قازاقستاندا اۋقىمدى ءارى بۇرىن بولماعان رەفورمالار ىسكە اسىرىلىپ، حالىق ونىڭ ناقتى ناتيجەسىن كورىپ وتىر. بۇل تۋرالى مەملەكەت باسشىسى قاسىم-جومارت توقاەۆ اقوردادا سويلەگەن سوزىندە مالىمدەدى، دەپ حابارلايدى "ادىرنا" ۇلتتىق پورتالى.
پرەزيدەنت الەمدىك احۋالدىڭ كۇردەلەنە تۇسكەنىنە قاراماستان، قازاقستان بايسالدى ءارى بەيتاراپ سىرتقى ساياسات جۇرگىزىپ كەلە جاتقانىن اتاپ ءوتتى. ونىڭ ايتۋىنشا، بۇل ۇستانىم ەلدىڭ تۇراقتى دامۋىنا قولايلى جاعداي جاساپ وتىر.
"جاھانداعى جاعداي كۇردەلى، بولاشاق بۇلىڭعىر. سوعان قاراماستان، ەلىمىز سىرتقى ساياساتتا بايىپتى باعىت ۇستانىپ كەلەدى. بۇل قازاقستاننىڭ دامۋىنا مۇمكىندىك بەرۋدە", – دەدى قاسىم-جومارت توقاەۆ.
مەملەكەت باسشىسى ەلدە جۇرگىزىلىپ جاتقان تۇبەگەيلى جاڭعىرتۋلارعا دا توقتالدى. ونىڭ ايتۋىنشا، كونستيتۋتسيالىق رەفورما جۇزەگە اسىرىلىپ، جالپىحالىقتىق رەفەرەندۋم ارقىلى اتا زاڭعا ماڭىزدى وزگەرىستەر ەنگىزىلگەن. سونىڭ ناتيجەسىندە پارلامەنتتىڭ قۇزىرەتى كەڭەيىپ، ۇكىمەتتىڭ جاۋاپكەرشىلىگى ارتقان. سونداي-اق ساياسي پارتيالاردىڭ ءرولى كۇشەيىپ، كونستيتۋتسيالىق سوت قۇرىلدى. ازاماتتار ستراتەگيالىق ماڭىزى بار شەشىمدەر قابىلداۋعا بەلسەندى تۇردە قاتىسا باستاعان.
ء"بىر سوزبەن ايتقاندا، قازاقستاندا بۇرىن-سوڭدى بولماعان تىڭ وزگەرىستەر جاسالدى. ەڭ باستىسى – حالىق رەفورمانىڭ يگىلىگىن كورىپ وتىر، وزگەرىستەردىڭ اسەرىن ناقتى سەزىنۋدە", – دەدى پرەزيدەنت.
قاسىم-جومارت توقاەۆ بيىلعى جولداۋىندا پارلامەنتتىك رەفورما ۇسىنعانىن ەسكە سالىپ، بۇل باستاماعا بايلانىستى قوعامنان كوپتەگەن ۇسىنىس ءتۇسىپ جاتقانىن ايتتى. ەگەر حالىق قولداسا، ءبىر پالاتالى كاسىبي پارلامەنت قۇرۋ مۇمكىندىگى قاراستىرىلاتىنىن جەتكىزدى.
پرەزيدەنتتىڭ ايتۋىنشا، مۇنداي قادام مەملەكەتتىڭ دامۋى ءۇشىن ءتيىمدى ءارى پايدالى بولماق.
