اقش قارجى مينيسترلىگىنىڭ شەتەلدىك اكتيۆتەردى باقىلاۋ باسقارماسى (OFAC) يران مۇنايىن قىتاي حالىق رەسپۋبليكاسىنا ميلليونداعان باررەل كولەمىندە زاڭسىز جەتكىزۋدى ۇيىمداستىرعان حالىقارالىق جەلىگە قارسى سانكتسيالار ەنگىزدى. بۇل تۋرالى اقش قارجى مينيسترلىگى مالىمدەدى، دەپ حابارلايدى “ادىرنا”.
رەسمي اقپاراتقا سايكەس، مۇناي تاسىمالى يران قارۋلى كۇشتەرى باس شتابىنىڭ (AFGS) جانە ونىڭ سانكتسيالانعان بۇركەنشىك كومپانياسى — Sepehr Energy Jahan Nama Pars ارقىلى جۇزەگە اسقان. مۇنايدىڭ جالپى قۇنى جۇزدەگەن ميلليون دوللارمەن باعالانادى. سانكتسيا تىزىمىنە قىتاي، ءۇندىستان جانە بىرىككەن اراب امىرلىكتەرىندە تىركەلگەن كومپانيالار مەن جەكە تۇلعالار، سونداي-اق بىرنەشە مۇناي تانكەرى ەنگىزىلدى.
اقش بيلىگىنىڭ مالىمەتىنشە، يران مۇناي ەكسپورتىنان جىل سايىن ميللياردتاعان دوللار تابىس تاۋىپ، بۇل قاراجاتتى ايماقتاعى تۇراقسىزداندىرۋشى ارەكەتتەرگە جانە حاماس، حۋسيتتەر مەن «حيزبوللا» سياقتى قارۋلى توپتاردى قولداۋعا جۇمساپ وتىر. يران قارۋلى كۇشتەرى باس شتابى مۇنايدى ساتۋ جانە تاسىمالداۋ ءۇشىن شەتەلدىك بۇركەنشىك كومپانيالار مەن دەلدالدار جەلىسىن پايدالانعان.
اقش قارجى ءمينيسترى سكوتت بەسسەنتتىڭ ايتۋىنشا، يران بيلىگى مۇنايدان تۇسكەن تابىستى يادرولىق باعدارلامانى دامىتۋعا، بالليستيكالىق زىمىراندار مەن ۇشقىشسىز ۇشۋ اپپاراتتارىن وندىرۋگە باعىتتاپ كەلەدى. ونىڭ سوزىنشە، اقش يراننىڭ مۇنداي ارەكەتتەرىن قارجىلاندىرۋعا جول بەرمەۋ ءۇشىن ەكونوميكالىق قىسىمدى كۇشەيتۋدى جالعاستىرادى.
سانكتسيا اياسىندا بۇرىن ANTHEA دەپ اتالعان، قازىر SIRI اتاۋىمەن بەلگىلى تانكەر ەرەكشە اتالدى. كەمە سينگاپۋر جاعالاۋىندا يراندىق مۇنايمەن ۇستالعان. تەرگەۋ بارىسىندا تانكەردىڭ اتاۋىن جاسىرۋ جانە تەڭىز قۇجاتتارىن قولدان جاساۋ فاكتىلەرى انىقتالعان. كەمەنىڭ كاپيتانى، يران ازاماتى اراش لاۆيان دا سانكتسيا تىزىمىنە ەنگىزىلدى.
سونداي-اق 2024–2025 جىلدارى Sepehr Energy يران مۇنايىن قىتايعا جەتكىزۋ ءۇشىن بىرقاتار كەمەلەردى پايدالانعان. اتاپ ايتقاندا، GIOIOSA كەمەسىنىڭ مەنەدجەرى ءارى وپەراتورى رەتىندە گونكونگتا تىركەلگەن Ocean Dolphin Ship Management Ltd قىزمەت اتقارعان. ال OXIS كەمەسىنىڭ تەحنيكالىق مەنەدجەرى قازاقستاندا ورنالاسقان جانە سەيشەل ارالدارىندا تىركەلگەن Umbra Navi Ship Management Corp (Umbra Navi) بولعان.
بۇدان بۇرىن 2025 جىلى رەسەيگە قاتىستى سانكتسيادا دا Umbra Navi Ship Management Corp كومپانياسىنىڭ اتى اتالعان ەدى. سونداي-اق سانكتسياعا كومپانياعا تيەسىلى Oxis كەمەسى دە ءىلىندى.
سونىمەن قاتار، ءۇندىستاندا تىركەلگەن Marshal Ship Management Private Limited كومپانياسى سانكتسياعا ىلىكتى. كومپانيا Sepehr Energy-مەن بايلانىستى كەمەلەرگە ەكيپاج ۇسىنعان جانە جالعان قۇجاتتاردى راسىمدەۋگە قاتىسقان دەپ ايتىلادى. كومپانيا ديرەكتورى رايان كساۆەر ارانيا دا شەكتەۋ شارالارىنا ۇشىرادى.
اقش قارجى مينيسترلىگى Sepehr Energy-گە قاراستى بىرنەشە يراندىق كومپانيا مەن ولاردىڭ باسشىلارىن دا سانكتسيا تىزىمىنە ەنگىزدى. بۇدان بولەك، يران مۇنايىن تاسىمالداۋعا قاتىسقان بىرقاتار تانكەرلەردىڭ اقش اۋماعىنداعى جانە اقش باقىلاۋىنداعى اكتيۆتەرى بۇعاتتالدى.
سانكتسيالارعا سايكەس، اتالعان تۇلعالار مەن ۇيىمداردىڭ اقش-تاعى بارلىق مۇلكى بۇعاتتالادى، ال اقش ازاماتتارى مەن كومپانيالارىنا ولارمەن كەز كەلگەن قارجىلىق نەمەسە كوممەرتسيالىق مامىلە جاساۋعا تىيىم سالىنادى. سانكتسيا تالاپتارىن بۇزعاندار ازاماتتىق نەمەسە قىلمىستىق جاۋاپكەرشىلىككە تارتىلۋى مۇمكىن.
اقش بيلىگىنىڭ مالىمدەۋىنشە، بۇل شارالاردىڭ ماقساتى — جازالاۋ ەمەس، يراننىڭ حالىقارالىق قۇقىققا قايشى ارەكەتتەرىن توقتاتىپ، ايماقتىق قاۋىپسىزدىكتى قامتاماسىز ەتۋ.
ەسكە سالساق، بۇعان دەيىن اقش يرانمەن وتكەن كەلىسسوزدەردىڭ جاڭا كەزەڭىنەن كەيىن بىرنەشە ساعات ىشىندە تەگەرانعا قارسى جاڭا سانكتسيالار ەنگىزگەنىن حابارلادىق.
