استاناداعى قاليبەك قۋانىشباەۆ اتىنداعى قازاق ۇلتتىق مۋزىكالىق دراما تەاترىندا ءابدىجامىل نۇرپەيىسوۆتىڭ ايگىلى «قان مەن تەر» تريلوگياسى جەلىسى بويىنشا ساحنالانعان جاڭا قويىلىمنىڭ پرەمەراسى ءوتتى.
ۇلتتىق تەاتردىڭ 35-ماۋسىمىن قورىتىندىلاعان ايتۋلى مادەني وقيعاعا زيالى قاۋىم وكىلدەرى مەن تەاترسۇيەر كورەرمەن كوپ جينالدى.
پرەمەرا قارساڭىندا وتكەن ءباسپاسوز بريفينگىندە سپەكتاكلدىڭ شىعارماشىلىق تۇجىرىمداماسى تانىستىرىلىپ، تەاتردىڭ 35 جىلدىق مەرەيتويىنا ارنالعان جوسپارلار جاريا ەتىلدى.
بريفينگ بارىسىندا اكتەر بولات ىبىراەۆ قويىلىمنىڭ قازاق تەاترىنداعى تاريحي ماڭىزىنا توقتالدى. ونىڭ ايتۋىنشا، «قان مەن تەر» – قازاق حالقىنىڭ تاعدىرىن، ارال ءوڭىرىنىڭ قاسىرەتىن، ادام مەن قوعامنىڭ كۇردەلى كەزەڭدەرىن تەرەڭ بەينەلەيتىن شىعارما.
"بۇل – تەك ءبىر ادامنىڭ ەمەس، تۇتاس حالىقتىڭ تاعدىرى. «قان مەن تەر» بۇگىن دە وزەكتىلىگىن جوعالتقان جوق. ءبىر سپەكتاكلدى كورۋ كەيدە ءبىر كىتاپ وقۋمەن تەڭ. كورەرمەن ەكى ساعاتتىڭ ىشىندە سول ءداۋىردىڭ وقيعاسىن، كەيىپكەرلەردىڭ تاعدىرىن سەزىنىپ، تەرەڭ وي تۇيەدى", – دەدى بولات ىبىراەۆ.
قويىلىمدى قازاقستاننىڭ ەڭبەك سىڭىرگەن قايراتكەرى نۇرلان جۇمانيازوۆ ساحنالاعان. ينستسەنيروۆكا اۆتورى – قازاقستاننىڭ حالىق ءارتىسى تىلەكتەس مەيراموۆ. سپەكتاكلدىڭ ستسەنوگرافياسى مەن كوستيۋمدەرىن قانات ماقسۇتوۆ ازىرلەسە، مۋزىكالىق كوركەمدەۋىن قايرات امانگەلدىۇلى، حورەوگرافياسىن اسان بورونچينوۆ، جارىق شەشىمىن ازامات بەكبەمبەتوۆ جاساعان.
پرەمەرانى تاماشالاعان كورەرمەن قاتارىندا قازاق ادەبيەتى مەن مادەنيەتىنىڭ كورنەكتى وكىلدەرى تولەن ابدىك پەن روزا مۇقانوۆا بولدى.
الماتى قالاسىنان ارنايى كەلگەن ايمان ەسىمدى كورەرمەن قويىلىمنان ەرەكشە اسەر العانىن ايتتى.
"ساحنانىڭ بەزەندىرىلۋىنە ەرەكشە ءمان بەردىم، وتە جوعارى دەڭگەيدە جاسالعان. بۇل شىعارمانى الدىمەن وقىپ، كەيىن قويىلىمىن كورگەن دۇرىس ەكەن. سپەكتاكل كوڭىلىمنەن شىقتى", – دەدى ول.
كەزىندە قازاقستاننىڭ ەڭبەك ەرى، كسرو جانە قازاقستاننىڭ حالىق ءارتىسى ازەربايجان مامبەتوۆ ساحنالاعان «قان مەن تەر» اراعا جىلدار سالىپ جاڭا رەجيسسەرلىك شەشىممەن قايتا جاڭعىرىپ، بۇگىنگى كورەرمەنمەن قايتا قاۋىشتى.
