قاراعاندى وبلىسىندا ءوڭىردىڭ بەلسەندى ءارى ەل تاعدىرىنا بەيجاي قارامايتىن ەكى مىڭعا جۋىق جاس تۇرعىننىڭ قوسقان اۋقىمدى جاستار فورۋمى ءوتتى.
بۇل جيىن ەل بولاشاعىنا قاتىستى ماڭىزدى ماسەلەلەردى اشىق ءارى مازمۇندى تالقىلاۋعا ارنالعان پىكىر الاڭىنا اينالدى. كۇن تارتىبىندەگى نەگىزگى ماسەلە – جاڭا كونستيتۋتسيا جوباسى.
قاتىسۋشىلار ۇسىنىستارمەن ءۇستىرت تانىسۋمەن شەكتەلمەي، قۇجاتتىڭ جەكەلەگەن نورمالارىن جان-جاقتى سارالادى. جاستار ناقتى باپتاردى تالقىلاپ، كوكەيدەگى ساۋالدارىن قويىپ، ءوز كوزقاراستارى مەن پايىمدارىن ورتاعا سالدى. كوپشىلىكتىڭ پىكىرىنشە، ۇسىنىلىپ وتىرعان وزگەرىستەر ادىلدىك، اشىقتىق جانە زاڭ ۇستەمدىگى قاعيداتتارىن نىعايتىپ قانا قويماي، ءار ازاماتتىڭ ءوزىن-ءوزى جۇزەگە اسىرۋىنا، الەۋەتىن تولىق اشۋىنا جانە قوعام ومىرىنە بەلسەندى ارالاسۋىنا جاڭا مۇمكىندىكتەر بەرەدى.
جيىندا قازاقستان حالقى اسسامبلەياسىنىڭ وڭىرلىك انالار كەڭەسىنىڭ ءتورايىمى ايجان قياسوۆا، قاراعاندى قالالىق ءماسليحاتىنىڭ دەپۋتاتى راۆيل سادىقوۆ، كاسىپكەر ءارى قوعام قايراتكەرى ەربولات زاكيروۆ ءسوز سويلەدى. سپيكەرلەر جەكە جاۋاپكەرشىلىكتىڭ سالماعى، بەرىك ازاماتتىق ۇستانىمنىڭ ماڭىزى جانە جاس بۋىننىڭ قوعامدىق ۇدەرىستەرگە بەلسەندى قاتىسۋىنىڭ قاجەتتىگى جونىندە وي قوزعادى. ولاردىڭ ايتۋىنشا، ءدال بۇگىنگى جاستار ەل دامۋىنىڭ الداعى ونداعان جىلعا ارنالعان ستراتەگيالىق باعىتىن ايقىندايتىن شەشۋشى كۇش بولىپ تابىلادى.
— مەن جاستاردىڭ وكىلى رەتىندە كونستيتۋتسيامىزعا ەنگىزىلەتىن رەفورمانى تولىق قولدايمىن. ۇسىنىلىپ وتىرعان تۇزەتۋلەر نەگىزگى زاڭدى جاڭعىرتىپ، ۋاقىت تالابىنا ساي جەتىلدىرۋگە باعىتتالعان. مەن ءۇشىن كونستيتۋتسيا ازاماتتاردىڭ قۇقىقتارى مەن بوستاندىقتارىن سەنىمدى ءارى مۇلتىكسىز قورعايتىنىنا كوز جەتكىزۋ اسا ماڭىزدى. سوندىقتان داۋىس بەرۋگە قاتىسۋعا نيەتتىمىن، — دەدى ەربولات زاكيروۆ.
فورۋم ەركىن ءارى سەرپىندى اتموسفەرادا ءوتتى. پىكىرتالاس بولىمىنەن كەيىن قاتىسۋشىلارعا مازمۇندى كونتسەرتتىك باعدارلاما ۇسىنىلدى. جاندى مۋزىكا، شىنايى ەموتسيا جانە كورەرمەندەردىڭ بەلسەندى قولداۋى كەشتىڭ شىرايىن كىرگىزىپ، ونىڭ قورىتىندىسىن ايرىقشا اسەرلى ەتتى.
ۇيىمداستىرۋشىلاردىڭ اتاپ وتۋىنشە، بۇل فورۋم جاي عانا كەزدەسۋ ەمەس، ەل بولاشاعىنا جاۋاپكەرشىلىكپەن قارايتىن، وڭ وزگەرىستەردىڭ بەل ورتاسىندا بولۋعا ۇمتىلعان جاستاردى توعىستىرعان ماڭىزدى ديالوگ الاڭى بولدى.
