ايدا بالاەۆا وتاندىق كينەماتوگرافياداعى تاريحي جەتىستىكپەن ءبولىستى. ونىڭ ايتۋىنشا، ءۇش اپتادان بەرى پروكاتتا كوش باستاپ كەلە جاتقان «QAITADAN» كوركەم ءفيلمى 1 ملرد تەڭگەدەن استام تابىس جيناپ، مەملەكەتتەن بولىنگەن قارجىنى بەس ەسەگە ارتىعىمەن قايتارعان العاشقى جوبا بولدى.
فيلم — جاس رەجيسسيور دۋمان ەركىمبەكتىڭ تولىقمەتراجدى دەبيۋتى. ول 2023 جىلعى پيتچينگتىڭ جەڭىمپازى اتانعان بولاتىن. كارتينادا وتباسى ينستيتۋتىن دارىپتەۋ، الەۋمەتتىك جاۋاپكەرشىلىك پەن ادامگەرشىلىك قاعيداتتارىن ناسيحاتتاۋ باستى نازارعا الىنعان.
ايدا بالاەۆانىڭ ايتۋىنشا، «QAITADAN» – كورەرمەندى تەرەڭ ويعا جەتەلەيتىن، ۇلتتىق رۋحتى كوتەرەتىن تۋىندى. ول بارشا قازاقستاندىقتاردى ءفيلمدى بىرگە تاماشالاپ، وتاندىق كينونى قولداۋعا شاقىردى.
مينيستر سونداي-اق مەملەكەت باسشىسىنىڭ ۇلتتىق قۇرىلتايدا ايتقان «كينو ەڭ الدىمەن ساپالى بولۋى كەرەك» دەگەن ءسوزىن ەسكە الىپ، ۇلتتىق كينونى دامىتۋ جۇمىستارى جۇيەلى تۇردە جالعاساتىنىن اتاپ ءوتتى.
