Foto: Qostanai oblysy äkımdıgı
ŪQK Qostanai oblysy äkımınıŋ orynbasary Gülbaram Mūsaǧazinanyŋ ūstalǧanyn rastady, dep habarlaidy “Adyrna”.
Būǧan deiın bırqatar Telegram-arnalarda öŋır basşysynyŋ orynbasary Gülbaram Mūsaǧazinanyŋ ūstalyp, uaqytşa ūstau izoliatoryna qamalǧany turaly aqparat taraǧan bolatyn.
«Sotqa deiıngı tergep-tekseru jürgızılıp jatqanyn habarlaimyz. Qylmystyq-prosestık kodekstıŋ 201-baby 1-bölıgıne säikes özge aqparat jariia etuge jatpaidy», – delıngen Tengrinews.kz redaksiiasynyŋ resmi saualyna ŪQK bergen jauapta.
Aita keteiık, Gülbaram Mūsaǧazina Qostanai oblysy äkımınıŋ orynbasary qyzmetıne 2024 jylǧy şıldede taǧaiyndalǧan.
Eske salsaq, 2025 jylǧy jeltoqsanda lauazymdyq ökılettıkterın terıs paidalanu faktısı boiynşa qozǧalǧan qylmystyq ıs aiasynda Qostanai oblysy densaulyq saqtau basqarmasy basşysynyŋ orynbasary Erbolat Dospanov ūstalǧan. Tergeudı Qostanai oblysy boiynşa ŪQK departamentınıŋ qyzmetkerlerı jürgızgen. Sot küdıktını qamauǧa aluǧa sanksiia bergen.
Al 2025 jylǧy tamyzda medisinalyq jabdyqtardy satyp alu kezınde lauazymdyq ökılettıkterın terıs paidalandy degen küdıkpen densaulyq saqtau basqarmasynyŋ būrynǧy basşysy, audandyq auruhananyŋ bas därıgerı jäne kommersiialyq käsıporyn direktory ūstalǧan. Küdıktıler ŪQK-nıŋ Sybailas jemqorlyqqa qarsy ıs-qimyl qyzmetı men Qostanai oblysy prokuraturasynyŋ bırlesken jedel-tergeu toby jürgızgen jedel ıs-şaralar men prokurorlyq tekseru nätijesınde ūstalǧan.
Gülbaram Mūsaǧazina 1997 jyly Qostanai auyl şaruaşylyǧy institutyn «AÖK ekonomikasy jäne menedjmentı» mamandyǧy boiynşa, 2003 jyly Ahmet Baitūrsynūly atyndaǧy Qostanai memlekettık universitetın «qūqyqtanu» mamandyǧy boiynşa, 2020 jyly Dulatov atyndaǧy Qostanai injenerlık-ekonomikalyq universitetın «ekonomika» mamandyǧy boiynşa (ekonomika ǧylymdarynyŋ magistrı) tämamdaǧan.
Eŋbek jolyn 1997 jyldyŋ tamyz aiynda Qostanai oblysy Jıtıqara audanynyŋ salyq bölımınde salyq inspektory bolyp bastaǧan.
1999 jyldyŋ qaŋtarynan 2000 jyldyŋ qazanyna deiın Qostanai oblysy Jıtıqara audany Zabelovka auylyndaǧy «Zabelovka» JŞS-ınde esep aiyrysu buhgalterı bolyp jūmys ıstegen.
2000 jyldyŋ qazanynan 2010 jyldyŋ qaŋtaryna deiın Qostanai oblysy boiynşa Qarjy ministrlıgınıŋ Qarjylyq baqylau komitetıne qarasty qarjylyq baqylau inspeksiiasynda türlı qyzmetter atqarǧan.
2010 jyldyŋ qaŋtarynan 2012 jyldyŋ mausymyna deiın Bas prokuraturanyŋ äleumettık-ekonomikalyq saladaǧy zaŋdylyqty qadaǧalau departamentınde aǧa prokuror qyzmetın atqarǧan.
2012 jyldyŋ mausymynan 2019 jyldyŋ säuırıne deiın Qarjy ministrlıgınıŋ Işkı memlekettık audit komitetıne qarasty Qostanai oblysy boiynşa ışkı memlekettık audit departamentınıŋ basşysy bolǧan.
2019 jyldyŋ säuırınen 2024 jyldyŋ şıldesıne deiın Qostanai oblysy äkımdıgı ekonomika jäne biudjettık josparlau basqarmasynyŋ basşysy qyzmetın atqarǧan.
2024 jyldyŋ şıldesınen bastap qazırgı uaqytqa deiın Qostanai oblysy äkımınıŋ orynbasary bolǧan. Oblys äkımdıgınıŋ saitynda körsetılgendei, ol öŋırdıŋ ekonomikalyq jäne äleumettık damu mäselelerıne jetekşılık etedı: ekonomika jäne biudjet, qarjy jäne memlekettık satyp alu, kommunaldyq menşık pen tūrǧyn üi qory, densaulyq saqtau, jūmyspen qamtu jäne äleumettık baǧdarlamalar. Sondai-aq joǧary memlekettık organdardyŋ tapsyrmalaryn oryndauǧa, ortalyq memlekettık organdarmen özara ıs-qimylǧa jäne äkımdıktıŋ salalyq bölımşelerınıŋ jūmysyn üilestıruge jauap beredı, bırqatar salalyq keŋester men komissiialardy basqarady.
