قىرعىزستان تاريحىندا العاش رەت ءوز ۇلتتىق ۆاليۋتاسىن باسىپ شىعارا باستادى. بۇل تۋرالى سادىر جاپاروۆ ءوزىنىڭ الەۋمەتتىك جەلىدەگى پاراقشاسىندا مالىمدەدى، دەپ حابارلايدى "ادىرنا".
قىرعىزستان باسشىسىنىڭ ايتۋىنشا، بۇعان دەيىن ەل ۇلتتىق ۆاليۋتاسىن شەتەلدە باسىپ شىعارۋعا تاپسىرىس بەرۋگە ءماجبۇر بولعان.
"ەندى ءبارى وزگەردى: ءبىز سونداي دەڭگەيگە جەتتىك، ەندى ءوزىمىز باسقا مەملەكەتتەرگە دە ۆاليۋتا باسىپ شىعارا الامىز. اقشا ءوندىرۋ كەزىندە بارلىق قاجەتتى ستاندارتتار مەن تالاپتارعا سايكەستىكتى راستايتىن حالىقارالىق سەرتيفيكات الدىق", — دەپ جازدى ول.
ونىڭ اتاپ وتۋىنشە، قىرعىزستان جوعارى ساپادا جالپى ازاماتتىق پاسپورتتار، ID-كارتالار، جۇرگىزۋشى كۋالىكتەرى جانە كولىك قۇرالدارىنىڭ تەحنيكالىق پاسپورتتارىن شىعارىپ كەلەدى.
ء"بىز باسقا ەلدەر ءۇشىن تەك ۆاليۋتانى عانا ەمەس، ءتۇرلى مەملەكەتتىك قۇجاتتاردى دا باسىپ شىعارۋعا دايىنبىز. قازىرگى ۋاقىتتا بىرنەشە مەملەكەتتەن تاپسىرىستار قابىلدانىپ جاتىر. سەرتيفيكاتتىڭ ارقاسىندا ءونىمىمىزدىڭ قورعانىسى ەڭ جوعارى دەڭگەيدە. ياعني مۇنداي قۇجاتتاردى قولدان جاساۋ مۇمكىن ەمەس. سونىمەن قاتار باعالارى دا قولجەتىمدى", — دەپ قوستى سادىر جاپاروۆ.
ەسكە سالايىق، 2023 جىلى قىرعىزستان تاريحىندا العاش رەت ءوز ۇلتتىق پاسپورتتارىن باسىپ شىعارا باستادى. سونداي-اق 2025 جىلدىڭ ساۋىرىندە ەل باسقا مەملەكەتتەردىڭ پاسپورتتارىن شىعارۋدى قولعا العان. بۇدان بولەك، وتكەن جىلدىڭ 3 قاراشاسىنان باستاپ ەلدە جاڭارتىلعان ديزاين مەن كۇشەيتىلگەن قورعانىس ەلەمەنتتەرى بار 2025 جىلعى ۇلگىدەگى جالپى ازاماتتىق پاسپورتتار مەن ID-كارتالار اينالىمعا ەنگىزىلدى.
