ازەربايجاندا ءدىني جۋرناليستيكا سالاسىنا ماماندانعان كاسىبي ۇيىم جوق. بۇل تۋرالى گۋسار قالاسىندا وتكەن «باق-تا ءدىني تاقىرىپتاردى جاريالاۋ: ءدىني تۇراقتىلىقتى قورعاۋداعى ورتاق جاۋاپكەرشىلىك» اتتى كونفەرەنتسيا بارىسىندا ايتىلدى، دەپ حابارلايدى "ادىرنا" ۇلتتىق پورتالى Report اگەنتتىگىنە سىلتەپ.
«كاسىبيلىك پەن ءدىني ساۋاتتىلىق: رۋحاني قۇندىلىقتاردى ساقتاۋداعى باق جاۋاپكەرشىلىگى» تاقىرىبىنداعى پانەلدىك سەسسيادا «ازەربايجان تەلەديدارى جانە راديوحابار تاراتۋ» جابىق اكتسيونەرلىك قوعامىنىڭ تەلەراديو اكادەمياسىنىڭ رەكتورى الماز ماحمۋد ەلدە ءدىني جۋرناليستيكاعا باعىتتالعان كاسىبي ۇيىم قۇرۋدىڭ ماڭىزىن اتاپ ءوتتى.
ونىڭ ايتۋىنشا، مۇنداي قۇرىلىم جۋرناليستەردىڭ كاسىبي بىلىكتىلىگىن ارتتىرىپ، ءدىني تاقىرىپتاردى ساپالى ءارى جاۋاپكەرشىلىكپەن جاريالاۋعا مۇمكىندىك بەرەدى. سونداي-اق قوعامعا دۇرىس ءارى جان-جاقتى اقپارات ۇسىنۋعا ىقپال ەتەدى.
ازەربايجان تەولوگيا ينستيتۋتىنىڭ وقىتۋشىسى مۇشفيگ وتگۇن ءدىني تاقىرىپتاردى جاريالاۋ كەزىندە تەك اقپاراتتى جەتكىزۋ جەتكىلىكسىز ەكەنىن ايتتى. ونىڭ پىكىرىنشە، جۋرناليستەر رۋحاني قۇندىلىقتاردىڭ ءمانى مەن مازمۇنىن دا دۇرىس تۇسىندىرە ءبىلۋى قاجەت.
پانەلدىك سەسسيانى باكۋ مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىنىڭ دەكانى، ازەربايجان ءباسپاسوز كەڭەسى توراعاسىنىڭ ورىنباسارى، ەڭبەك سىڭىرگەن جۋرناليست ۆۋگار زيفاروعلۋ جۇرگىزدى.
ال ديكتسيا اكادەمياسىنىڭ ديرەكتورى، شەشەندىك ونەر بويىنشا جاتتىقتىرۋشى جالالا نازاروعلۋ ءدىني جانە فيلوسوفيالىق ماسەلەلەردى جاريالاۋ كەزىندە قوعامداعى ءارتۇرلى كوزقاراستاردى ەسكەرىپ، بارىنشا مۇقيات ءارى كاسىبي ۇستانىم قاجەت ەكەنىن اتاپ ءوتتى.
كونفەرەنتسيا سوڭىندا قاتىسۋشىلار ءدىني تاقىرىپتاردى بۇقارالىق اقپارات قۇرالدارىندا جاريالاۋ مادەنيەتى مەن كاسىبي جاۋاپكەرشىلىك ماسەلەلەرىن تالقىلاپ، پىكىر الماستى.
