الماتىدا Medialab كوممۋنيكاتسيا اگەنتتىگىنىڭ ءتول جوباسى Qaz365.kz اقپارات اگەنتتىگى ىسكە قوسىلىپ، كوپشىلىككە تانىستىرىلدى.
«Qaz365.kz − ەلىمىزدەگى جانە الەمدەگى ماڭىزدى وقيعالار تۋرالى حاباردار ەتەتىن قوعامدىق-ساياسي جانە اقپاراتتىق-ساراپتامالىق ينتەرنەت-باسىلىم. باستى ماقساتىمىز – جەدەل ءارى ساپالى اقپارات بەرۋ. ەكونوميكا، ساياسات،بيزنەس، قوعام جانە حالىقارالىق جاڭالىقتار تۋرالى جازامىز. ءار جاڭالىققا وبەكتيۆتى قاراۋ − ءبىزدىڭ باستى ۇستانىم»، - دەيدى ينتەرنەت باسىلىمنىڭ باس رەداكتورى باۋىرجان كاريپوۆ.
سايت رەداكتسياسى ۇسىنعان كونتەنت قازىردىڭ وزىندە YouTube, TikTok, Instagram, Telegram جانە Facebook اۋديتورياسىنىڭ سۇرانىسىنا يە بولىپ ۇلگەرگەن. ماسەلەن، جاقىندا ەكىباستۇزداعى جاعداي تۋرالى «ەكيباستۋز سليۆات يلي نە سليۆات؟» اتتى رەپورتاجىن الەۋمەتتىك جەلى تۇتىنۋشىلارى «ەڭ ءادىل ماتەريال» دەپ باعالادى.
تانىستىرىلىم بارىسىندا بەلگىلى جۋرناليست، قوعام بەلسەندىسى عاليا اجەنوۆا، جۋرناليست، جازۋشى ايگۇل احانبايقىزى، جۋرناليست، پۋبليتسيست، Minber.kz سايتىنىڭ باس رەداكتورى ەسەنگۇل كاپقىزىن، «قازاقستان كۆن وداعى» رەسپۋبليكالىق جاستار قوعامدىق بىرلەستىگىنىڭ پرەزيدەنتى ەسەن ەلەۋكەن، بلوگەر الماس توقاباەۆ، inbusiness.kz سايتىنىڭ باس رەداكتورى ناعاشىبەك الدان جاڭا مەديا جوباعا ساتتىلىك تىلەدى.
بيىل قۇرىلىپ، قازاق ءتىلدى سايتتاردىڭ باسىن بىرىكتىرگەن Qazaq Media Association جەكە كاسىپكەرلەر جانە زاڭدى تۇلعالار بىرلەستىگىنىڭ وكىلدەرى، Dalanews.kz سايتىنىڭ باس رەداكتورى دۋمان بىقاي مەن Adyrna.kz سايتىنىڭ باس رەداكتورى ارمان اۋباكىر جاڭا جوبانىڭ قاۋىمداستىق قۇرامىنا قابىلدانعانى تۋرالى قۇجات تابىس ەتتى.
شارا بارىسىندا Medialab كوممۋنيكاتسيا اگەنتتىگى جىلدى قورىتىندىلاپ، بەس اتالىم بويىنشا سىيلىق تابىستادى.
اگەنتتىك قۇرىلتايشىلارى Nege.kz سايتىنىڭ ءتىلشىسى دينارا مىڭجاسارقىزىن «ۇزدىك جۋرناليست»، سۇراۋى بار ارناسىن «ۇزدىك youtube ارنا»، Dalainside — «ۇزدىك تەلەگرام كانال»، inbusiness.kz — «ۇزدىك سايت»، اسحات قاسەنعاليدى «ۇزدىك بلوگەر»، دەپ تانىدى.
«الداعى ۋاقىتتا مەديا، كوممۋنيكاتسيا سالاسىنا ارنالعان سىيلىق تاعايىنداعىمىز كەلەدى. بيىل سونىڭ نەگىزىن كىشىگىرىم ماراپات ارقىلى سالىپ، باستاپ كەتۋدى ءجون كوردىك»، دەيدى اگەنتتىك وكىلدەرى.
ايتا كەتەيىك، Medialab كوممۋنيكاتسيا اگەنتتىگى 2021 جىلى قۇرىلعان. «ءبىر جارىم جىل بۇرىن ءبىر مەديا، كوممۋنيكاتسيا سالاسىندا ەڭبەك ەتەتىن ءبىر توپ مامان قازاق اۋديتورياسى مەن بيزنەستىڭ، بيلىكتىڭ اراسىن جالعايتىن اگەنتتىك قۇرساق، دەگەن باستامانىڭ توڭىرەگىنە جۇمىلعانبىز. قازىر مەديا كونتەنتتى قازاق تىلىنە اۋدارۋدان باستاپ، كەز-كەلگەن تۇردەگى كونتەنتتى ءوندىرۋ، تاراتۋ، ورنالاستىرۋ، باق-پەن بايلانىس، باق، بلوگەرلەر ارقىلى مەديا سۇيەمەلدەۋ، يميدجدىك جوبالار جاساۋ باعىتىندا قىزمەت كورسەتە باستادىق»، دەدى اگەنتتىكتىڭ ديرەكتورى ريشات اسقاربەكۇلى.
اگەنتتىك جاقىندا عانا تالدىقورعاندا بەلگىلى جۋرناليست، مارقۇم بەيسەن قۇرانبەكتىڭ قۇرمەتىنە ارنالعان ميني-فۋتبولدان ءتۋرنيردىڭ وتۋىنە ۇيىتقى بولىپ، قارجىلاي كومەك كورسەتتى.
"ادىرنا" ۇلتتىق پورتالى
