملەكەتتىك اۋديت دەپارتامەنتىنىڭ باسشىسى بولعان.
2019 جىلدىڭ ساۋىرىنەن 2024 جىلدىڭ شىلدەسىنە دەيىن قوستاناي وبلىسى اكىمدىگى ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى قىزمەتىن اتقارعان.
2024 جىلدىڭ شىلدەسىنەن باستاپ قازىرگى ۋاقىتقا دەيىن قوستاناي وبلىسى اكىمىنىڭ ورىنباسارى بولعان. وبلىس اكىمدىگىنىڭ سايتىندا كورسەتىلگەندەي، ول ءوڭىردىڭ ەكونوميكالىق جانە الەۋمەتتىك دامۋ ماسەلەلەرىنە جەتەكشىلىك ەتەدى: ەكونوميكا جانە بيۋدجەت، قارجى جانە مەملەكەتتىك ساتىپ الۋ، كوممۋنالدىق مەنشىك پەن تۇرعىن ءۇي قورى، دەنساۋلىق ساقتاۋ، جۇمىسپەن قامتۋ جانە الەۋمەتتىك باعدارلامالار. سونداي-اق جوعارى مەملەكەتتىك ورگانداردىڭ تاپسىرمالارىن ورىنداۋعا، ورتالىق مەملەكەتتىك ورگاندارمەن ءوزارا ءىس-قيمىلعا جانە اكىمدىكتىڭ سالالىق بولىمشەلەرىنىڭ جۇمىسىن ۇيلەستىرۋگە جاۋاپ بەرەدى، بىرقاتار سالالىق كەڭەستەر مەن كوميسسيالاردى باسقارادى.
