كونستيتۋتسيالىق رەفورما جونىندەگى كوميسسيانىڭ توعىزىنشى وتىرىسىندا ءماجىلىس دەپۋتاتى، «ۇلتتىق ۆولونتەرلىك جەلى» زتب جەتەكشىسى ۆەرا كيم قازاقستاندا كونستيتۋتسيالىق دەڭگەيدە ۆولونتەرلىكتى ىنتالاندىرۋدى بەكىتۋ قاجەت دەگەن باستاما كوتەردى.
ۆەرا كيم مەملەكەت باسشىسىنىڭ ەرىكتىلەر قوزعالىسىنا تۇراقتى تۇردە قولداۋ كورسەتەتىنىن ەسكە سالدى. اعىمداعى جىلدىڭ 30 قاڭتارىندا اۋقىمدى كولەمدە وتكەن ەرىكتىلەر فورۋمى وسىنىڭ جارقىن دالەلى بولدى.
«جاڭا كونستيتۋتسيا جوباسىنا ۇسىنىستار جيناۋ جاريالانعان ساتتەن باستاپ ماعان ۆولونتەرلىك ۇيىمدار مەن ەرىكتىلەردىڭ وزدەرىنەن 31-باپتىڭ 2-تارماعىن «ۆولونتەرلىك» دەگەن سوزبەن تولىقتىرۋ تۋرالى وتىنىشتەر بىرنەشە رەت كەلىپ ءتۇستى. وسىعان بايلانىستى قازاقستاندا الەۋمەتتىك قامسىزداندىرۋ مەن قايىرىمدىلىقتى قۇرۋدى كوتەرمەلەۋمەن قاتار ۆولونتەرلىكتى ىنتالاندىرۋدى بەكىتۋدى ۇسىنامىن»، - دەدى ول.
ونىڭ ايتۋىنشا، بۇل باپتا الەۋمەتتىك قولداۋدى قامتاماسىز ەتۋدەگى مەملەكەت ىنتالاندىراتىن قوعامنىڭ قاتىسۋ نىساندارى كەلتىرىلگەن. اتاپ ايتقاندا، وندا ساقتاندىرۋ مەن قايىرىمدىلىق كورسەتىلگەن، بىراق باسقا ماڭىزدى نىسان – ازاماتتاردىڭ جەكە وتەۋسىز ەڭبەگى كورسەتىلمەگەن.
«ەرىكتىلەر توتەنشە جاعدايلار كەزىندە، اۋرۋحانالاردا كومەكتەسەدى، الەۋمەتتىك سالادا قارتتاردى، بالالاردى، مۇگەدەك ادامداردى، قيىن جاعدايدا وتباسىلاردى قولدايدى. بۇل بۇكىل ەل بويىنشا جۇمىس ىستەپ جاتقان الەۋمەتتىك قولداۋ جۇيەسىنىڭ ماڭىزدى بولىگى» - دەدى ۆەرا كيم.
دەپۋتات «ۆولونتەرلىك» ءسوزى نورمانى لوگيكالىق تۇردە تولىقتىراتىنىن، ويتكەنى بۇل جاعدايدا مەملەكەت تەك رەسۋرستار مەن تەتىكتەردى عانا ەمەس، ازاماتتاردىڭ دا قاتىسۋىن ىنتالاندىراتىنىن اتاپ كورسەتتى.
«مەن بۇل باستامانى بۇكىل ەرىكتىلەر قوزعالىسىنىڭ اتىنان كوتەرەمىن»، - دەدى ول.
سونداي-اق ۆەرا كيم ساۋالنامالارعا سايكەس ءاربىر سەگىزىنشى قازاقستاندىقتىڭ ۆولونتەرلىك تاجىريبەسى بار ەكەندىگىن كورسەتەتىن دەرەكتەرگە توقتالدى. رەسمي مالىمەتتەر بويىنشا، ەرىكتىلىككە 300 مىڭعا جۋىق ادام تارتىلعان، 800-دەن استام ۇيىم مەن 3,5 مىڭ باستاماشىل توپ جۇمىس ىستەيدى.
ء«بىز ءۇشىن بۇل جاي عانا قىزمەت ەمەس – بۇل ءبىزدىڭ قوعامنىڭ تۇراقتىلىعى مەن ءال-اۋقاتىنا قوسقان ۇلەسىمىز»، - دەدى دەپۋتات.
سونىمەن قاتار ول قوعامدا ەكولوگيالىق مادەنيەتتى قالىپتاستىرۋداعى ەرىكتىلەردىڭ ەرەكشە ءرولىن اتاپ ءوتتى.
ۆەرا كيمنىڭ ايتۋىنشا، ولار وزدەرىنىڭ ناقتى ارەكەتتەرىمەن تابيعاتقا جانە قورشاعان ورتاعا دەگەن جاۋاپكەرشىلىككە ۇقىپتى قاراۋدىڭ ۇلگىسىن كورسەتەدى. اۋماقتاردى تازارتۋ، اعاش وتىرعىزۋ، تابيعي نىسانداردى ساقتاۋ جانە ەكولوگيالىق ءبىلىم بەرۋ بويىنشا ەرىكتىلەر باستامالارى ارقىلى تابيعات قۇندىلىعى تۋرالى پراكتيكالىق تۇسىنىك قالىپتاسادى.
«كوپتەگەن ادامدار ءۇشىن مۇنداي جوبالارعا قاتىسۋ سانالى ەكولوگيالىق تارتىپكە دەگەن العاشقى قادام، ال جاستار ءۇشىن ازاماتتىق جاۋاپكەرشىلىك پەن قوعامدىق يگىلىككە قۇرمەتپەن قاراۋدىڭ ماڭىزدى مەكتەبى بولىپ تابىلادى»، – دەپ اتاپ ءوتتى ول.
ۆەرا كيم جاڭا كونستيتۋتسيا جوباسىندا جوعارى ەكولوگيالىق مادەنيەتتىڭ مەملەكەتتىڭ ىرگەلى قاعيداتى رەتىندە ورنىعۋى قوعامدىق قوزعالىسقا جۇيەلى جانە ۇزاق مەرزىمدى سيپات بەرەتىنىن اتاپ ءوتتى.
ناتيجەسىندە قورشاعان ورتاعا قامقورلىق ءبىر رەتتىك اكتسياعا ەمەس، ءبىلىم بەرۋ، قۇقىقتىق رەتتەۋ جانە قوعامدىق باستامالار ارقىلى قولداۋ كورسەتىلەتىن مەملەكەتتىك ساياساتتىڭ ستراتەگيالىق باعىتىنا اينالادى.
«ازاماتتار ءۇشىن بۇل تازا جانە قاۋىپسىز ءومىر ءسۇرۋ ورتاسى، دەنساۋلىقتى قورعاۋ جانە تابيعي رەسۋرستاردى ساقتاۋدان كورىنەدى. ۆولونتەرلەردىڭ بەلسەندىلىگى مەن ەكولوگيالىق مادەنيەتتى كونستيتۋتسيالىق تۇرعىدا تانۋ تۇتاستاي العاندا ءار ادام ەلدىڭ تابيعاتى مەن بولاشاعىن ساقتاۋدىڭ قاتىسۋشىسى بولاتىن دامۋدىڭ تۇراقتى مودەلىن قالىپتاستىرادى»، – دەپ تۇيىندەدى ول.
